د بلوچستان د پښين په مندوزیو کې یوې ځايي مدني ټولنې ویلي دي چې د مشال راډیو تر ویډیويي رپورټ وروسته د ضلعې انتظامي مشر ورغلی وو او خلکو ته یې تر سېلاو وروسته د بیارغونې او نورو مرستندویه چارو ډاډ ورکړی دی.
د "نوجوان اېکشن کمېټي شابیزۍ مندوزۍ برښور" په نوم ټولنې د اګست پر ۱۷مه په سیمه کې د وسې او پشکال د بارانونو او سېلاوونو له وجې د مڼو باغونو ته د اوښتو زیانونو په اړه د مشال راډیو تر ویډیويي رپورټ وروسته پر فېسبوک په بیان کې ویلي دي چې د ضلعې انتظامي مشر مندوزیو ته ورغلی وو او هلته یې د اوښتو زیانونو جاج واخیست.
په بیان کې راغلي دي چې ډېپټي کمېشنر هغه سیمه "سېلاب ځپلې" اعلان کړې او اوسېدونکو ته یې د تاوانونو پوره کولو ډاډ ورکړی دی.
هغې ټولنې په یوه بل بیان کې ویلي دي چې د سېلاوونو د اغېز په اړه د رپورټ په جوړولو او د خلکو ستونزې تر حکومته د رسولو لپاره د مشال راډيو خبریال صمد شبنم ته انعام ورکوي.
د مشال راډیو په رپورټ کې راغلي ول چې په وروستیو کې په مندوزیو کې راغلیو سېلاوونو د سیمې کروندګرو او باغوانانو ته لوی زیانونه اړولي دي. د پښین د کرنې ادارې سېلاوونو کروندګرو ته د شاوخوا یو نیم اربه (مېلیارده) روپیو زیانونه ور په برخه کړي دي.
