د لاسرسي ځای

تازه خبر

خبرونه

د "جې ۷" مشرانو له افغانانو سره پر ژمنو ټینګار او د طالبانو واکمنۍ ته اندېښنه وښوده

په دې انلاین بېړنۍ غونډه کې د امریکا، بريتانیې، ايټاليې، فرانسې، جرمني، کاناډا او جاپان مشرانو ګډون کړی و.

د نړۍ د پرمختللو اقتصادي هېوادونو ډلې (جي ۷) له افغان ولس سره د خپلې کلکې ملګرتیا ژمنه کړې او پر افغانستان يې د طالبانو له قبضې وروسته د دغه جنګ ځپلي هېواد پر حالاتو سخته اندېښنه ښودلې ده.

پرون (د اګست پر ۲۴مه) په انلاین بڼه په یوه بېړنۍ غونډه کې د امریکا، بريتانیې، ايټاليې، فرانسې، جرمني، کاناډا او جاپان مشرانو په افغانستان کې له خطر سره مخامخ افغانانو او نړیوالو د ساتنې او د بشري ناورین د مخنیوي په خاطر د تحمل او کراره پاتې کېدو غږ کړی دی.

په دغه غونډه کې وویل شول چې افغان ولس حق لري چې د تېرو دوو لسیزو سیاسي، اقتصادي او ټولنیزو پرمختګونو په رڼا کې او په خاصه توګه ښځې او نجونې یې په سوله، امنیت او عزت سره ژوند وکړي.

په غونډه کې پر دې خبره هم ټينګار وشو چې چې طالبان به د ترهګرۍ په مخنیوي، د بشري حقونو په ځانګړي ډول د ښځو، نجونو او اقلیتونو د حقونو او په افغانستان کې د یوه ټول شموله سیاسي جوړجاړي په تعقیب کې د خپلو کړنو لپاره حساب ورکوونکی وي.

د نننۍ ورځې ټول خبرونه وګورئ

فرانس وايي په افریقا کې یې د داعش وسله والو مشر وژلی دی. 

د فرانس ولسمشر وايي د افریقا په لویه صحرا کې د اسلامي دولت وسله والې ډلې یو مشر وژلی دی. انځور له ارشيفه

د فرانس ولسمشر ويلي چې ځواکونو يې په افریقا کې د داعش وسله والو مشر وژلی دی.

د فرانس ولسمشراېمانول مکرون د سېپټېمبر پر ۱۶ مه) په خپله ټویټر پاڼه په یو بیان کې لیکلي چې د افریقا په لویه صحرا/دښته کې فرانسوي ځواکونو د اسلامي دولت وسله والې ډلې داعش مشر عدنان ابو ولید الصحراوي وژلی دی.

د مکرون په وینا، دا یې د افریقا په ساحل سیمه کې د ترهه ګرۍ ضد جګړه کې یوه بله لویه بریا ده. نوموړي دا نه دي ویلي چې الصحراوي کله او په کوم خاص ځای کې ووژل شو.

الصحراوي په ۲۰۱۷ز کال کې د هغه برید ذمه واري منلې وه چې پکې څلور امریکايي او څلور نایجرياييي پوځیان وژل شوي ول. دا راز الصحراوي په ۲۰۲۰ز کال کې د فرانس د خیریه ادارې د شپږو کارکوونکیو او د هغوی د ډرایور د وژنې امر کړی وو.

د افریقا په لویه صحرا کې داعش په بورکینا فاسو، مالي او نایجر کې فعاله ده چې پکې امنیتي ځواکونه او ولسي خلک په نښه کوي. یاد هېوادونه پخوا د فرانس کالونیانې پاتې شوي دي.

فرانس د افریقا په ساحل سیمه کې د ترهه ګرۍ ضد مبارزې په اولني صف کې دی او په دغه سیمه کې یې ۵۰۰۰ پوځیان میشت دي.

خیبر پښتونخوا کې تعلیمي ادارې بیا پرانستل شوې

تمبوزک وهلې زده کوونکو سکولونو ته روانې دي - د ۲۰۲۱ز د فبرورۍ لومړۍ نېټې انځور.

په خیبر پښتونخوا کې له ننه (سېپټېمبر ۱۶مې) تعلیمي ادارې بيا پرانستل شوي دي.

دغه تعليمې ادارې د کورونا وبا څلورمې څپې له وجې بندې کړل شوې وي.

د صوبې د تعلیم وزیر شهرام خان ترکۍ د سېپټېمبر پر ۱۵مه پر خپل فېسبوک پاڼه ورکړي چې د بنو ضلعې پرته د صوبې په ټولو ضلعو کې به سرکاري او نجي تعلیمي ادارې خلاصې وي او ۵۰ فیصده زده کونکي به د اونۍ درې ورځې او باقي ۵۰ فیصده به پاتې درې ورځې خپله حاضري کوي.

صوبایي حکومت یوازې په بنو ضلعه کې د کورونا وایرس مخنیوي په غرض د سېپټېمبر تر ۲۲مې د ټولو تعلیمې ادارو د تړلو اعلان کړی دی.

بلخوا تر دې وړاندې د تعلیم وفاقي وزیر شفقت محمود پر خپل ټوېټر پاڼه لیکلي وو چې د سېپټېمبر له ۱۶ مې به د سکولونو، کالجونو او پوهنتونونو پشمول د هېواد ټولې سرکارې او نجي تعلیمي ادارې پرانستل شي.

دا په داسې حال کې ده چې په پاکستان کې په تېر یوه شواروز کې د کورونا ۳،۲۰۰ مثبتې پېښې رپوټ شوي دي. له دې سره په هغه هېواد کې د کورونا د مثبتو کېسونو شمېر له ۱۲ لکه ۱۵ زرو اوښتی دی خو تر ۱۱ لکه ۱۲ زرو زيات کسان ترې بیرته رغېدلي هم دي.

د سرکاري ووبپاڼې له مخې په تېرو ۲۴ ساعتونو کې ۶۶ کسان له کورونا ناروغۍ مړه شوي دي چې ورسره په پاکستان کې له کورونا وایرسه د مړو شمېر ۲۷،۰۰۴ ته رسېدلی دی.

