د قازقستان ولسمشر قاسم جومارت توقایېف وړاندیز کړی دی چې پر اییني اصلاحاتو دې په ټول هېواد کې ټولپوښتنه وشي.
د نوموړي دفتر ویلي، هغه دا خبره د اپرېل پر ۲۹مه پارلېمان ته په وینا کې کړې ده.
توقایېف ویلي، ښه به دا وي چې د پارلېمان پر ځای نېغ په نېغه ولس د دې اییني بدلونونو په اړه رایه واچوي.
د هغه په خبره، ټولپوښتنه د یوې مهمې جمهوري ادارې استازیتوب کوي.
د ده په وینا، په هېواد کې وروستۍ ټولپوښتنه په ۱۹۹۵ز کال کې شوې وه چې اوسنی اساسي قانون یې منظور کړی وو.
خو د قازقستان ولسمشر دا نه دي ویلي چې دا اوسنۍ ټولپوښتنه به کله کېږي.
ولسمشر قاسم جومارت توقایېف سږ کال د دې لپاره یوشمېر اییني ترامیم وړاندې کړي دي چې په پرېکړو کولو کې د مرکزي حکومت واک کم کړي.
