د لاسرسي ځای

تازه خبر

خبرونه

شمالي وزیرستان کې د سړکغاړې چادونې یو عسکر یو وژلی دوه نور ژوبل

د شمالي وزیرستان نقشه

چارواکي وايي، په شمالي وزیرستان کې په بريدونو کې يو عسکر وژل شوی او دوه ټپيان شوي دي.

يوه امنيتي چارواکي د نوم نه ظاهرولو په شرط مشال راډيو ته وويل چې دا مرګ ژوبله د ډېسېمبر پر ۱۲مه نېټه د سپینوام اباخېل سيمه کې د سړکغاړې ښخ بمونو چاودېدو په نتيجه کې اوښتې ده. ژوبل عسکر د ميرامشا روغتون ته وړل شوی دی. تحريک طالبان پاکستان د دې بريد ذمه واري منلې ده.

تر دې وړاندې د ډېسېمبر پر ۱۲مه نېټه په ټانک کې د پوليو د واکسينو پر کمپاين شوي بريد کې يو پوليس وژل شوی وو. د ټانک تاڼې د پولیسو مشر نور اسلم د دیسمبر په دولسمه مشال راډيو ته وويل چې دا حمله په ګره ښاده سيمې کې شوې. د هغه په خبره په ډزو کې د پوليو کارکوونکو ته څه زیان نه دی اوښتی خو هغوی سره د امنيت لپاره موجود سپاهي وژل شوی دی. تر اوسه چا د دې حملې زمه واري نه ده منلې.

دا په ټانک کې په دوو ورځو کې د پوليو واکسينو په ساتونکو پوليسو دوهم برید دی. د دیسمبر پر ۱۱ هم يو پوليس والا وژل شوی او بل زخمی شوی وو چې زمه واري یې تحريک طالبان پاکستان منلې وه.

د نننۍ ورځې ټول خبرونه وګورئ

پوتین: لویدیځو هېوادونو د ماسکو امنیتي اندېښنې له پامه غورځولي

د ارشیف انځور

د روسیې ولسمشر ولادیمیر پوتين ویلي، غربي هېوادونو د ناټو سازمان پر پراخېدو د ماسکو امنیتي اندېښنې له پامه غورځولي دي.

دا له هغې وروسته ده چې امریکا له روسیې څخه یو ځل بيا د اوکراین له پولو سره نېږدې سیمو نه د روسي عسکرو د ویستلو غوښتنه کړې ده. دا په داسې حال کې ده چې هلته د پوځیانو ځای پر ځای کولو پر اوکراین د حملې وېره پېدا کړې ده.

د جنورۍ پر ۲۸مه پوتين له خپل فرانسوي سیال ايمانيول مېکرون سره په ټېلیفوني خبرو کې ویلي چې روسیه به په احتیاط سره ماسکو ته د امنیتي ضمانتونو د غوښتنو په اړه د امریکا او ناټو لخوا لیکلي ځوابونه مطالعه کوي او له هغې وروسته به د کوم ګام پورته کولو فېصله کوي.

روسیه د اوکراین د کړکېچ کمولو په بدل کې له غرب څخه د امنیتي ضمانتونو غوښتنه کوي، خو د جنورۍ پر ۲۶مه امریکا او ناټو د ماسکو دا غوښتنې رد کړې.

ناټو دا هم ویلي چې د اتحادیانو لخوا په ختيځه اروپا کې د عسکرو او پوځي وسايلو ځای پر ځای کول هم د خبرو وړ نه دي.

د ناټو مشر ینز ستولتنبرګ د جنورۍ پر ۲۸مه د اېټلانټک شورا فورم ته په خپله وېنا کې وویل دغه اتحاد د اوکراین د کړکېچ پر مهال روس ته د خپل هوډ ثابتولو لپاره په ختيځه اروپا کې خپلې موجودګۍ زیاتولو ته تیار دی.

خو دا یادونه یې هم وکړه چې په دې وخت کې دوی د روس لخوا پر اوکراین د حملې په اړه په یقین سره څه نه شي ویلای.

د خوړو نړیوال پروګرام: افغانستان کې ۲۳ ملیونه وګړي بشري مرستو ته اړتیا لري

ملګري ملتونه وايي، پر افغانستان د طالبانو له واکمنۍ راهېسې بشري بحران په زیاتېدو دی: د ارشیف انځور

د ملګرو ملتونو د خوړو نړیوال پروګرام (ډبلیو اېف پي) وايي، په افغانستان کې ۲۳ ملیونه وګړي، د روان ژمي پر مهال بېړنيو بشري مرستو ته اړتیا لري.

د دغه سازمان د افغانستان څانګې د جنورۍ پر ۲۸مه، پر خپله ټویټر پاڼه لیکلي چې د خوړو د نړیوال پروګرام د نورو همکارو سازمانونو په مرسته خوراکي توکي وېشي خو دا وېره یې هم ښودلې چې که چرې خلکو ته په وخت خوراکي توکي او نورو ضروري سامانونه ونه رسېدل نو دا به روان حالات نور هم خراب کړي.

له هغې ورسته چې طالبانو د ۲۰۲۱ کال د اګست په نیمايي کې پر کابل کنټرول تر لاسه کړ، د ملګرو ملتونو په ګډون ګڼو نړیوالو سازمانونو په افغانستان کې د بشري بحران د پراخېدو خبرداری ورکړی دی.

میرلي کې د روغتیا څانګې یو کارکوونکی وژل شوی

د شمالي وزيرستان په میرلي ایدک سيمه کې نامعلومه وسله والو د روغتيا څانګې یو کارکوونکی په ډزو وژلی او تر برید وروسته تښتېدلي دي.

پوليس چارواکي وايي چې پر شاه نیاز باندې د تورو ښيښو په یوه ګاډي کې ناستو کسانو بريد وکړ چې دوی يې د لټون عمليات پيل کړي دي.

دا په شمالي وزیرستان کې په روان ۲۰۲۲ز کال کې دويم هدفي بريد دی. هلته پروسږکال ۶۳ هدفي بریدونه شوي ول چې زياتره يې په میرلي کې رپورټ شوي دي.