مخکښه لیکواله او شاعره زیتون بانو ومړه

لیکواله زیتون بانو

د پښتو نومیاتې شاعره او لیکوله د سېپټېمبر پر ۱۴مه په پېښور کې د ناروغۍ له کبله د ۸۳ کالو په عمر وفات شوه.

زیتون بانو په شعر، ادب او نثر ډېر کار کړی او د راډیو او ټي وي لپاره یې هم ډرامې لیکلي دي. نوموړې د پښتو ترڅنګ په اردو ژبه کې هم لیکل کړي دي او تر ۲۴ زیات کتابونه یې چاپ شوي دي.

د هغې د ادبي خدماتو پر سر ورته د پاکستان حکومت د تمغه امتیاز جایزه هم ورکړې وه.

د زیتون بانو جنازه نن( د سېپټېمبر پر ۱۵مه) سهار ۱۰ بجې د پېښور په ورسک روډ سیمه کې وشوه.

نړیوال دې افغانستان یوازې نه پرېږدي:عمران خان

وزیر اعظم عمران خان انځور - ارشیف

د پاکستان وزیراعظم عمران خان پر نړیواله ټولنه له افغانستان سره د رابطو د جاري ساتلو په ضرورت زور راوړی او ویلي یې دي چې په دغه نازک وخت کې د هېواد ولس یوازې پرېښودل نه دي پکار.

د پاکستان سرکاري راډیو د خبر له مخه د سېپټېمبر پر ۱۴مه د روس له ولسمشر ولادمیر پوتین سره په ټېلېفوني خبرو کې عمران خان افغانستان ته په فوري توګه د بشري مرستو پر رسولو او د هغه هېواد له یوه اقتصادي بحرانه د ژغورولو پر ضرورت ټینګار وکړ.

عمران خان په دې لړ کې د پاکستان او روس نېږدې همکاري او مشاورت مهم وبلل. نوموړي وویل چې د افغانستان امن او استحکام د سیمې امنیت او سوکالي لپاره ډېر اهمیت لري.

خو بل پلو ګڼ افغانان د پاکستان دا هڅې په خپلو چارو کې مداخلت بولي چې پاکستان یې ردوي.

د پاکستان او روس مشرانو تر دې مخکې د اګست پر ۲۵مه د افغانستان په اړه ټېلېفوني خبرې کړې وې.

جنوبي وزیرستان کې ځانمرګي برید یو عسکر وژلی څلور ژوبل

په جنوبي وزيرستان کې د پاکستان پوځ پر عسکرو ځانمرګي بريد کې يو عسکر وژل شوی او څلور نور ژوبل دي.

د جنوبي وزيرستان د پوليسو مشر شوکت علي مشال راډيو ته وويل چې د سېپټېمبر پر ۱۳ مه په بدر سيمه کې د عسکرو پر موټر دا بريد شوی.

د نوموړي وينا وه له پېښې وروسته یې د لټون عمليات پيل کړي خو څوک يې ګرفتاره کړي نه دي.

د بريد ذمه واري تحريک طالبان پاکستان منلې ده.

دا په داسې حال کې ده چې د اګست پر ۱۱مه هم په جنوبي وزیرستان کې په ځانمرګي برید کې د یو برېګېډییر په ګډون درې پوځیان ژوبل شوي ول چې د حملې ذمه واري تحریک طالبان پاکستان منلې وه.

بلخوا د شمالي وزیرستان په میرعلي کې د سېپټېمبر پر درېیمه سهار د لرګیو ټال کې له چادونې دوه تنه ژوبل شوي دي.

شمالي وزیرستان او جنوبي وزیرستان په دې وروستیو کې د بدامنۍ پېښې، بمي چادونې او هدفي بریدونه وخت په وخت دوام لري، چې پرضد یې ځايي پښتون ژغورنې غورځنګ او ځايي ځوانانو، مشرانو وخت په وخت لاریونونه او جرګې کړې او له دولته یې د داسې پېښو د مخنیوي غوښتنې کړې دي.

حکومت او پوځ په وار وار ویلي، چې دغلته اوس امن بحال شوی او د لږ او ډېر داسې وقعاتو د مخنیوي هڅې روانې دي.

ښايي افغانستان د خوړو له کمښت سره مخامخ شي: ګوتېرېش

انتونیو ګوتېرېش وايي، تر څو لسیزو جګړو، کړاو او ناامنۍ وروسته ښايي تر ټولو خطرناکو شیبو سره مخامخ شي.

انتونیو ګویتېرېش د سېپټېمبر پر ۱۳مه په جنیوا کې د ملګرو ملتونو په بلنه رابلل شوي کنفرانس ته وويل چې افغانان تر لسیزو جګړو او کړاوونو وروسته تر ټولو سختې شېبې تېروي.

نوموړی وايي، د افغانستان خلک لاسنیوي ته اړتیا لري. تر څو لسیزو جګړو، کړاو او ناامنۍ وروسته ښايي تر ټولو خطرناکو شېبو سره مخامخ شي. نو وخت راغلی چې نړیواله ټولنه د دوی تر څنګ ودرېږي.

که څه هم ملګرو ملتونو د بشرپالنې د مرستو لپاره د څه باندې ۶۰۰ میلیونه ډالرو بسپنې غوښتنه کړې، خو د سېپټېمبر پر ۱۳مه مرستندویو هېوادونو تر یو میلیارد ډالرو د زیاتې بسپنې د ورکړې ژمنه وکړه.

ګویتېرېش خبرداری ورکړ چې د روانې میلادي میاشتې تر پای پورې ښايي په افغانستان کې د خوړو کمښت لا زیات شي.

د ملګرو ملتونو د خوړو نړیوال پروګرام تر دې مخکې ویلي ول چې ۱۴ میلیونه افغانان د سختې لوږې له خطر سره مخامخ دي.

د اګست پر ۱۵مه پر کابل د طالبانو له واکمنېدو پس په افغانستان کې اقتصادي چارې ټکنۍ او د بشري بحران په اړه اندېښنې لا زیاتې شوې.

امریکا د شمالي کوریا توغندیزه ازموینې ګواښ وباله

ارشیف، د شمالي کوریا رهبر کېم جونګ اون د میزایلو د ازموینې د لیدلو پر مهال

د امریکا پوځ د هغو توغندیو ازموینې چې شمالي کوریا په تېرو دوو ورځو کې کړې، د دې هېواد ګاونډیانو او نورو ته ګواښ وباله.

