په بلوچستان اسمبلۍ کې د واکمن ګوند د ۱۶ غړیو لخوا د صوبې د اعلی وزیر خلاف د عدم اعتماد تحریک راوړلو وروسته هلته سیاسي هلې ځلې پيل شوي دي.
د سیپټمبر پر ۱۴ مه د بلوچستان د اعلا وزیر جام کمال خان پر ضد د عدم اعتماد تحریک د اسمبلۍ دفتر ته وړاندې کېدو وروسته د واکمن بلوچستان عوامي ګوند ناراضه غړیو له حزب اختلاف سره د درېدو ویلي دي. تر اوسه نه ده معلومه چې په دې به کله په اسمبلۍ کې بحث کېږي.
په عین حال کې د سینیټ چېرمین صادق سنجراني پرون ماښام کوټې ته تللی او د اعلی وزیرجام کمال تر څنګ یې د هغه د بلوچستان عوامي پارټۍ له غړیو سره ملاقاتونه کړي دي.
د بلوچستان اسمبلۍ په ودانۍ کې له خبریالانو سره په خبرو کې سنجراني وویل چې هلته د تګ مقصد یې د مسلې حل راویستل دي.
اپوزیشن خوشبینه دی چې د بلوچستان اعلا وزیر پرضد راوړی عدم اعتماد تحریک به یې کامیابه شي. دوی وايي چې په صوبه کې د ناامنۍ په ګډون بې روزګاري ده او د اعلا وزیر جام کمال حکومت په ښه حکومتدارۍ کې پاتې راغلی دی. خو حکومت د اپوزېشن ادعاوې نه مني.
د بلوچستان اسمبلۍ په ۶۵ څوکیو کې ۴۲ غړي له حکومت سره دي او اپوزېشن ۲۳ غړي لري. د وزیراعلا پرضد د تحریک عدم اعتماد ګټلو لپاره د ۳۳ رایو ضرورت وي.