که څه هم په شمالي وزيرستان کې په ۲۰۱۴ز کال کې د پاکستان پوځ عمليات وکړل او وروسته يې سيمه له وسله والو پاکه اعلان کړه خو له تېرو دريو کلونو راهيسې هلته هدفي وژنې پیل شوې چې تر ننه دوام لري. په نښه شوي زیاتره ولسي وګړي دي او کله هم چا د دوی د وژلو ذمه واري نه ده منلې.

ځايي خلک وايي چې وسله وال بيا منظم شوي دي. دوی په سيمه کې د هدفي وژنو او ناامنۍ پرضد په وار وار مظاهرې، پرلتونه او احتجاجي جلسې هم کړې دي، خو حکومت وايي چې هلته يې د وسله والو پرضد ځانګړي عمليات پیل کړي دي.

د ۱۹ کلنو کرېکټ نړیوال جام کې افغانستان نیمه پایلوبې ته ووت

د افغانستان د کرکټ د ۱۹کلنې لوبډلې ارشیف انځور

د ۱۹ کلنو کرېکټ نړیوال جام سياليو کې افغانستان سريلنکا ته په ماتې ورکولو سره نيمه پايلوبې يا سيمې فاينل ته ووت.

د جنورۍ پر ۲۷مه، د دې يو ورځنيو يا ۵۰ اووريزه سياليو په کوارټر فاينل کې لومړی افغانستان بېټينګ وکړ او په ۴۸م اوور کې يې د ټولو لوبغاړو په ورکولو سره ۱۳۴ منډې جوړې کړې.

په ځواب کې د سريلنکا ټوله لوبډله په ۴۶ اوورونو کې د ۱۳۰ منډو له جوړولو وروسته وسوځېدله. اوس به افغانستان د فېبرورۍ پر لومړۍ نېټه له انګلېنډ سره په سېمي فاينل کې مخامخيږي.

بلخوا د جنورۍ پر ۲۸مه، په يو بل کوارټر فاينل کې پاکستان د اسټراليا پر وړاندې لوبه کوي. د ۱۹ کلنو کرېکټ نړيوال جام سيالۍ د وېسټ انډيز په کوربتوب کرابين هېوادونو کې د جنوري پر ۱۴مه پيل شوې چې پايلوبه به يې د فېبرورۍ پر پينځمه کېږي.

بلېنکن: پر اوکراین یرغل روسیه له سختو پایلو سره مخامخولی شي

روسيې د اوکراين پولو ته نېږدې سيمو کې تر يو لک زيات سرتېري او ډېر پرمختللي پوځي وسايل ځای پر ځای کړي دي. انځور له ارشیفه اخېستل شوی

د امریکا د بهرنیو چارو وزیر ويلي، که روسیه پر اوکراین د یرغل لاره انتخاب کړي نو له سختو پايلو سره به مخامخ شي.

اینتني بلېنکن دا څرګندونې د جنورۍ پر ۲۷مه له ازادي اروپا راډیو سره په ځانګړې مرکه کې وکړې.

نوموړي پر مسکو غږ وکړ چې له اوکراین او لویدیځ سره د روان کړکېچ د پای ته رسولو لپاره دې له ډېپلوماسۍ څخه کار واخلي."موږ هر هغه لازم اقدام کوو چې مسکو ته دا روښانه کړو چې هغه دوې لارې لري: یا د ډيپلوماسۍ او مذاکراتو لاره چې اختلافونه له سوله ییزې لارې حل شي او یا د یرغل لاره، او که چيرې د يرغل لاره غوره کړي نو له سختو عواقبو سره به مخامخ شي. او موږ هرې لارې ته بشپړ چمتووالی نيسو."

نوموړي زياته کړه چې واشنګټن لاهم نه پوهېږي چې د اوکراين او د اروپا د امنیتي جوړښت په هکله د کریملين وروستۍ پرېکړه څه ده. د هغه په وينا، "په دې اړه يوازې يو سړی تاسو ته ويلای شي او هغه د روسيې ولسمشر ولاديمير پوتين دی."

بلېنکن دا څرګندونې یوه ورځ وروسته له هغه کوي چې واشنګټن د روسیې هغو ګواښوونکو غوښتنو ته په ليکلې بڼه خپل رسمي ځواب وړاندې کړ چې تېره مياشت يې د دوو لوظنامو د مسودو په بڼه خپرې کړې وې.

روسيې د دغو غوښتنو تر څنګ د اوکراين پولو ته نېږدې سيمو کې تر يو لک زيات سرتېري او ډېر پرمختللي پوځي وسايل ځای پر ځای کړي دي.

مسکو په خپلو دوو اسنادو کې د اروپا په امنیتي جوړښت کې د پراخ بدلون غوښتنه هم کوي او غږ يې کړی چې ناټو دې د اوکراین او جورجيا په څېر د پخواني شوروي اتحاد جمهوریتونو ته پر غړیتوب ورکولو بنديز ولګوي او خپل ځواکونه او وسلې دې بېرته د ختيځې اروپا هغو سیمو ته په شا کړي چې تر سړې جګړې وروسته په ۱۹۹۹ز کال کې د ناټو له پراختیا مخکې ځای پرځای شوي ول.

د پاکستان سپر ليګ کرکټ لوبې پيل شوې

د پي ایس ايل د ۲۰۲۰ کال د يوې لوبې تصوير

د شل اوریزه کرکټ‌ ټورنمنټ، پاکستان سپرليګ يا پي ايس ايل لوبې د جنورۍ په ۲۷مه پيل شوې.

لومړی مېچ نن د ملتان سلطانز او کراچي کینګز ترمنځ دی چې په کراچۍ کې کيږي.

د جنورۍ په ۲۸ د دې ټورنمنټ دوهم مېچ د پېښور زلمي او کوټه ګلېډېټرز ترمنځ دی.

د ۳۴ مېچونو دا ټورنمنټ چې پکې شپږ لوبډلې برخه اخلي، فاېنل مېچ يا پای لوبه به يې په ۲۷ فرورۍ وي. پروسږکال په جون مياشت کې شوي د شپږم پاکستان سپر ليګ فاينل مېچ ملتان سلطانز ګټلی وو.