د امریکا د هند پېسیفیک قومندانۍ په یوه بیان کې وویل چې د شمالي کوریا دغه فعالیتونه د دې ښکارندویي کوي چې دا هېواد پوځي پروګرام ته پراختیا ورکوي او په دې توګه خپل ګاونډیان او نړیواله ټولنه ګواښي.

شمالي کوریا ویلي چې په تېرو دوو ورځو کې یې د کروز میزایلو بریالۍ ازموینې کړې او ټاکل شوي د ۱،۵۰۰ کیلومیټره واټن هدفونه‌ یې ویشتلي دي.

پیانګ یانګ دغه نوي توغندي مهمه ستراتېژیکه وسله بولي او وایي چې په دې سره د شمالي کوریا د مشر کیم جونګ اون هغه ارمان پوره شو چې د هېواد د پوځي وړتیا پر لا زیاتېدو یې ټینګار کړی دی.

امریکا له ازبکستانه د افغان پایلټانو ایستل پیل کړ

امریکا د هغو روزلو افغان پایلټانو چې پر کابل د طالبانو له واکمنېدو مخکې له خپلو کورنيو سره یې ازبکستان ته پناه وړې وه، له هغه هېواده د وتلو بهیر پيل کړ.

نیویارک ټایمز ورځپاڼې ویلي چې دغه پایلټان او کورنۍ به‌ یې په لومړي ګام کې په متحده عربي اماراتو کې د امریکا یوې پوځي اډې ته وړل کېږي.

یوه پایلټ د خپل نوم نه‌ ښودلو په شرط روېټرز اژانس ته ویلي چې متحده عربي اماراتو ته‌یې د وړلو بهیر د سېپټمبر پر ۱۲مه نېټه (یکشنبه) پیل شوی دی.

والسټریټ ژورنال ورځپاڼې د تېرې شنبې په ورځ وویل چې له ازبکستانه د ۵۸۵ پایلټانو او د کورنیو د ایستلو لپاره‌ یوه موافقه تېره اوونۍ د امریکا او ازبکستان ترمینځ شوې ده.

دغه پایلټان او کورنۍ یې تېره میاشت چې کله طالبان پر افغانستان واکمن شول، له خپلو پوځي الوتکو سره ازبکستان ته تللي دي.

ايران د اټومي مرکزونو د کېمرو مرمت لپاره نړيوالو څارونکو ته اجازه ورکوي

رافایل ګروسي د سېپټېېمبر پر ۱۱مه تهران ته ورسېد.

ایران سلا شوی چې د خپلو اټومي مرکزونو د څارګرو کېمرو د مرمت لپاره نړیوالو څارونکو ته اجازه ورکړي چې په دې توګه د حساسو مرکزونو ویډیو رېکارډولو عمل دوام ولري.

تهران دا اعلان د سېپټېمبر پر ۱۲مه نېټه تر هغې وروسته کړی چې د اټومي انرژۍ نړیوالې ادارې مشر رافایل ګروسي په تهران کې د ایران د اټومي پروګرام ادارې له مشر محمد اسلامي سره وليدل.

د ليدنې هدف دا وو چې د تهران او غربي نړۍ ترمنځ د ایران د اټومي تړون د بیا بحالولو لپاره د ځنډېدلو خبرو مخې ته خنډونه ختم کړي.

د ایران سختدریځه ولسمشر ابراهیم رییسي سږ کال په اګست میاشت کې واک ترلاسه کړی او تر هغه وروسته هغه هېواد ته د ګروسي دا لومړی سفر دی.

په نړیوالو بندېزونو کې د نرمښت په بدل کې د ایران اټومي پروګرام محدودولو په اړه د تهران او نړیوالو ځواکونو ترمنځ خبرې اترې سږکال د جون له میاشتې راهیسې درېدلې دي.

د سېپټېمبر په پیل کې د اټومي انرژۍ د څار نړیوالې ادارې په خپل یو رپورټ کې ویلي ول چې ایران د زیات غني شویو اورانييمو ذخیره پرله پسې زیاتوي.

په رپورټ کې دا هم ویل شوي چې تهران سږ کال په فېبرورۍ میاشت کې د دې ادارې څارونکو ته د خپلو اټومي مرکزونو د څار نظام ته له لاسرسي انکار کړی وو او له هغه راهیسې یې د تصدیق او څارنې چارې هم په جدي ډول ټکڼۍ کړې دي.

د امریکا د بهرنیو چارو وزیر اینتني بلېنکن د سېپټېمبر پر اتمه خبرداری ورکړی وو چې امریکا د ایران له خوا د خنډ جوړونې له کبله له هغه هېواد سره موافقې ته د رسېدو د هڅو پرېښوولو ته نېږدې شوې ده.

قطر له نړیوالو څخه د افغانانو لپاره د بشري مرستو غوښتنه کړې

د قطر د بهرنیو چارو وزیر وايي، که افغانستان کې حالات خرابېږي نو ګاونډیان به یې هم اغېزمن شي - انځور له ارشیفه

د قطر د بهرنیو چارو وزیر له نړیوالو غوښتي چې د افغانستان له خلکو سره هرڅومره چې ژر کېدای شي، بشري مرستې وکړي.

محمد بن عبدالرحمان الثاني دغه غوښتنه د سېپټمبر پر ۱۱مه له خپل روسي سیال سېرګې لاروف سره په مسکو کې تر لیدو وروسته کړې ده.

نوموړي خبري غونډې ته ویلي چې که په افغانستان کې حالت لا خرابېږي نو هېڅ یو ګاونډی به یې له ناوړه اغېزه خوندي نه وي.

د روسیې د تاس خبري اژانس د خبر له مخې، د هغه هېواد د بهرنیو چارو وزیر سېرګې لاوروف وویل، په افغانستان کې یو ډېر دردوونکی بشري حالت پیدا شوی دی.

د ده په وینا، کېدای شي چې دا له افغانستانه ګاونډیو هېوادونو ته د کډوالو د ورماتېدو سبب شي.

لاوروف زیاته کړې، دا د هغو ټولو هیوادونو مسوولیت دی چې د افغان کډوالو د ستونزې حل لارې ولټوي چې د افغانستان په روان وضعیت کې ښکېل دي.

