د لاسرسي ځای

تازه خبر

د ګرانۍ پرضد د عوامي نیشنل پارټۍ احتجاج


د ګرانۍ پروړاندې په سوات کې د عوامي نیشنل پارټۍ احتجاج. ۲۰۲۱، ۱۳م اکتوبر

عوامي نیشنل ګوند د خيبر پښتونخوا په بېلابېلو سيمو کې د حکومت له خوا د ګرانۍ نه کنټرولولو پرضد مظاهرې پيل کړې دي.

د اکتوبر پر ۱۳مه په سوات کې شوې يوه مظاهره کې د دې ګوند ځايي مشر، ايوب اشاړي مشال رېډيو ته وويل چې حکومت بايد نرخونه سم کړي. نوموړی زیاتوي چې ګراني نیم په نیمه زیاته شوې ده او زیاتره خلک د دې وس نه لري چې خپل ورځني ضرورتونه پوره کړي.

په دې احتجاج کې مله د خوازه خېلې نثار احمد وايي، له تېرو درېوو کلونو راهیسې ګراني مخ په زیاتېدو ده او زیاتوي وړاندې چې به د یوچا د کور ګوزاره د ورځې په درې سوه روپۍ کېده هغه اوس په ۱۵۰۰ روپۍ هم نه کېږي. نوموړي غوښتنه وکړه چې په بازار کې دې خوراکي توکي په سرکاري نرخنامه وپلورل شي.

د سوات یو خبریال غفور خان عادل چې د ګرانۍ خلاف یې د اې اېن پي احتجاج رپوټولو، له مشال رېډیو سره په خبرو کې وویل، ګراني ورځ تر بلې زیاتېږي. د تېلو نرخونه، اوړه، بوره، غوړي او نور د ضروریات څیزونه زښته ډېر ګران شوي دي او ډېری خلک دا غوښتنه کوي چې حکومت دې ګراني قابو کړي.

عوامي نیشنل پارټۍ د سویېلي وزیرستان په واڼه کې هم د ګرانۍ خلاف احتجاجي کېمپ لګولی دی. د ګوند د سیمې مشر ایاز وزیر یې وايي چې له نور پاکستانه په وزیرستانو کې د هر څیز نرخ زیات دی. دوی وايي چې د ګرانۍ ترڅنګ په سیمه کې بې روزګاري هم زیاته ده.

خو د تحريک انصاف حکومت دريځ لري چې د کورونا وايرس د مخنيوي لپاره د شوو تدابیرو له امله د نړۍ د نورو هېوادونو په شان د پاکستان اقتصاد هم خراب شوی.

د دوی په وينا،کوښښ کوي چې د احساس پروګرام له لارې له خلکو سره مالي مرسته وکړي.

XS
SM
MD
LG