د اوکراین ولسمشر پر روسیې د اروپايي ټولنې د بندیزونو پر اووم پړاو تنقید کړی او ناکافي یې بللې دي.
وولودیمیر زیلېنسکي د جولای ۲۰مې پر شپه په ویډیويي پیغام کې وویل، "زه په صداقت خپلو شریکانو ته وایم، چې دغه بندیزونه کافي نه دي."
د جولای پر ۲۰مه د اروپايي ټولنې سفیرانو پر اوکراین د یرغل له کبله پر روسیې یولړ تازه بندیزونه منظور کړل. په هغو بندیزونو کې د روسیې د سرو زرو پر درامداتو بندیز او په اروپايي ټولنه کې د روسیې د تر ټولو ستر بینک سبېربانک د شتمنیو کنګلول شامل دي.
تر دې مخکې د نړۍ لوی اقتصاد لرونکو هېوادونو ټولنې (جي اووه) په جون کې د روسیې د سرو زرو پر درامداتو بندیز لګولی وو.
روسیې د فبرورۍ په مياشت کې پر اوکراین يرغل وکړ او تر اوسه یې خپلې جګړې ته دوام ورکړی او په ختيځ اوکراين کې یې ځينې ښارونه نيولي دي.