امنيت راغلی خو ډوډۍ ولاړه: د کابل اوسېدونکي
تم شئ

هېڅ میډیايي سرچینه اوس نشته

0:00 0:02:14 0:00

د قطر او د روسیې د بهرنیو چارو وزیرانو دا څرګندونې پر داسې مهال کړې دي چې طالبانو د اګست پر ۱۵مه کابل ونیوه او شاوخوا درې اوونۍ وروسته یې خپل لنډمهالی حکومت اعلان کړ.

د طالبانو له واکمنېدو راهیسې په افغانستان کې ادارې لا په بشپړه توګه نه دي فعالې شوي او ملګرو ملتونو هم ویلي چې په هغه هېواد کې د بې کارۍ له وجې بې وزلي لا زیاتېدای شي. همدا لامل دی چې ملګرو ملتونو له افغانانو سره د مرستو لپاره د سېپټېمبر پر ۱۳مه په جینیوا کې د غونډې اعلان کړی دی.

د ملګرو ملتونو په وینا، په افغانستان کې د ناامنیو او اوږدمهاله وچکالۍ له وجې د بې وزلۍ کچه خورا لوړه شوې د او میلیونه افغانان د خوړو له کمښت سره مخامخ دي.

پاکستان د کابل هوايي ډګر ته پروازونه بیا پیلوي

د پاکستان نړيوال هوايي شرکت الوتکه. انځور - ارشیف

د پاکستان نړيوال هوايي شرکت (پي ای اې) ویاند وايي چې دوی له راتلونکې اوونۍ د اسلام اباد او کابل ترمنځ د خپلو مسافر وړونکو الوتکو پروازونو بیا بحالولو پلان لري.

د پي ای اې ویاند عبدالله حفیظ خان د سېپټېمبر پر ۱۱مه اې اېف پي خبري اژانس ته وویل چې د دوی هوايي شرکت ته د پروازونو د فعالولو ټولې تکنیکي اجازت نامې ورکړل شوې دي.

نوموړی وویل چې د پې ای اې لومړی چارټرډ پرواز به د سېپټېمبر پر ۱۳مه له اسلام اباده کابل ته ورځي.

خو تر اوسه معلومه نه ده چې پي ای اې به کله له افغانستان سره عادي پروازونه بحال کړي.

د اګست په نیمايي کې پر افغانستان د طالبانو له واکمنۍ راهیسې، له هغه هېواد سره تجارتي الوتنې درېدلې دي.

مخکې د سېپټېمبر پر نهمه د قطر اییر ویز نومي هوايي شرکت په یو ځانګړي پرواز کې شاو خوا ۲۰۰ کسانو د کابل له هوايي ډګره پرواز وکړ.

دا پر دغه میدان د طالبانو کنټرول حاصلولو وروسته له هغه ځایه لومړی مساپر وړونکې پرواز و.

د اګست پر ۱۵مه پر کابل د طالبانو کنټرول تر لاسه کولو وروسته، د پاکستان حکومتي هوايي شرکت پي ای اې، د یوې اوونۍ لپاره له کابله پروازونه جاري ساتلي وو. خو بیا پي ای اې د اګست پر ۲۲مه اعلان وکړ چې د کابل او اسلام اباد ترمنځ پروازونه په موقتي ډول ځنډوي.

پي ای اې د پروازونو د ځنډولو لامل د سهولتونو کمې او د کابل هوايي ډګر په ځینو برخو کې د خځلې ډېرونه و ښودل.

بلوچستان کې دوو چاودنو دوه عسکر وژلي‌ او پينځه تنه یې ژوبل کړي

د بلوچستان چارواکي وايي، د کېچ ضلعې په بلیده سیمه کې یوې بمي چاودنې دوه سرحدي سرتېري وژلي او یو بل یې ژوبل کړی دی. (انځور:ارشیف)

د بلوچستان چارواکي وايي د کېچ ضلعې په بلیده سیمه کې یوې بمي چاودنې دوه سرحدي سرتېري وژلي او یو بل یې ژوبل کړی دی.

په کوټه کې د سرحدي ځواکونو ویاند د سېپټېمبر پر ۱۱مه مشال راډيو ته وویل چي پېښه د سېپټېمبر پر نهمه په بلیده سیمه کې د نا څرګندو وسله والو لخوا د سړک غاړې د پټ کړل شوي بم له امله هغه وخت شوې ده کله چې د سرحدي ځواکونو یوه قافله له هغه ځایه تېرېده.

د چارواکي په خبره چاودنه د ریموټ کنټرول بم په وسیله شوې ده.

د دوی په وینا، وسله وال تر پېښې وروسته په تېښته کې بریالي شوي او د وژل شويو سرتېرو مړي ځايي روغتون ته تر رسولو وروسته کوټې ښار ته انتقال کړل شوي دي.


بلخوا د بلوچستان په قلات سیمه کې پر موټر سایکل سپرو وسله والو د پولیسو پر یو موټر د لاسي بم برید کړی دی.

په هغه پېښه کې د دوه پولیس اهلکارو په ګډون څلور نور کسان ژوبل شوي دي.

دغه پېښه د ۱۰م سېپټېمبر په شپه هغه وخت شوې چې د پولیسو یو موټر په قلات کې د کوټې -کراچۍ پر لوی سړک ګزمه کوله.

د قلات د پولیسو ډي اېس پي غلام حسېن باجوي ویلي چې د پېښې پلټنې یې پیل کړې دي.

د دواړو پېښو ذمه واري لا چا نه ده منلې.

د افغانستان د کرکټ ۱۹ کلنې لوبډلې له بنګله دېشه ماتې وخوړه

د افغانستان د ۱۹ کلنو کرکټ ملي لوبډله. انځور- ارشیف

د افغانستان کرکټ د ۱۹ کلنو لوبډلې د بنګله دېش د ۱۹ کلنو د لوبډلې پر وړاندې خپله لومړۍ ۵۰ اووریزه لوبه بایلوده.

افغانستان د سېپټېمبر پر ۱۰مه لوبه چې د بنګله دېش په پلازمېنه دوحه کې وه، د ۱۶ منډو په توپیر سیالې لوبډلې ته وبایلله.