د اردن پوځ ۲۷ مشکوک قاچاقبر وژلي دي

په سرحدي سيمو کې پر ګزمه بوخت، اردني پوځيان

د اردن پوځ وايي هغه ۲۷ مشکوک قاچاقبران یې وژلي چې له ګاونډي شام څخه یې هلته د نشه يي موادو د لېږد هڅه کوله.

د جنورۍ په ۲۷مه د پوځ پر ویبپاڼه خپاره شوي بيان کې راغلي چې له شامه یې اردن ته د اېمفېټامین یا کیپټاګون په نوم د نشه يي موادو د قاچاق هڅې شنډې کړې دي. بیان زیاتوي چې قاچاقبرانو نشه يي توکي په هغو شامي لاریو کې پټ کړي ول چې د پولې پر عمومي لارې اردن ته ځي.

د پوځ په وينا روانه میاشت یې له مشکوک قاچاقبرانو سره شامۍ پولې ته څېرمه په نښته کې یو سرتېری وژل شوی وو.

د اردن او شام ترمینځ پوله په اسانۍ د تېرېدو وړ ده. اردني چارواکي تور پورې کوي چې د ایران ملاتړ لرونکې لبنانۍ شیعه ډله حزب الله او ملېشې په زیاتېدونکي قاچاق کې ککړ دي. دغه ډله د شام زیاتره جنوبي برخې کنټرولوي. خو حزب الله دا تورونه ردوي.

د ملګرو ملتونو د نشه يي موادو د چارو پوهان وايي، شام په سیمه کې د کیپټاګون د پیداوار مهم مرکز ګرځېدلی دی. په هغه سیمه کې د یادو نشه يي موادو بازار په پراخېدو دی او اردن، عراق او اروپا ته هم قاچاقېږي.

د کورونا وایرس اوميکرون بڼې پر ضد د نوو واکسینو ازموینې پيل شوې

د ايټلي په روم کې يوې مېرمنې ته د ماډرنا واکسین کيږي

امریکايي شرکت ماډرنا وايي چې د کورونا وایرس د نوې اومېکرون بڼې لپاره یې د یوه واکسین ازموینې پیل کړې دي.

دغه شرکت دا اعلان د جنورۍ په ۲۶مه تر هغې یوه ورځ وروسته وکړ چې فایزر او بایواېنټېک شرکت هم د اومېکرون بڼې پر وړاندې د مقاومت په موخه د واکسین د ازموینو پیلولو اعلان وکړ.

ماډرنا ویلي، د دویمې مرحلې په ازموینه کې به هغو بالغانو ته د وایرس د اومېکرون بڼې لپاره د ځانګړي واکسین اضافي ستن لګوي چې وار له مخه په تېرو لږ تر لږه شپږو میاشتو کې بشپړ واکسین شوي دي.

یوه بله ډله بالغان چې درېیمه اضافي ستن یې لګولې، به د اومېکرون بڼې لپاره د واکسینو څلورم خوراک اخلي. په دې ډول به د اومېکرون بڼې په نښه کوونکی دا واکسین د درېیم او څلورم خوراک په توګه ارزول کېږي. اصلي واکسینونه خلک له مړینې او سختې ناروغۍ څخه په ښه ډول ساتي خو هومره موثره نه دي چې په تېزۍ په خپرېدونکې اومېکرون بڼې د خلکو د وړجنېدو مخه ونیولای شي.څېړنې ښيي چې اضافي ستن د خلکو تحفظ لا قوي کوي.

ماډرنا شرکت په نیو انګلېنډ طبي ژورنال کې د خپرې شوې وړې څېړنې پایلې هم اعلان کړې چې پکې راغلي چې تر اضافي ستن شپږ میاشتې وروسته په وجود کې د اومېکرون بڼې پروړاندې پیدا شوې کیمیاوي مادې خورا کمېږي خو په بدن کې موجودې وي. څېړنه ښيي چې د درېیم خوراک له وجې د شپږو میاشتو په موده کې خلک په ښه ډول له وایرسه خوندي وي.

ګوتېرش: افغانستان په يوه نري تار ځوړند دی 

د ملګرو ملتونو سرمنشي انتونیو ګوتېرش

د ملګرو ملتونو سرمنشي انتونیو ګوتېرش د جنورۍ پر ۲۶مه د م م پر امنیت شورا د هغه قوانينو او عملياتو د ځنډولو غږ وکړ چې د نړيوالې ټولنې له خوا افغانانو ته د بېړنیو مرستو رسولو مخه نيسي.

ګوتېرش د افغانستان په اړه د امنیت شورا غونډې ته په وينا کې وويل چې ''افغانستان په يوه نري تار ځوړند دی'' او په دې سختو شېبو کې بايد ټولو قوانینو ته له سره جدي کتنه وشي.

نوموړي پر غړو هېوادونو غږ وکړ، هغه اجازتنامې دې جاري کړي چې د بشري مرستو رسولو لپاره کارېږي.

د پروسږ کال د اګست په نیمايي کې پر افغانستان د طالبانو له واکمنېدو راهیسې په هغه هېواد کې بشري وضعیت په چټکۍ خراب شوی دی.

د ملګرو ملتونو له یوه اټکل سره سم، اوسمهال شاوخوا ۲۳ مېلیونه افغانان د خوړو له کمښت سره مخامخ دي او تر اته نیم مېلیونه زیات کسان قحطۍ ته نېږدې شوي دي.

ملګرو ملتونو د جنورۍ په پیل کې د روان کال پرمهال د افغانستان لپاره د ۴.۴ اربه ډالرو د بشري مرستو غوښتنه کړې ده. خو دې ادارې د جنورۍ پر ۲۶مه وویل، د روغتیا، تعلیم، بېخبنا او نورو ټولنیزو اړتیاو لپاره د اضافي ۳.۶ اربه ډالرو ضرورت دی.

د لاهور پوليس وايي، د خبریال حسنېن شاه په وژنه تورن کسان يې نيولي

پوليس وايي، د حسنېن په وژنه تورن موټر سايکل سپاره کسان يې مخکې نيولي ول او د هغوی د معلوماتو له مخې يې مرکزي ملزم عامر بټ هم په لاهور کې ګرفتار کړ.

