په کوټه کې د پولیسو لخوا د هغو ۷۵ زده کوونکو د نیولو خلاف احتجاج شوی چې د مېډیکل کالج د داخلې ټېسټ پرضد یې په کوټه کې پرلت پیل کړی وو.
د کوټې پر لیاقت پارک چوک دا احتجاج د سېپټېمبر پر ۲۴مه تر سره شو چې پکې د پوهنتون او کالجونو ګڼو زده کوونکو برخه لرله.
د دوی غوښتنه وه چې د بلوچستان په مېډیکل کالجونو کې دې د داخلې ټېسټونه انلاین نه بلکې په پخوانۍ طریقه واخيستل شي.
په دغه احتجاج کې شامل یو زده کوونکي امیر محمد ترین مشال راډیو ته وویل چې د دوی دغه احتجاج د روانې میاشتې له لومړنۍ اوونۍ راهیسې دوام لري.
ده وویل"زموږ غوښتنه دا ده چې د بلوچستان په مېډیکل کالجونو کې داخله د انلاین له لارې نه بلکې په پخوانۍ طریقه دې واخيستل شي."
زده کوونکي دا هم وایي چې حکومت دې هغه پولیس له دندو لرې کړي چې د احتجاج پر مهال یې پر دوی تشدد کړی دی.
بلخوا د سېپټېمبر پر ۲۴مه پولیسو نیول شوي ۷۵ زده کوونکي د کوټې یو ځایي عدالت ته وړاندې کړي چې وروسته د ځینو نورو د پلټنو لپاره عدالت د اووه ورځو لپاره دوی پولیسو ته حواله کړي دي.
په بلوچستان کې زده کوونکي د صوبې په میډیکل کالجو نو کې د داخلو پر طریقه کار له تېرو درېيو میاشتو راهیسې په احتجاج دي.
