په اسلام اباد کې د پاکستان جمهوري تحریک مشرانو په یوه غونډه کې پرېکړه کړې چې د راتلونکې ۲۰۲۲ز کال پر ۲۳م مارچ به په ملک کې د ګرانۍ پرضد لانګ مارچ کوي.
دا اعلان د دسمبر په شپږمه په اسلام اباد کې د پي ډي اېم تر غونډې وروسته د یاد تحریک مشر مولانا فضل الرحمان په یوه خبري کنفرانس کې وکړ.
نوموړي وویل چې دې لانګ مارچ ته به د ټول هېواد له هر برخې به ولسونه اسلام اباد ته درومي او د دې د تیاریانو او حکمت عملۍ لپاره به د ټولو صوبو په کچه غونډې رابلل کېږي.
مولانا فضل الرحمان وویل چې د دغه مارچ د تیاریانو لپاره د پنجاب صوبې د پي ډي اېم غونډه به د حزب اختلاف د مشر شهباز شریف په مشرۍ کېږي او په بلوچستان کې به د پښتونخوا ملي عوامي ګوند د مشر محمود خان اچکزۍ په مشرۍ، په سیند صوبه کې د جمعیت علمای پاکستان د مشر شاه اویس نوراني په مشرۍ او په خیبر پښتونخوا کې به دی خپله د مارچ د تیارۍ لپاره د کېدوونکې غونډې مشري کوي.
مولانا فضل الرحمان وویل چې د پي ډي اېم د مشرانو په غونډه کې له پارلېمانه د استعفاګانو ورکولو په خبره هم مشاورت وشو خو په دغه اړه فیصله به پر یوه مناسب وخت کوي.
د مولانا فضل الرحمان د خبري غونډې روستو د کورنیو چارو وزیر شیخ رشید احمد او د اطلاعاتو وفاقي وزیر فواد چودري په اسلام اباد کې پر ۲۳م مارچ (۲۰۲۲) د پي ډي اېم پر کېدونکي لانګ مارچ نیوکې وکړې او ویل یې چې پر دې نېټه د پاکستان ورځ لمانځل کېږي او په اسلام اباد کې پوځي پرېډ کېږي.