د پنجاب مرکز لاهور کې پوليس وايي،د خبریال حسنېن شاه په وژنه تورن کسان يې نيولي دي.

د جنورۍ پر ۲۴مه ماښام مهال نامعلومه موټر سايکل سپرو کسانو لاهور پرېس کلب ته نېږدې د پاکستان له يوه شخصي ټېليويژن کېپيټل نيوز سره کارکوونکی خبريال حسنېن شاه په ډزو وواژه او د پېښې له ځایه وتښتېدل.

پوليسو د جنورۍ پر ۲۶مه رسنيو ته ويلي چې د حسنېن په وژنه تورن موټر سايکل سپاره کسان يې مخکې نيولي ول او د هغوی د معلوماتو له مخې يې مرکزي ملزم عامر بټ هم نن په لاهور کې ګرفتار کړ.

پوليس وايي، د بټ په لارښوونه د هغه کارکوونکو د حسنېن شاه پر موټر ډزې کړې وې او هغه يې وژلی وو.

د حسنېن شاه له وژل کېدو وروسته یو شمېر قهرجنو خبریالانو په لاهور کې لاریون وکړ، د هغه وژل یې وغندل او د عاملانو د نیولو غوښتنه یې وکړه.

په پاکستان کې خبریالان له اوږدې مودې راهیسې په حملو کې په نښه شوي دي.

د خبریالانو د ژغورنې او د خبريالانو نورو نړيوالو ادارو پاکستان يو له هغو هېوادونو بللی چې د خبريالانو لپاره خوندي نه دي.

خاقان عباسي: د عمران خان په حکومت کې درغلي زیاته شوې

د پاکستان پخوانی وزیراعظم او د مسلم لیګ نواز ډلې یو مشر شاهد خاقان عباسی خبري غونډه کوي: تصویر له ارشیفه

په پاکستان کې حکومت مخالفه ګوندونو ويلي چې د پاکستان تحريک انصاف په مشرۍ وفاقي حکومت د درغلۍ بېساري کچې ته رسېدلی دی.

دغو ګوندونو دا خبرې تر هغه وروسته کړي چې د جنورۍ پر ۲۵مه د روڼتيا نړيوال سازمان په خپل کلني راپور کې په ډاګه کړه چې پاکستان د نړۍ يو له هغو هېوادونو څخه دی چې د پخوا پرتله درغلي پکې زياته شوې ده.

د پاکستان پخواني وزیراعظم او د مسلم لیګ نواز ډلې یو مشر شاهد خاقان عباسی د جنورۍ پر ۲۵مه په اسلام اباد کې يوې خبرې غونډې ته وويل: ((دا یوه قومی غمیزه ده. دا وړه خبره نه ده چې د حکومت څلور کاله په پوره کېدو دي، خو په کرپشن کې پرلپسې اضافه روانه ده. موږ چې په ۲۰۱۸ز کال کې حکومت پرېښی وو، دا نمبر ۱۱۷م وو.))

روڼتيا نړيوال سازمان پخپل راپور کې ويلي چې د ۲۰۲۱ز کال په درجه بندۍ کې پاکستان ۱۴۰مې درجې ته رسېدلی دی چې زيات کرپشن ورڅخه څرګندېږي.

بلخوا د پاکستان د اطلاعاتو وزير فواد چودري پرون په اسلام اباد کې يوې خبرې غونډې ته وويل چې د پاکستان درجه د مالي درغلیو له وجې نه بلکې د رياستي عملدارۍ او د قانون د حاکميت د کموالي له وجې شاته تللې ده.

لاهور کې یو خبریال حسین شاه په ډزو ووژل شو

د پاکستان نقشه

یو پاکستانی خبریال حسین شاه چې له یوه سیمه ییز ټېلیوېژن سره یې کار کاوه بېګاه شپه د پاکستان په لاهور ښار کې په ډزو ووژل شو.

پولیسو وویل، دوه وسله وال چې پر یوه موټر سایکل سپاره و، پر حسین شاه د لاهور پرېس کلب ته نژدې ډزې وکړې او د پېښې له ځایه وتښتېدل.

د پولیسو یوه جګپوړي چارواکي صفدر رضا کاظمي وویل، په دې اړه چې نوموړی د چا له خوا وژل شوی؟ څېړنه کوي.

تراوسه چا یا کومې ډلې د هغه د وژلو مسولیت نه دی اخیستی.

د حسین شاه له وژل کېدو وروسته یو شمېر قهرجنو خبریالانو په لاهور کې لاریون وکړ، د هغه وژل یې وغندل او د عاملانو د نیولو غوښتنه یې وکړه.

د پاکستان د خبریالانو ټولنې په ټول هېواد کې د مظاهرو غوښتنه کړې ده.

په پاکستان کې خبریالان له ډېرې مودې راهیسې په حملو کې په نښه شوي.

دا هېواد د خبریالانو د خوندیتوب د نړیوالې کمېټې او د نړیوال معافیت انډېکس له خوا په نړۍ کې نهم هېواد بلل شوی چې په کې په منظم ډول خبریالان وژل کېږي او قاتلان یې ازاد ګرځي.

پاکستان کې کورونا وړجني بیا په زیاتېدو دي

حکومت ویلي، د ګڼې ګوڼې په ځايونو کې د خلکو پر راغونډېدو بنديزونه لګول شوي دي

په پاکستان کې له تېرې يوې اوونۍ راهيسې هره ورځ د کورونا وايرس له۶،۰۰۰ څخه زيات مثبت کېسونه مخې ته راځي چې ورسره په هغه هېواد کې د وبا له پيل راهيسې د ټولو وړجنو کسانو شمېر ۱۳ لکه ۸۱ زره ته رسېدلی دی.

د کورونا وايرس په اړه حکومتي وبپاڼې د جنورۍ پر ۲۵مه ويلي چې په تېرو ۲۴ ساعتو کې له ۶،۳۰۰ زياتې تازه پېښې ريکارډ شوي او له کوويډ-۱۹ ناروغۍ ۱۷ کسان مړه شوي هم دي، چې ورسره په هېواد کې له يادې ناروغۍ څخه د مړو شويو رسمي شمېر ۲۹،۱۲۲ ته رسېدلی دی.

