د افغانستان د بیارغونې لپاره د امریکا د حکومت د ځانګړي استازي دفتر وايي چې د ملګروملتونو جګپوړي چارواکي په افغانستان کې د ماشومانو د پلورلو له کبله اندېښمن دي.
سیګار پرون (د اپریل پر ۱۵مه) پر خپله ټویټر پاڼه ولیکل چې بېوزلي او بېوسي د دې باعث شوي چې ځینې کورنۍ د خپلو ماشومانو په پلور لاس پورې کړي څو د خپلو کورنیو د نورو غړو د مړولو لپاره کافي پیسې ترلاسه کړي.
د ملګروملتونو د بېلابېلو ادارو د اټکل له مخې په سلوکې څه باندې ۹۵ افغان وګړي کافي خواړه نه لري او د دې کړاو لویه برخه ماشومان او ښځې ګالي.
