د لاسرسي ځای

تازه خبر

د بلوچستان پوهنتون لادرکه زده کوونکو لپاره پرلت دوام لري


د احتجاجونو له کبله په پوهنتون کې د زده کړو لړۍ ولاړه ده او کلنۍ ازموینې هم اغېزمنې شوي دي.

په بلوچستان پوهنتون کې زده کوونکو خبرداری ورکړی دی چې که لادرکه شوي دوه زده کوونکي پیدا نکړل شول نو نورې تعلیمي ادارې به هم وتړي.

د احتجاج کوونکو زده کوونکو مشرتابه د نومبر پر ۲۰مه خبري غونډې ته وویل چې که د نومبر تر ۲۳مې لادکه زده کوونکي راستانه نه شول نو د نومبر له ۲۴مې به خپل احتجاج پسې پراخ کړي.

د احتجاج کوونکو یو مخکښ جهانګیر بلوڅ وویل، "د چهار شنبې له ورځې به د بلوچستان کالجونه او نورې تعلیمي ادارې هم بندي کړو، په دې اړه د استازانو ، سیکرټري تعلیم او نورو چارواکو څخه غوشتنه کوو چي هغه دي د احتجاج پر مهال د زور او تجاوز څخه کار نه اخلي ځکه چي بیا به د دې پرامن احتجاج اغیزې زیاتي مشکلې شي."

د بلوچستان پوهنتون انتظامي چارواکو د نومبر پر ۲۰ مه له احتجاج کوونکو سره لیدلي او هغوی ته یې ډاډ ورکړی چې لادرکه زده کوونکي سهل بلوڅ او فصیع بلوڅ به ډېر ژر خوشي کړل شي.

د بلوچستان پوهنتون کوټې څخه د دوو زده کوونکو د لادرکه کېدو پرضد د پوهنتون زده کوونکو له هغه وروسته بیا په احتجاج لاس پورې کړی چې د دوی په وینا، حکومت یې غوښتنې نه پوره کوي.

دوی غوښتنه لري چې حکومت دې د روانې میاشتې له لومړۍ نېټې څخه د پوهنتون له هاسټله د ورکو دوو زده کوونکيو سهیل بلوڅ او فصیح بلوڅ درک ولګوي او ذمه وارو ته دې سزا ورکړي.

د احتجاجونو له کبله په پوهنتون کې د زده کړو لړۍ ولاړه ده او کلنۍ ازموینې هم اغېزمنې شوي دي.

بلخوا د بلوچستان وزیراعلا میرعبدالقدوس بزنجو د بلوچستان پوهنتون د لادرکه زده کونکو په اړه د مالوماتو لپاره یوه درې کسیزه پارلېماني کمیټي هم ټاکلې ده.

د بلوچستان حکومت ویاند او صوبایي وزیر سردار عبدالرحمان کېتراڼ د نومبر پر ۱۹مه د اسمبلۍ غونډې ته وویل، دا د ریاست زمه داري ده چې لادرکه شوي زده کونکي پیدا کړي.

ده زیاته کړې چې که پر چا د څه جرم توروي نو هغه دې عدالت ته وړاندي کړل شي.

د پوهنتون د زده کوونکو د لادرکه کېدو پرضد دا احتجاجونه د نومبر پر اتمه نېټه پیل شوي دي.

بلخوا د پوهنتون انتظامیې د نومبر له ۱۰مې نېټې راهیسې پوهنتون تر ناڅرګنده نېټې پورې تړلی دی.

XS
SM
MD
LG