د وېبپاڼې په وينا، په پاکستان کې تر ۱۲ لکه ۷۰ زره پورې کسان له کورونا وايرسه رغېدلي هم دي.

بلخوا په هغه هېواد کې د کورونا وايرس واکسين ورکولو بهير هم دوام لري.

د کورونا وايرس د څار ملي اداري (نيشنل کمانډ اېنډ اپريشن سېنټر) پر وبپاڼه ليکلي چې د جنورۍ تر ۲۵مې په ټول هېواد کې شاوخوا اته کروړه کسان بشپړ واکسين شوي دي.

د افغانستان پر حالاتو د ملګرو ملتونو امنیت شورا غونډه

د ملګرو ملتونو د امنیت شورا

ټاکل شوې چې د ملګرو ملتونو د امنیت شورا د جنورۍ پر ۲۶مه د افغانستان د روان وضعیت په اړه غونډه وکړي.

د افغانستان لپاره د ملګرو ملتونو مرستندویه ماموریت یوناما د جنورۍ پر ۲۵مه په یوه خبرپاڼه کې ویلي چې دا غونډه به د افغانستان پر وخت د ماښام ۷ نیمې بجې پیل شي.

یوناما ویلي چې د ملګرو ملتونو سرمنشي انتونیو ګویتېرېش، د افغانستان لپاره د ملګرو ملتونو د سرمنشي ځانګړې استازې ډیبرا لاینز او د ناروې د بهرنیو چارو وزیره انیکین هویتفیلډ به هم د امنیت شورا دې غونډې ته معلومات وړاندې کړي.

ناروې چې د افغانستان په اړه د یکشنبې له ورځې راهیسې د درې ورځنۍ غونډې کوربه دی، په اوس وخت کې د ملګرو ملتونو د امنیت شورا دوره یي مشري په غاړه لري.

دې غونډې ته د طالبانو د حکومت یوپلاوی، د لویدیځو هېوادونو استازي او د ښځو په ګډون د افغاني ټولنې مختلف قشرونه وربلل شوي دي.

کرکټ: افغان لوبډلې بیا هالینډ ته ماتې ورکړه

د کرکټ افغانه لوبډله - انځور له ارشیفه

د افغانستان د کرکټ ملي ټيم د یکشنبې پر ورځ د هالیند له ټیمه په دویم ځل هم لوبه وګټله او نړیوال جام ته د تللو لپاره یې سکور ۲۰ ته ورسېد.

د کرکټ بورډ ویاند فرید هوتک په اړه مشال راډیو ته وویل، "د کرکټ ملي ټیم نېدرلینډز (هالینډ) ته د دوو پرله پسې ماتې ورکولو سره د دې لوبو جام وګاټه. دا لوبې خورا مهمې دي ځکه له همدې لوبو څخه ټیمونه کولای شي نېغ په نېغه نړیوال جام ته لار پیدا کړي. له نېدرلینډز سره د افغانستان د ملي ټيم راتلونکې او وروستۍ لوبه د جنورۍ پر ۲۵مه ترسره کېږي."

د ۲۰۲۳ کال د نړیوال جام د لارې موندنې امتیازي لوبې د افغانستان او هالینډ ترمينځ د قطر په پلازمېنې دوحې کې روانې دي.

د جنورۍ ۲۳مې په لوبه کې افغانستان د ۶ لوبغاړو په سوځېدو ۲۳۷ منډې وکړې او سیال ټيم یې په ۱۸۹ منډو اوټ کړ.

د افغانستان لپاره په دې لوبه کې رحمان الله ګربز سلیزه ووهله، کپتان حشمت الله شهیدي ۵۰ منډې وکړې او په بالنګ کې مجیب الرحمان ۴ وېکټې واخیستې.

د خیبر پښتونخوا ۱۹ ضلعو کې د ګوزڼ واکسیني بهیر پیل شو

یوه روغتیاپاله په پېښور کې یو ماشوم ته د پولیو واکسیني څاڅکي ورکوي - انځور له ارشیفه.

د خیبر پښتونخوا حکومت وايي، "په کلک امنیت" کې یې د صوبې په ۱۹ ضلعو کې د ګوزڼ اووه ورځنی کیمپېن پیل کړی دی.

د صوبې چیف سېکرټر ډاکتر شهزاد خان بنګښ د جنورۍ پر ۲۴مه په پېښور کې د کیمپېن پیلولو پرمهال وویل چې تر ۳۴ لکه زیاتو ماشومانو ته به د پولیو څاڅکي ورکوي.

تر دې مخکې د جنورۍ پر ۱۷مه د صوبې په شپږو ضلعو کې تر پینځو کلونو پورې عمر لرونکو ماشومانو ته د څاڅکو ورکولو بهیر پیل شوی وو.

د پولیو د کنټرول اداره وايي، په بنو او ټانک کې یې د ناروغۍ د وایرس تر موندلو وروسته د واکسیني بهیر پیلولو پرېکړه وکړه.

د واکسیني کیمپېن په لومړي پړاو کې د خیبر پښتونخوا بنو، لکي مروت، ټانک، ډېره اسماعیل خان، شمالي وزیرستان او جنوبي وزیرستان شامل ول.

د خیبر پښتونخوا حکومت وايي، په روان بهیر کې تر ۱۴،۰۰۰ زیات روغتیاپالان کور په کور ګرځي او ماشومان واکسینوي. د بنګښ په وینا، روغتیاپالان به د بسونو په اډو او د روغتیا په مرکزونو کې هم ماشومانو ته څاڅکي ورکوي.

دی زیاتوي، د روغتیاپالانو د امنیت لپاره یې تر ۲۲،۰۰۰ زیات پولیس سرتېري ځای پر ځای کړي دي.

په پاکستان کې د پولیو ناروغۍ ختمولو لپاره کارکوونکې اداره (اېنډ پولیو اېن پاکستان) وايي، په ۲۰۲۱ز کال کې په ټول هېواد کې د ناروغۍ یوه پېښه ثبت شوې وه. د هغې ادارې په خبره، وایرس په بلوچستان کې یو ماشوم معذوره کړی وو.