د افغانستان د کرکټ بورډ ویاند فرید هوتک د سېپټېمبر پر ۱۰مه مشال راډیو ته وویل چې دواړې لوبډلې، څلور نورې ۵۰ اوورېزې او یوه ټېسټ لوبه هم په راتلونکي کې لري.

هوتک زیاته کړه: "د افغانستان د ۱۹ کلنو لوبدلې د بنګله دېش پر وړاندې لومړۍ ۵۰ اوورېزه لوبه ترسره کړه.

له دې وروسته به دا لوبډله د بنګله دېش له ۱۹ کلنو لوبډلې سره څلور نورې ۵۰ اووريزې او یوه څلور ورځنۍ لوبه ترسره کړي."

تمه ده چې د ۱۹ کلنو لوبډله به د سېپټېمبر پر ۲۶مه بېرته هېواد ته ستنه شي.

مومندو کې هوايي ډزو دوه پولیسان وژلي دي

د خيبر پښتونخوا د مومند ضلعې نقشه

د خيبر پښتونخوا د مومندو پولیس چارواکي وايي چې پرون ماښام (د سېپټېمبر پر نهمه) په دوو جلا جلا پېښو کې دوه پولیسان وژل شوي دي.

د کوز مومندو سب ډويژن د پوليسو ډي اېس پي جاويد خان نن (سېپټېمبر ۱۰مه) مشال راډيو ته وویل چې لومړۍ پېښه د مېچنۍ په خودک کور سیمه کې رامنځ ته شوې او دويمه پېښه په شکرغونډۍ بایزو سیمه کې رامنځ ته شوې ده.

پولیس وايي، په دواړو پېښو کې پوليسان په هوايي ډزو لګېدلي، خو دوی د نامعلومه کسانو پرضد مقدمه درج کړي او د پېښې د عاملينو پلټنې کوي.

بايډن په امريکا کې د کورونا واکسينو بهير ګړندي کولو لپاره نوې ستراتيژي اعلان کړه

بایډن د سېپټېمبر پر نهمه په سپینه ماڼۍ کې پر شاوخوا ۸۰ میلیونه هغو امریکایانو انتقاد وکړ چې تر اوسه یې واکسین نه دي کړي.

د امریکا ولسمشر جو بایډن په هېواد کې د واکسینو ورو بهیر چټکولو او د کووېډ-۱۹ ناروغۍ زیاتېدونکو پېښو کنټرول لپاره نوې ستراتیژي اعلان کړې چې تر ۱۰۰ میلیونه پورې کسان به واکسین کولو ته وهڅوي.

په هغه هېواد کې په چټکۍ د خپرېدونکې ډېلټا بڼې له وجې پېښې په زیاتېدو دي. بایډن بېګا (د سېپټېمبر پر نهمه) په سپینه ماڼۍ کې پر شاوخوا ۸۰ میلیونه هغو امریکایانو انتقاد وکړ چې تر اوسه یې واکسین نه دي کړي.

دا په داسې حال کې ده چې په هغو خلکو کې د کووېډ-۱۹ ناروغۍ پېښې، په روغتونونو کې یې بسترېدل او له ناروغۍ یې مړینې په زیاتېدو دي چې واکسین شوي نه دي.

بایډن د وایرس د کنټرول لپاره شپږ اړخیزه ستراتیژي اعلان کړې چې ورسره سم، هغه ادارې او شرکتونه چې تر ۱۰۰ زیات کسان پکې کار کوي، باید ټول کارکوونکي یې واکسین شي او یا به هره اوونۍ د وایرس لپاره ټېسټ کوي.

د سپینې ماڼۍ له اټکل سره سم، د دې امر له وجې به په شخصي څانګه کې تر ۸۰ میلیونه زیات کسان تر پوښښ لاندې راشي.

د ولسمشر د ستراتیژۍ بله برخه د ټولو وفاقي کارکوونکو او قرادادیانو لپاره واکسینېدل لازمي کول دي. تر دې مخکې به هغو کارکوونکو کولای شول چې د واکسین پر ځای مسلسل ټېسټونه وکړي او کار ته ولاړ شي.

په امريکا کې د سېپټېمبر تر ۱۰مې څه باندې ۴۱ مليونه کسان کورونا وايرس وهلي چې تر شپږ نيم لکه زيات کسان ورڅخه مړه شوي خو تر ۳۱ مليونه زيات بېرته ورڅخه رغېدلي هم دي.

د راشد خان له استعفا وروسته محمد نبي د افغان کرکټ لوبډلې مشر ټاکل شوی

راشد خان (د شا لخوا) او محمد نبي (د مخ لخوا) - (ارشيف)

وروسته له هغه چې راشد خان د اعتراض په توګه د افغانستان د ۲۰ اووريزې کرکټ لوبډلې له مشرۍ استعفا ورکړه، د افغانستان کرکټ بورډ وايي، محمد نبي به‌ یې پر ځای لوبډلمشر وي.

کرکټ بورډ تېره شپه ناوخته (د سېپټېمبر پر نهمه) پر خپله فېسبوک پاڼه اعلان خپور کړ چې د راشد خان استعفا منظوروي او پر ځای یې محمد نبي عیساخېل د لوبډلمشر او نجیب‌ الله ځدراڼ‌ یې د مرستیال په توګه ټاکلي دي.

راشد خان پرون (د سېپټېمبر پر نهمه) په دې اعتراض کې چې د ۲۰ اووريزه نړیوال جام لپاره د لوبډلې په غوره کولو کې له ده سره مشوره نه‌ ده شوې، له لوبډلمشرۍ استعفا ورکړه.

د افغانستان کرکټ بورډ یو شمېر زاړه لوبغاړي چې پخوا پرې اعتراضونه کېدل، د ۲۰۲۱ز د ۲۰ اووريزه نړيوال جام سیالیو لپاره په لوبډله کې ځای کړي او ټینګار لري چې په دې لوبډله کې بدلون نه‌ راولي.

د کرکټ د نړيوالې شورا په وينا، د ۲۰ اووريزه نړيوال جام سيالۍ به د روان ۲۰۲۱ز کال د اکتوبر له ۱۷مې پيلېږي. دا سيالۍ به په متحده عرب اماراتو او عمان کې تر سره کېږي. د دې سياليو پايلوبه به د نومبر پر ۱۴مه په دوبۍ کې کېږي.

