د لاسرسي ځای

تازه خبر

جنوبي وزيرستان: ماين چاودنو کې معیوبه شويو کسانو پرلت وهلی


په ډېره اسماعيل خان کې د ماين چاودنو د پېښو پرضد مظاهره.انځور-ارشېف

د جنوبي وزیرستان په کوټکۍ سیمه کې د ماين په چاودنو کې معیوبه شویو کسانو پرلت وهلی دی.

په پرلت کې ناست د پشتون ژغورنې غورځنګ یو مشر رحمت شاه مسید د سېپټېمبر پر شپږمه نېټه مشال راډېو ته وویل چې معذوره کسان له حکومته د مالي مرستو غوښتنه کوي. د جنوبي وزیرستان اېډيشنل ډپټي کمشنر مشال راډېو ته ويلي چې له دوی سره به ژر مرسته وشي.

سږکال د جون پر ۱۰مه نېټه په پېښور های کورټ کې د جنوبي وزیرستان پنځو قانون پوهانو یو درخواست جمع کړی وو چې پکې له عدالته غوښتنه شوې وه چې حکومت دې د شهدا پېکېج له مخې د ماين په چاودنو کې اغېزمنو کسانو او کورنيو ته د مرستې په توګه پیسې ورکړي.

په درخواست کې ويل شوي چې په تېرو څو کالونو کې په جنوبي وزيرستان کې د ماین شاوخوا ۱۷۸چاودنې شوې چې پکې ۸۰ کسان وژل شوي او ۲۵۰ معیوبه شوي دي.

حکومت تر اوسه پورې عدالت ته کوم ځواب نه دی ورکړی او نه يې هم د ماین چاودنو په اړه رسمي شمېرې خپرې کړې دي. د جنوبي وزيرستان په ګډون په ځينو نورو قبايلي سيمو کې د ترهګرۍ ضد جکړې پر مهال ماينونه کرل شوي دي.

د پاکستان پوځ وايي چې په جنوبي وزيرستان کې يې ځينې سيمې له ماينونه پاکې کړې خو ځايي خلک وايي چې دا کار دې ژر تر ژره بشپړ شي.

XS
SM
MD
LG