د ادارې په وینا، په تېره شاوخوا یوه لسیزه کې د پولیو کیمپېنونو پرمهال په وسله والو بریدونو کې لسګونه روغتیاپالان او پولیسان وژل شوي دي.

پاکستان او افغانستان د نړۍ یوازیني هېوادونه دي چې پکې د پولیو وایرس او ناروغي لا هم موجوده ده.

د خیبر میدانک غره کې په واورو کې ګېر ۱۱ ماشومان وژغورل شول

د پاکستان په یوشمېر سیمو کې په جنورۍ کې بارانونه او واوره وشوه - انځور له ارشیفه

د خیبر انتظامیه وايي، په میدانک غره کې یې په واورو کې ګېر ۱۱ ماشومان ژغورلي دي.

د خیبر د ژغورنې ادارې (رېسکیو ۱۱۲۲) ویاند مقصود عالم د جنورۍ پر ۲۳مه شپې ناوخته مشال راډیو ته وویل چې ماخوستن مهال یې د پولیسو په مرسته ماشومان وژغورل او خپلو کورنیو ته یې وسپارل.

دی وايي، د ټولو ماشومانو روغتیايي حالت ښه دی. د عالم په وینا، په ماشومانو کې یې څلور له ۱۸ کلونو کم عمر لرونکي دي پاتې یې تر ۱۰ کلونو پورې عمر لري.

د ده په خبره، ماشومان په چکر غره ته تللي ول خو هلته د موسم خرابوالي او لړې له وجې ورڅخه لار ورکه شوه او په واوره کې بند پاتې شول.

عالم زیاتوي چې ماشومانو پر ټولنیزو شبکو یوه ویډیو خپره کړه او د مرستې غوښتنه یې وکړه چې تر هغې وروسته پولیس او د ژغورنې ادارې کارکوونکي ورغلل.

دا په داسې حال کې ده چې په خیبر پښتونخوا کې چارواکي‌ وايي چې په صوبه کې د بارانونو روانې څپې لږ تر لږه اووه کسان وژلي او په لسګونو کورونو ته یې زیان اړولی دی.

د سرکاري امدادي ادارې (رېسکیو ۱۱۲۲) صوبايي ویاند بلال فیضي د جنورۍ پر ۲۳مه مشال راډیو ته وویل، د بارانونو له امله له ۱۵ زیات کسان ژوبل شوي هم دي. د هغه په وينا، تر ټولو ډېر زیان په شانګله کې خلکو ته اوښتی. "اوسنيو بارانونو په خیبر پښتونخوا کې اووه کسان وژلي دي. له ۱۵ څخه ډېر ژوبل دي. تر ټولو لويه پېښه په شانګله کې د [کمر نړېدو] وه چې خلک یې لاندې کړي ول."

فیضي زیاتوي، د شانګلې د پېښې له ځایه یې پینځه مړي او څلور ژوبل کسان راایستلي ول.

د خيبر پښتونخوا حکومت وار له مخه خبرداری ورکړی وو چې بارانونه په غرنيو سيمو کې ويجاړی رامنځته کولی شي.

د موسمياتو محکمې ويلي ول چې د جنورۍ تر ۲۴مې پورې په ځينو ځايونو کې د ‌ډېرې واورې کېدو امکان دی.

په هرات کې چاودنې ۷ کسان وژلي دي

چاودنه پر يو مسافر وړونکي موټر شوې ده

د افغانستان په هرات ښار کې یوې چاودنې ۷ ولسي وګړي وژلي او لس نور یې ټپي کړي دي.

په هرات کې د طالبانو د استخباراتو یوه مشر ثابت هروي د جنورۍ په ۲۲مه مشال راډیو ته وویل چې چاودنه ماښام مهال پر یوه مسافر وړونکي موټر د مقناطیسي بم په وسیله شوې ده.

د دې ولايت د سیمه ییز روغتون چارواکو مشال راډيو ته ويلي‌چې دوی ته ۷ مړي او نهه ژوبل کسان وروړل شوي دي. دا چاودنه په حاجي عباس محله کې شوې چې تر ډېره پکې شيعه ګان مېشته دي.

د روغتون یو چارواکي د نوم نه ښودلو په شرط مشال راډیو ته ویلي چې په وژل شویو کې ۴ ښځې او ۳ نارینه دي. تر اوسه چا د دې حملې ذمه واري نه ده منلې.

په قزاقستان کې۴۰۰ کسان بنديان شوي دي

قزاقستان: امنيتي ځواکونه لا هم په ځينو ښارونو کې ګزمې کوي

د قزاقستان چارواکي وايي تر څلور سوه زیات کسان د ترهګرۍ او ولسي ګډوډۍ رامنځ ته کولو په تور بندیان دي.

د دې هیواد د لوی څارنوال د دفتر ویاند د جنورۍ په ۲۲مه ویلي چې شاوخوا پنځه سوه نور کسان په لږ جدي تورونو، لکه غلاوې، ګډوډ چلند او د وسلو پر ښودلو بندي دي.

یو شمېر خلاص شویو بندیانو تور پورې کړی چې دوی د بند پر مهال ځورول شوي وو.

دا له هغه وروسته ده چې د جنورۍ میاشتې په پیل کې د روس په مشرۍ ځواک د دې لپاره قزاقستان ته ور وبلل شو چې د ولسي ناارامۍ مخه ونیسي. دا نا ارامي لومړی د تېلو په قېمتونو کې د زیاتوالي له کبله له راپورته شوي احتجاجه پیل شوې وه.

په کوهاټ کې چاودنې ۴ کسان وژلي

د کوهاټ نقشه

د خیبر پښتونخوا د کوهاټ په پخوانۍ قبايلي سيمه جواکي کې چاودنې څلور تنه وژلي دي.

د کوهاټ پولیسو د جنورۍ په ۲۳مه مشال راډيو ته وويل چې دا چاودنه د جنورۍ ۲۲مې په ماښام په ګلوتنګ سیمه کې د شپونکیو په يوې جونګړې کې شوې ده.

