د پاکستان کرکټ لوبډلې د درو يو ورځنيو لوبو د لړۍ په دويمه لوبه کې هم وېسټ انډيز ته ماتې ورکړه او سيريز يې په خپل نوم کړ.
پرون (د جون پر ۱۰مه) د ملتان په نړيوال کرکټ سټېډيم کې پاکستان وېسټ انډيز ته د لوبې ګټلو لپاره د ۲۷۶ منډو هدف ورکړ خو په ځواب کې وېسټ انډيز لوبډلې يوازې ۱۵۵ منډې جوړې کړې او په ۳۳م اوور کې يې ټول لوبغاړي وسوځېدل.
د پاکستانۍ لوبډلې محمد نواز چې د ۱۹ منډو په ورکولو يې څلور لوبغاړي اوټ کړل، د لوبې غوره لوبغاړی وګرځول شو.
د درو لوبو د سيريز درېيمه لوبه به سبا (د جون پر ۱۲مه) په ملتان کې کېږي چې د ځايي وخت د مازيګر پر څلور بجو پيلېږي.
تر دې وړاندې د پاکستان کرکټ ټيم د جون پر اتمه وېسټ انډيز ته په لومړۍ يوه ورځنۍ لوبه کې په پينځو ويکټونو ماتې ورکړې وه.
