نړیوال بانک اټکل کړی دی چې پر اوکراین د روسیې د یرغل له وجې ښايي د هغه هېواد اقتصاد شاوخوا نیمايي کم شي.
بانک د اپرېل پر ۱۰مه په خپل رپورټ کې ویلي د دې لامل دا دی چې د روسیې د یرغل له وجې لویې کارخانې او د کور جوړونې پروژې ړنګې شوې دي او مېلیونونه خلک د هېواد پرېښودو ته اړ شوي دي.
رپورټ زیاتوي چې روسیې هوايي ډګرونه او د اورګاډي پټلۍ بمبار کړې دي او ډېری پلونه یې ویجاړ کړي دي.
د نړیوال بانک په رپورټ کې اټکل شوی چې تر ۱۰ مېلیونه زیات یعنې د اورکراین د ابادۍ تقریباً څلورمه برخه وګړي د خپلو کورونو پرېښودو ته مجبور شوي او په دې کې څه د پاسه څلور مېلیونه داسې دي چې په نورو هېوادونو کې یې پناه اخیستې ده.
په رپورټ کې دا هم ویل شوي چې د لویدیځ د سختو بندیزونو له وجې به د روسیې اقتصادي وده هم ۱۱ فیصده کمه شي.