د پولیس په وینا، دې شپونکیو مارټر توغندی میندلی وو او هغه یې کور ته راوړی وو چې له کبله یې چاودنه شوې ده. د دوی په وینا، وژل شوي کسان د مانسهرې دي.

شانګله: د کمر نړېدو له وجې شپږ کسان مړه او ژوبل

په عین حال کې درې کسان لا ورک دي او د ملبې لاندې دي چې ژغورنکي ادارې یې د راویستو هڅې کوي.

د خېبر پښتونخوا چارواکي وايي، د سوات د شانګلې ضلعې د مټه خان تحصیل په الپورۍ کې د کمر نړېدو له کبله د درو کورونو راپرېوتو پېښه کې دوه ماشومان مړه شوي دي.

د شانګلې د بيړنيو حالاتو ادارې، ريسکيو۱۱۲۲ د جنورۍ پر ۲۱مه په یوه خبرپاڼه کې ويلي چې د جنورۍ پر ۲۱مه، ماښام په رامنځ ته شوې پېښه کې د درو ښځو په ګډون څلور کسان ټپیان شوي هم دي.

په عین حال کې درې کسان لا ورک دي او د ملبې لاندې دي چې ژغورنکي ادارې یې د راویستو هڅې کوي.

د جنورۍ پر ۲۱مه، ماښام د بارانونو او واورې ورېدو له وجې په کوزه الپورۍ کې پر درو کورونو کمر راپریوتی.

چارواکي وايي چې د کمر په نړېدو سره د شانګلې او بیشام مرکزي سړک هم بند دی او د خلاصولو کوششونه یې روان دي.

بلېنکن: مسکو دې د خپل نفوذ په کارولو ایران د خبرو مېز ته راولي

بلېنکین پر روسیې ټينګار وکړ چې پر ايران د خپل نفوذ په کارولو سره د تهران مشرتابه ژر د خبرو مېز ته راولي.

د امریکا د بهرنیو چارو وزیر انتوني بلېنکن وايي، له خپل روسي سیال سرګي لاوروف سره د جنورۍ پر ۲۱مه په کتنه کې یې د ایران اټومي موافقې د راژوندي کولو په هدف پر نړیوالو هڅو خبرې وکړې.

دا په داسې حال کې ده چې په دې باب د وخت تېرېدو او د مذاکراتو يوې بريالۍ نتيجې ته د نه رسېدو په اړه اندېښنې دي.

بلېنکین د جنورۍ پر ۲۱مه په جنیوا کې له لاوروف سره تر کتنې وروسته خبریالانو ته وویل چې د دې موافقې د راژوندي کولو لپاره سفارتي هڅې یو مثال دی چې ګواکې واشنګټن او مسکو کولای شي پر امنیتي مسایلو په ګډه کار وکړي.

بلېنکن خپل خبرداری تکرار کړ چې د موافقې د ژغورلو او یوې بريالۍ نتیجې ته د رسېدو لپاره د مذاکراتو یوه ډېره لنډ مهاله موقع پاته ده.

نوموړي پر روسیې ټينګار وکړ چې پر ايران د خپل نفوذ په کارولو سره دې د تهران مشرتابه ژر د خبرو مېز ته راولي.

دا په داسې حال کې ده چې د امريکا پخواني ولسمشر ډونلډ ټرمپ د ۲۰۱۸ز کال په مې مياشت کې امريکا له دې تړونه ووېسته او ویې ویل چې خبرو ته اړتيا ده او له سره بيا پرې خبرې وشي. د دې ترڅنګ پر ايران يې بنديزونه لګول هم پيل کړل.

ايران د دې په ځواب کې د يورانیمو غني کولو سره له دغه تړونه سرغړونه پیل کړه. وروسته د هغه موافقې د خوندي ساتلو لپاره کوښښونه روان دي.

د طالبانو یو پلاوی پر بشري مرستو د بحث لپاره ناروې ته سفر کوي

بیان زیاتوي چې دا پلاوی به د افغانستان د مدني ټولنې له غړو او د بشري حقونو له دفاع کوونکو سره هم وویني. انځور- ارشیف

ټاکل شوې ده چې د طالبانو یو پلاوی پر بشري مرستو د بحث لپاره ناروې ته سفر وکړي.

د ناروې د بهرنیو چارو وزارت د جنورۍ پر ۲۱مه ویلي چې طالب پلاوی به په درې ورځني سفر کې په افغانستان کې د بشري ناورین پر مخنیوي خبرې وکړي.

یاد وزارت زیاته کړې چې د طالبانو دې پلاوي ته دوی بلنه ورکړې چې د جنورۍ له ۲۳مې تر ۲۵مې په اوسلو کې د ناروې او یو شمېر نورو اتحادي هیوادونو له چارواکو سره وویني.

په بیان کې د هیوادونو نومونه نه دي یاد شوي خو د ناروې د ( وي جې ) په نامه ورځپاڼې خبر ورکړی دی چې په دې هیوادونو کې بریتانیا، فرانس، جرمني، اټالیا، امریکا او اروپايي ټولنه هم شامل دي.

بیان زیاتوي چې دا پلاوی به د افغانستان د مدني ټولنې له غړو او د بشري حقونو له دفاع کوونکو سره هم وویني.

د ناروې د بهرنیو چارو وزیر ویلي چې دا ملاقاتونه د طالبانو په رسمیت پېژندلو په مانا نه دي.

پاکستان کې د کورونا وایرس پېښې په زیاتېدو دي

د روغتیا نړیوال سازمان (ډبلیو اېچ او) وايي، لومړنۍ څېړنې ښيي چې اومېکرون بڼه د پخوانیو هغو پرتله په تېزۍ خپرېږي.

په پاکستان کې په تېرو ۲۴ ساعتونو کې د کورونا وایرس ۷۶۷۸ تازه پېښې ثبت شوې دي چې ورسره په ۲۰۲۰ز کال کې په هغه هېواد کې د وبا له پیل راهیسې د پېښو رسمي شمېر له دیارلس نیم لکه اوښتی دی.

