د ناټو د بهرنیو چارو وزیران د اګست پر ۲۰مه د افغانستان پر وضعیت بیړنۍ غونډه کوي.
دا غونډه پر داسې مهال د ویډیو کنفرانس له لارې کېږي چې طالبانو د اګست پر ۱۵مه کابل ښار ونیو.
د ناټو سرمنشي ینز ستولتنبرګ پر خپل ټوېټر لیکلي چې د جمعې په ورځ يې د بهرنیو چارو د وزیرانو د غونډې غوښتنه کړې ده چې دا ډول د افغانستان په اړه د ناټو غړي هېوادونه خپل ګډ دریځ بیان کړي.
ناټو د اګست پر ۱۷مه هم د افغانستان په اړه یوه بیړنۍ غونډه لرله چې پکې ستولتنبرګ خپله حیرانتیا څرګنده کړه چې څرنګه طالبانو کابل داسې ژر ونیو.
