د افغانستان په هلمند ولايت کې چارواکي وايي په تېرو دوو ورځو کې له کولرا ناروغۍ ۱۸ کسان مړه شوي دي.
په هلمند کې د طالبانو حکومت د عامې روغتیا رییس ډاکتر سید احمد سعید د جولای په يوولسمه، مشال راډيو ته وويل چې په تېرو دوو ورځو کې ۱۸ کسان مړه شوي او له پنځوسو زيات پرې اخته دي. هغه زیاته کړه چې د مريضانو حالت بد نه دی.
د نوموړي په خبره مړه شوي تنان د باغران ولسوالۍ دي او هڅه کېږي، چې دغه ناروغي نورو سیمو ته خپره نه شي. نوموړی وايي، په مړه شویو ماشومان، ښځې او لویان هم شامل دي.
د هلمند د روغتيايي چارواکو په وينا، له مرکز څخه دغې ولسوالۍ ته ګرځنده روغتيايي ټيمونه لېږل شوي او د ناروغانو درملنه روانه ده.