د سي ای اې مشر په راولپېنډۍ کې د پاکستان د پوځ او استخباراتو له مشرانو سره لیدلي

ای اېس پي ار وايي، برنز له پاکستانیو چارواکو سره د افغانستان پر وضعیت غږېدلی. انځور له ارشیفه

د امریکا د استخباراتو مرکزي ادارې (سي ای اې) مشر وېلییم جوزف برنز په راولپېنډۍ کې د پاکستان د پوځ له مشر جنرال قمر جاوېد باجوه او د هغه هېواد د استخباراتي ادارې (ای اېس ای) له مشر جنرال فیض حمید سره لیدلي.

د پاکستان د پوځ د عامه اړیکو څانګې (ای اېس پي ار) د سېپټېمبر پر نهمه په بیان کې ویلي چې د پنجشنبې (زیارت) پر ورځ په لیدنه کې پر دوه اړخیزه مسلو، سیمه ییزو امنیتي حالاتو او د افغانستان پر وضعیت خبرې شوې دي.

په بیان کې راغلي چې په غونډه کې "دا خبره تکرار شوه چې پاکستان د سیمې امنیت او د باثباته او سوکاله افغانستان لپاره له نړیوالو ملګرو سره همکارۍ ته ژمن دی."

ای اېس پي ار زیاتوي چې د برنز په مشرۍ ورغلي پلاوي د افغانستان په مسله کې د پاکستان کردار ستایلی چې پکې له افغانستانه د خلکو د ایستلو "کامیاب" عملیات او د سیمه ییز ثبات لپاره هلو ځلو ته ژمنتیا شامله ده.

دا په داسې حال کې ده چې د سېپټېمبر پر څلورمه د ای اېس ای مشر جنرال فیض حمید کابل ته تللی وو چې سفر یې له غبرګونونو سره مخامخ شو.

په کابل او د افغانستان په یوشمېر ولایتونو کې خلکو د پاکستان ضد مظاهرې وکړې او تور یې پورې کړ چې پاکستان د افغانستان په چارو کې مداخله کوي. اسلام اباد په بیا بیا دا تور رد کړی او وايي، د افغانستان سولې او ثبات ته ژمن دی.

طالبانو مزارشریف کې ۱۳ مظاهرچیان نیولي

د سېپټېمبر پر اتمه په کابل کې لسګونه کسان د مظاهرې پر مهال.

طالبانو د افغانستان د شمالي ولایت بلخ په مرکز کې ۱۳ مظاهره کوونکي نیولي دي.

د سېپټېمبر پر نهمه لسګونه کسان په مزارشریف کې د مقاومت د جبهې په ملاتړ مظاهرې ته وتلي ول چې له ډلې یې یو شمېر ګرفتار شول.

د بلخ د امنیه قوماندانۍ په اعلامیه کې راغلي چې هر ډول مظاهرې او غونډې باید له مخکې له طالب چارواکو سره همغږې شي.

د مظاهرچیانو له ډلې سمیې فاروق مشال راډیو ته وویل چې طالبانو خلک سره بېل کړل او د خبریالانو په ګډون یې ۱۳ کسان بندیان کړي.

دا په داسې حال کې ده چې د طالبانو د کورنیو چارو وزارت د سېپټېمبر پر اتمه ماښام په یوه اعلامیه کې وویل چې د اوس لپاره دې څوک تر هېڅ نوم او عنوان لاندې د مظاهرو جوړېدو هڅه نه کوي.

دوی د تېرو ورځو مظاهرې د "مغرضو کړیو" کار بللی او ویلې یې دي تر دې وروسته باید له اړونده ادارو د مظاهرو اجازه واخیستل شي او کره وخت او ځای یې باید مشخص وي.

په وروستیو کې د پلازمېنې کابل په ګډون په یوشمېر ولایتونو کې سلګونه ښځو او سړیو د طالبانو د تګلارو ضد احتجاجي لاریونونه وکړل.

د طالبانو په بیان کې راغلي، داسې ویره شته چې ځینې کړۍ مظاهره کوونکو ته امنیتي ګواښ پېښ کړي. دوی په بیان کې دا نه ده روښانه کړې چې څوک امنیتي ګواښ پېښولای شي او د هغو کړیو په اړه یې هم سپیناوی نه کړی.

طالبانو په بیان کې زیاته کړې چې سرغړونکی به له "سخت قانوني چلند" سره مخامخ شي.

نړیواله ټولنه دې د افغانستان لاسنیوي وکړي: قریشي

قریشي وايي، له افغانستان سره باثباته نړیواله ملګرتیا لا هم غوره انتخاب دی. انځور له ارشیفه

د پاکستان د بهرنیو چارو وزیر شاه محمود قریشي وايي، په اوسنیو حساسو شرایطو کې باید نړیواله ټولنه د افغانستان لاسنیوي وکړي.

قریشي دا خبره د افغانستان د ګاونډیانو بهرنیو چارو وزیرانو په لومړنۍ غونډه کې چې په انلاین بڼه د سېپټېمبر پر اتمه جوړه شوې وه وکړه.

قریشي وویل، "که چیرې په افغانستان کې د بشري ناورین مخه ونیول شي او اقتصادي ثبات تضمین شي، سوله راتللای شي او د خلکو ډله ییز وتلو مخنیوي کېدای شي. باید ټینګار وکړو چې دا کار د نړیوالې ټولنې پراخ مشارکت ته اړتیا لري، په تېره بیا دې مهم وخت کې."

قریشي د سېپټېمبر پر اتمه پر ټوېټرپاڼه لیکلي چې پاکستان د افغانستان د ګاونډي په توګه نه شي کولای چې له افغانستانه جلا شي.

د هغه په وینا، له افغانستان سره باثباته نړیواله ملګرتیا لا هم غوره انتخاب دی. د افغانستان د ګاونډیانو د بهرنیو چارو وزیرانو په دې غونډه کې د پاکستان، چین، تاجکستان، ازبکستان، ایران او د ترکمنستان د بهرنیو چارو وزیرانو برخه اخیستې وه.

دا په داسې حال کې ده چې په تېرو څو ورځو کې په افغانستان کې خلکو مظاهرې کړې چې پکې یې پاکستان د افغانستان په چارو کې په مداخلې تورن کړی خو اسلام اباد دا تورونه ردوي.

