د طالبانو له وروستیو پرمختګونو او د کابل له نیولو وروسته نېږدې ۶۴ زره بهرنیان او افغانان د کابل هوايي ډګر له لارې له افغانستانه په الوتکو کې وتلي دي.
د امریکا د لوی درستیز د سیمهییزو عملیاتو مرستیال مېجر جنرل هانک ټېلر د اګست پر ۲۴مه ناوخته په ویرجينیا کې يوې خبري غونډې ته وويل چې له افغانستانه يې يواځې په تېر يو شواروز کې ۲۱،۶۰۰ کسان را ويستلي دي.
ټېلر زیاته کړه، "تر اوسه ۶۳،۹۰۰ امریکایان، ناټو او نور ايتلافيان، همدا راز هغه افغانان چې ځانګړې ویزې یې ترلاسه کړې دي او هغه افغانان چې زیان ور واوښت، خوندې شوي او د ښه ژوند په لور درومي."
د ټېلر په وینا، له دې ډلې اکثریت يې د اګست له ۱۵مې وروسته، چې طالبانو کابل نیولی دی، له افغانستانه وتلي دي چې شمېر یې نېږدې ۵۹ زرو ته رسېږي.
