د شانګلې ضلعې د لیرې پرتې سیمې سرکول غرونو په ځنګل کې د اور لګېدو له کبله د یوې کورنۍ څلور کسان وېل شوي دي.
د شانګلي بشام پوليسو مشر ډي اېس پي جهانزيب خان نن (جون څلورمه) مشال راډیو ته وویل چې تېره شپه د چکیسر تحصیل په سرکول سیمه کې په غرونو کې اور لګېدلی، چې یوه مور او د هغې درې ماشومان پکې سوځېدلي او مړه شوي دي. پوليس، د ژغورنې ادارې غړي او ځينې ځايي رضاکاران د اور وژلو لپاره تللي خو لا هم په اور وژنه کې نه دې بريالي شوي.
په دې ورستيو کې د خيبرپښتونخوا بونير، سوات، شانګلې او وزیرستان د ځينو غریيزو سیمو په ځنګلونو کې اورونه لګېدلي چې ځايي خلکو ته یې ځاني او مالي تاوانونه اړولي دي.
په عین حال کې د بونیر د ایلم غره په خواوشا سیمو کې له تیرو څلورو ورځو راهيسې اور بلېږي. ځايي چارواکي وايي چې د اور وژلو لپاره یې له پوځ څخه مرستې غوښتې دي.
بلخوا تېره مياشت (مې) د بلوچستان په شيراني ضلع کې د کسې غرونو په ځنګلونو کې د اور لګېدو له کبله د ځنغوزو او زيتون زرګونه ونې سوځېدلي او درې کسان وژل شوي ول.