پاکستان کې له کووېډ-۱۹ ناروغۍ ۸۴ کسان مړه شوي

په پېښور کې یوه نرسه یو کس ته د کووېډ-۱۹ واکسینو ستن لګوي - انځور له ارشیفه

په پاکستان کې په تېرو ۲۴ ساعتونو کې د کووېډ-۱۹ ناروغۍ له وجې ۸۴ کسان مړه شوي.

له دې سره په هغه هېواد کې د وبا له پیل راهیسې له کووېډ-۱۹ څخه د مړو شمېر ۲۶،۴۹۷ ته ورسېد.

د وبا په اړه حکومتي ووبپاڼې په وینا، د سېپټېمبر نهمې تر سهاره په کووېډ-۱۹ ناروغۍ د اخته کسانو شمېر ۱،۱۹۴،۱۹۸ ته رسېدلی دی. په ملک کې په تېره يوه ورځ کې د کورونا وايرس له ۴،۰۰۰ زيات مثبت کېسونه ثبت شوي دي. خو له کووېډ-۱۹ ناورغۍ ۱،۰۷۶،۱۱۲ کسان بېرته رغېدلي هم دي.

بلخوا په ملک کې د کورونا وايرس واکسيني بهير هم دوام لري.

د کورونا وايرس د څار ملي ادارې (نیشنل کمانډ اېنډ اپرېشن سېنتر یا اېن سي او سي) پر ووبپاڼه راغلي چې د سېپټېمبر تر نهمې پورې په مجموعي توګه شپږ کروړه ۴۵ لکه او ۵۴ زره کسان واکسين شوي دي. په دې کې دوه کروړ ۵۲ زره کسان په مکمله توګه واکسين شوي او پاتې نورو ته د واکسين لومړي خوراک ورکړل شوی.

سپینه ماڼۍ وايي بیړه نه لري چې طالبان په رسمیت وپېژني

جېن ساکي په سپینه ماڼۍ کې د خبري غونډې پر مهال - انځور له ارشیفه

سپينه ماڼۍ وايي، بیړه نه لري چې طالبان په رسمیت وپېژني خو له افغانستانه د امریکایانو د ایستلو لپاره به ورسره خبرې کوي.

دا خبره د سپينې ماڼۍ ویاندې جېن ساکي د سېپټېمبر پر اتمه تر هغې یوه ورځ وروسته وکړه چې طالبانو خپل حکومت او سرپرسته کابینه اعلان کړه.

ساکي په کنفرانس کې د طالبانو د کابینې او په افغانستان کې د ایسارو امریکایانو د راایستلو په تړاو زیاته کړه چې "دا یوه سرپرسته کابینه ده چې پخواني او اوسني طالب وسله وال پکې شامل دي. موږ [کابینه] نه تایید کړې او نه موږ ویلي چې په رسمیت یې پېژنو، نه يې د پېژندنې لپاره بیړه لرو ځکه چې تر دې مخکې ډېر څه شته چې هغوی یې باید وکړي."

د طالبانو د حکومت ویاند ذبیح الله مجاهد په خپل وروستي خبري کنفرانس کې له ټولې نړۍ سره د ښو اړیکو جوړولو هیله وښوده.

طالبانو دمګړۍ د هوایي ډګر او سېسټمونو تر بیا فعالېدو پورې له هېواده د خلکو پر بهر وتلو بندیز لګولی.

د امريکا بهرنیو چارو وزير له یوشمېر هېوادونو سره د افغانستان په اړه خبرې کوي

بلېنکېن د سېپټېمبر پر اتمه په جرمني کې د امریکا پوځي اډې ته تللی. انځور له ارشیفه

د امریکا د بهرنیو چارو وزیر اینتني بلېنکن د سېپټېمبر پر اتمه په جرمني کې د هغو هېوادونو له چارواکو سره غږېږي چې تېره میاشت په افغانستان کې د طالبانو تر واکمنېدو وروسته له هېواده د تللیو افغانانو د پر ځای کولو هڅې کوي.

بلېنکن د سېپټېمبر پر اتمه له قطره د جرمني په رامشټاین کې د امریکا پوځي اډې ته تللی دی.

دا په داسې حال کې ده چې طالبانو د سېپټېمبر پر اوومه په کابل کې د سرپرست حکومت اعلان وکړ.

د ملا محمد حسن اخوند په مشرۍ د طالبانو د نوي سرپرست حکومت ټول غړي سړي دي.

ملا محمد حسن اخوند د ملګرو ملتونو په تور لېسټ کې هم شامل دی چې پر دغې په امریکا او ځینو نورو هېوادونو کې اندېښنه هم ښوول شوې ده.

په نوي حکومت کې شامل سراج الدین حقاني د امریکا د پلټنو وفاقي ادارې (اېف بي ای) ته مطلوب دی.

طالبانو نوې کابینه پر داسې مهال اعلان کړې چې د افغانستان په ګڼو سیمو کې د سېپټېمبر پر اتمه هم د ښځو په ګډون خلکو تازه مظاهرې کړې دي.

د ایران لپاره د امریکا ځانګړی استازی د روسیې او اروپا په سفر دی

رابرټ مېلي غواړي چې ایران د ۲۰۱۵ز کال پر اټومي موافقې بشپړ عمل ته وهڅوي - انځور له ارشیفه

د ایران لپاره د امریکا ځانګړی استازی رابرټ مېلي روانه اوونۍ د مسکو او پاریس په سفر دی. د امریکا د بهرنیو چارو وزارت د سېپټېمبر پر اوومه وویل چې مېلي به له روسيو او اروپايي چارواکو سره په ملاقاتونو کې د ایران د اټومي پروګرام په اړه خبرې کوي.

د بهرنیو چارو وزارت په بیان کې ویل شوي چې د سېپټېمبر له اوومې څخه تر ۱۰مې پورې په سفر کې به مېلي له روسيو او اروپايي اتحادیانو سره غږیږي چې د ۲۰۱۵ز کال اټومي موافقې شرطونو ته د ستنېدو په اړه ژر یوه موافقه وشي.

د امریکا پخوانی ولسمشر ډانلډ ټرمپ په ۲۰۱۸ز کال کې له هغه اټومي موافقې وتلی وو او پر ایران یې بیا بندیزونه ولګول چې د هیواد اقتصاد یې اغېزمن کړی دی. د دې په غبرګون کې ایران په ورو ورو د اټومي موافقې له شرطونو په شا شواو د اورانیمو غني کول یې پراخ کړي دي.

