د امريکا ولسمشر له هندي وزیراعظم نریندر مودي غوښتي چې له روسیې څخه دې د تیلو اخیستلو کچه نوره نه زیاتوي.
جو بايډن ويلي چې دا کار د هند په ګټه نه دی او دا اقدام د اوکراین په جګړه کې د امریکا غبرګون ته هم زیان رسولای شي.
ولسمشر بایډن، چې پر اوکراین د روسیې د برید پر وړاندې د هېوادونو د یو پراخ اېتلاف د جوړولو هڅه کوي، له وزیراعظم نریندر مودي سره يې د اپریل پر ۱۱مه تر یوه ساعت زیات وخت پورې ويډيويي خبرې وکړې.
بايډن وویل چې د روسیې د انرژۍ پر وسایلو تکیه به په نړۍ کې د هند دريځ ته ګټه ونه رسوي. د سپېنې ماڼۍ ویاندې جين ساکي هم ویلي چې ولسمشر ټرمپ د هند وزيراعظم مودي ته ویلي چې امریکا تیاره ده چې له هند سره مرسته وکړي چې خپله انرژي له بېلا بېلو منابعو ترلاسه کړي.
نوموړې زیاته کړې چې بايډن دا په ډاګه کړه چې له روسیې څخه د انرژۍ او نورو توکو په واردولو کې زیاتوالی د هند په ګټه نه دی. په داسې حال کې چې امریکا او نور هېوادونه د ماسکو د انرژۍ امدن د ختمولو هڅه کوي، هند په دې وروستیو کې له روسیې څخه د تېلو اخیستل زیات کړي او لومړي وزیر مودي د روسيې د تېلو اخیستلو د بندولو په اړه په څرګنده توګه هېڅ ژمنه نه ده کړې.
له امریکايي چارواکو سره د خبرو پر مهال وزیراعظم مودي د اوکراین وضعيت د زیاتې اندېښنې وړ وباله او وې ویل چې په دې جګړه کې د هند یو زده کوونکی هم وژل شوی دی. نوموړي زیاته کړه چې د روسيې او اوکراین له ولسمشرانو سره یې خبرې کړې او له هغوی یې د سولې غوښتنه کړې ده.
