په اسلام اباد کې بلوڅ زده کوونکو له شلو ورځو راهیسې د خپل يوه ملګري حفیظ بلوڅ د راخوشې کولو احتجاج ته دوام ورکړی.
دوی د مارچ په ۲۰مه په احتجاجي پرلت کې يوځل بيا د پاکستان له حکومته غوښتنه وکړه چې حفیظ بلوڅ دې زر تر زره خوشې شي. هغه د قايد اعظم پوهنتون زده کوونکی وو او کورنۍ یې وايي چې امنيتي ځواکونو د فرورۍ په مياشت کې د بلوچستان له خضداره بيولی وو.
تر اوسه د پاکستان پوځ په دې اړه څه نه دي ويلي خو تېره اونۍ د پاکستان بشري حقونو وزيرې شيرين مزاري مشال راډيو ته وويل چې دا د د زده کوونکو دغه پرلت ته ورغلې وه او ډاډ یې ورکړی چې انصاف به ورسره کيږي.