په عین حال کې د اټومي انرژۍ نړیوالې ادارې ویلي چې ایران یې ځينو اټومي مرکزونو ته د لاسرسي مخه ډب کړې ده او د ۲۰۱۵ز کال په اټومي موافقه کې له منل شوي کچه یې د اورانیمو غني کولو درجه لوړه کړې. دا خبره ادارې په یو پټ رپورټ کې کړې ده چې غربي خبري اژانسونو یې د سېپټېمبر پر اوومه په اړه خبرونه خپاره کړي.

تهران د دې رپورټونو په غبرګون کې لا څه نه دي ویلي.

بلېنکن راتلونکې اوونۍ د افغانستان په اړه د کانګرس کمېټۍ ته معلومات ورکوي

د امریکا د بهرنیو چارو وزیر اینتني بلېنکن د یوې خبرې غونډې پر مهال - انځور له ارشیفه.

ټاکل شوې ده چې د امریکا د بهرنیو چارو وزیر اینتني بلېنکن راتلونکې اوونۍ د افغانستان د وضعیت په اړه د کانګرس د استازو جرګې د بهرنیو اړیکو کمېټۍ ته معلومات ورکړي.

دې کمېټې سېپټېمبر پر اوومه اعلان وکړ چې بلېنکن به د سېپټېمبر پر ۱۴مه د استازو جرګې ته توضیحات وړاندې کړي.

د استازو جرګې یو شمېر رېپبلېکن استازي له افغانستان سره د ولسمشر جو بایډن پر چلند "سخت انتقاد" کوي.

دوی په دې اړه د کانګرس له لوري د یوې څېړونکې کمېټې د جوړېدو غوښتنه کړې خو ډېموکراټان وايي چې یوه ځانګړې کمېټه به د تېرو ۲۰ کلونو د ټول وضعیت په اړه څېړنه وکړي.

همداراز بایډن په بیا بیا له افغانستانه د خپلو پوځیانو د ایستلو د فیصلې دفاع کړې.

بلېنکن به پر داسې مهال د کانګرس استازو جرګې د بهرنیو اړیکو کمېټۍ ته معلومات ورکوي چې طالبانو د اګست پر ۱۵مه کابل ونیوه او د هغې میاشت تر پایه پورې د امریکا په ګډون یوشمېر غربي هېوادونو خپل وګړي او هغه افغانان له هېواده و ایستل چې ورسره یې کار کړی وو.

د کابل تر نیولو شاوخوا درې اوونۍ وروسته طالبانو د سېپټېمبر پر اوومه سرپرست حکومت اعلان کړ.

کابل کې د پاکستان سفارت مخې ته مظاهره او طالبانو هوايي ډزې کړې

په کابل کې مظاهره

سلګونه کسانو د سېپټېمپر پر اوومه نېټه د کابل په دوو سیمو کې د پاکستان پرضد مظاهرې کړې دي.

په کابل کې په سلګونه مظاهرچیان د پاکستان سفارت مخې ته راټول شوي وو او د ازادۍ شعارونه یې ورکول.د مشال راډیو د خبریال راپور له مخې طالبانو د دې کسانو د خورولو لپاره هوايي ډزې وکړې.

په دې ترڅ کې د چا ټپي کېدو راپور نه دی ورکړل شوی. په دشت برچي کې هم د سېپټېمبر پر اوومه لسګونه ښځو د خپلو حقونو لپاره مظاهره وکړه.

د پاکستان او طالبانو پرضد دا مظاهرې وروسته له هغه کېږي چې د طالبانو مخالفې مقاومت جبهې مشر احمد مسعود افغانان د طالبانو پر ضد عمومي قیام ته راوبلل. په دې لړ کې په بهر کې دېره افغانانو هم مظاهرې کړې دي.

هغه دا غږ د سېپټمپر پر شپږمه نېټه له هغه وروسته وکړ چې طالبانو ادعا وکړه چې د پنجشېر ولايت يې بشپړ نيولی دی. هغه پر ټويټر پاڼه وليکل چې مقاومت به يې دوام لري. د نوموړي د دې غوښتنې په ځواب کې د سېپټېمبر پر شپږمه هم په افغانستان کې دننه مظاهرې وشوې.

د مشال راډیو د فردا څانګې د راپور له مخې په تهران کې هم د سېپټېمبر پر اوومه د افغانستان سفارت مخې ته لسګونه کسانو د طالبانو او پاکستان پرضد شعارونه ورکړل. ورته مظاهرې د سېپېمبر پر شپږمه د امریکا په پلازمېنه واشنګټن ډي سي او سانفرانسسکو ښار کې هم وشوې.

د افغانستان د ملي مقاومت جبهې ویاند علي میثم نظري بېګاه ناوخته په یوه بیان کې ویلي چې په بېلابېلو سیمو کې خلک پاڅېدلي او دا به د خلکو د مبارزې یو نوی باب وي.

د مقاومت ملي جبهې يو مهم مشر او د افغانستان ولسمشر دوېيم مرستيال امرالله صالح په وار وار د ټويټر پاڼې او مرکو له لارې تور پورې کړی چې په افغانستان کې د طالبانو تر شا د پاکستان 'لاس" دی. خو پاکستان تل دغسې تورونه رد کړي او ويلي چې د دې هېواد په چارو کې مداخله نه کوي او په وينا يې يو باثباته او خوشاله افغانستان غواړي.

د پاکستان بهرنيو چارو وزير شاه محمود قريشي د اګست پر ۱۵مه نېټه په ملتان کې خبريالانو ته ويلي ول چې افغانان به د خپل راتلونکې پرېکړه پخپله کوي. هغه دا تور رد کړی وو چې پاکستان د افغانستان په داخلي چارو کې مداخله کوي.

هغه زیاته کړې وه: "نه مو د افغانستان په داخلي چارو کې مداخلت کړی او نه یې په راتلونکې کې کوو. موږ په افغانستان کې د خپلې خوښې [واکمن] نه غواړو او د افغانستان د راتلونکې پرېکړه به افغانان کوي."

نور وښیئ

ځانګړې پاڼې

له موږ سره اړیکي

XS
SM
MD
LG