د کورونا وایرس په اړه حکومتي ووبپاڼې د جنورۍ پر ۲۱مه ویلي چې په تېرو ۲۴ ساعتونو کې له کووېډ-۱۹ ناروغۍ څخه ۲۳ کسان مړه شوي دي.

له دې سره په هغه هېواد کې له ناروغۍ څخه د مړو شویو رسمي شمېر تر ۲۹۰۰۰ لوړ شوی دی. ووبپاڼه زیاتوي چې د جنورۍ تر ۲۱مې تر ۱۲ لکه او ۶۶۰۰۰ زیات کسان له ناروغۍ رغېدلي هم دي.

د جنورۍ له لومړۍ اوونۍ راهیسې په پاکستان کې د کورونا وایرس پېښې په زیاتېدو دي.

د پاکستان د اطلاعاتو او خپرونو چارو وزیر فواد چودري د جنورۍ پر ۱۸مه په اسلام اباد کې خبري غونډې ته ویلي ول چې د هېواد په تر ټولو لوی ښار کراچۍ کې د کورونا وایرس د نوې اومېکرون بڼې له وجې پېښې په زیاتېدو دي.

د روغتیا ملي مرکز (اېن ای اېچ) د ډېسېمبر په پای کې په هغه هېواد کې د اومېکرون لسګونه پېښې تایید کړې.

د روغتیا نړیوال سازمان (ډبلیو اېچ او) وايي، لومړنۍ څېړنې ښيي چې اومېکرون بڼه د پخوانیو هغو پرتله په تېزۍ خپرېږي.

د کورونا وایرس دا نوې بڼه لومړۍ د تېر کال په نومبر کې په جنوبي افریقا کې وموندل شوه.

خیبر پښتونخوا کې د بلدیاتي ټاکنو د دوهم پړاو نېټه د مارچ ۲۸مه اعلان شوه

د خيبر پښتونخوا په ۱۷ ضلعو کې بلدیاتي انتخابات د ډېسېمبر پر ۱۹مه وشول. انځور- ارشیف

د پاکستان انتخاباتي کمېشن د خیبر پښتونخوا په ۱۸ ضلعو کې د بلدیاتي انتخاباتو د دویم پړاو نېټه اعلان کړې ده.

کمېشن د جنورۍ پر ۲۰مه په بیان کې ویلي چې د مارچ پر ۲۷مه به د څلورو قبایلي سیمو په ګډون به په پاتې ضلعو کې انتخابات وکړي.

د جنورۍ په ۲۱مه د خیبر پښتونخوا صوبې د الیکشن کمیشن ترجمان سهیل احمد مشال ریډیو ته وويل، دا اتلس ضلعې دي، چې پکې کمیشن د انتخاباتو مهالوېش اعلان کړی دی،

نوموړی وايي، دغه انتخابات د کلیو او چم ګاونډ د کونسلونو علاوه د تحصیل کونسل لپاره دي، چې د اورکزو، کرمې، شمالي او جنوبی وزیرستان نه علاوه به په ایبټ آباد، مانسهره، بټګرام، تورغر، کوهستان بره، کوهستان لاندې، کولي پالس کوهستان، سوات، ملاکنډ، شانګله، لاندې دیر، بره دیر، بره چترال او لاندې چترال کې به دغه انتخابات کیږی. دی زیاتوي چې د صوبې خلک به د ښاروالیو، تحصیلونو، کلیو او چم ګاونډ د شوراګانو ترڅنګ د ښځو، ځوانانو او لږکیو څوکیو لپاره خپل استازي ټاکي.

د الیکشن کمیشن ترجمان سهیل احمد وايي، نوماندان به د فبرورۍ له اوومې څخه تر ۱۱مې پورې خپل اسناد جمع کوي چې تر هغې وروسته به یې د کاغذونو د ارزونې بهیر پیلېږي. د ده په خبره ، د امېدوارانو وروستی نوملړ به د فبرورۍ پر ۲۵مه خپروي او بیا به ورته انتخاباتي نښې ورکوي.

د اورکزو ماموزو د سیمی اوسېدونکي او په راروان بلدیاتي انتخاباتو کې د ازاد کاندید په حیثیت برخه اخیستونکي رحمت جانان مشال ریډیو ته د جنورۍ پر ۲۱مه وویل، د دوی سیمې ډېر پسمانده پاتې شوې دي، هر څوک چې منتخب شي، باید په سیمه کې د ترقۍ کارونه وکړي.

''هغه سهولتونه چې په پېښور، کوهاټ یا نورو بندوبستي ضلعو کې دي، هغه موږ نه لرو، زموږ په اورکزو کې او په خاصه توګه اپر تحصیل لا هم ړنګ پروت دی، بله دا چی زموږه مسئلې په یوه ورځ هوارېږی هم نه، خو دا ترتیب به په کراره کراره جوړېږی، په هغه کې سړکونه او هسپتالونه دي.))​

له کرمې څخه د جمیعت علما اسلام (ف) غړی احسان الله احسان وایي، دوی بلدیاتي انتخاباتو ته ډېر انتظار کړی، خو وایي، اوس خوشاله دی، چی دغه ارمان به یې پوره شي. احسان الله احسان وایی، دی به د تحصیل چیېرمین لپاره د نامزدګۍ کاغذونه جمع کوي.

''زموږ خلک چې تر څو خپلواکه شوي نه وي، نو هېڅ ترقي به و نه کړي او بنیادي مسئلې به هوارې نه شي، نو دې بلدیاتي نظام کې به دا ښه وي، چې خلک به پخپله را اوچت شي، او خپلې مسئلې به پخپله هواروي.))​

تر دې مخکې د ډېسېمبر پر ۱۹مه د خیبر پښتونخوا د درو قبایلي سیمو په ګډون په ۱۷ ضلعو کې د بلدیاتي انتخاباتو لومړی پړاو ترسره شوی وو او ټاکل شوې وه چې دویمه مرحله یې د جنورۍ په نیمايي کې وشي، خو کمېشن د یخنۍ له وجې ټاکنې تر پسرلي وځنډولې.

نور وښیئ

ځانګړې پاڼې

له موږ سره اړیکي

XS
SM
MD
LG