د لاسرسي ځای

تازه خبر

پاکستان جمهوري غورځنګ کراچۍ کې جلسه کوي: مولانا فضل الرحمان


مولانا فضل الرحمان وايي د عمران خان حکومت غیر قانوني دی - انځور له ارشیفه

پاکستان جمهوري غورځنګ (پاکستان ډېموکریټېک موومېنټ یا پي ډي اېم) د اګست پر ۲۹مه په کراچۍ کې د حکومت پرضد د یوې "لویې جلسې" اعلان کړی دی.

پي ډي اېم تور پورې کوي چې پاکستان تحریک انصاف په درغلۍ او د پوځ په مرسته واکمن شوی او دا چې د وزیراعظم عمران خان حکومت د اقتصادي ستونزو په هواري کې پاتې راغلی دی.

حکومت او انتخاباتي کمېشن په بیا بیا ویلي چې د ۲۰۱۸ز کال انتخابات راڼه او منصفانه ول. پوځ هم دریځ لري چې نه خو په سیاسي چارو کې لاسوهنه کوي او نه دې یې څوک پکې د ښکېلولو هڅه کوي.

حکومت همداراز وايي چې اقتصادي ستونزې ورته له پخوانیو حکومتونو په میراث کې پاتې دي چې د هواري هڅې یې کوي.

د پي ډي اېم پلویان د ۲۰۲۱ز کال د جنورۍ پر ۱۹مه د اسلام اباد جلسې پر مهال
د پي ډي اېم پلویان د ۲۰۲۱ز کال د جنورۍ پر ۱۹مه د اسلام اباد جلسې پر مهال

د اپوزیشن د یوشمېر ګوندونو د غورځنګ پي ډي اېم مشر مولانا فضل الرحمان د اګست پر ۱۱مه په اسلام اباد کې تر غونډې وروسته خبریالانو ته وویل، د وزیراعظم عمران خان په مشرۍ حکومت "غیرقانوني او غیراییني" دی.

نوموړي وویل، باید د هېواد ټولې ادارې په خپلو اییني حدونو دننه خپلې ذمه وارۍ پوره کړي.

د مولانا فضل الرحمان په خبره، د حکومت د "ناکامه" بهرنۍ پالیسۍ له کبله پاکستان پر نړیوال کچ یوازې شوی دی.

په عین وخت کې د اطلاعاتو او خپرونو چارو وفاقي وزیر فواد چودري په یوه بیان کې تور پورې کړی چې د مخالفو ګوندونو د غونډو مقصد د پخواني وزیراعظم نوازشریف لپاره اسانۍ پیدا کول دي. شریف په پاکستان کې د درغلۍ له قضیو سره مخامخ دی او اوسمهال په برتانیا کې اوسي. نوموړي تل پر ځان لګېدلي تورونه رد کړي.

پي ډي ایم په داسې حال کې یو ځل بیا د حکومت پر ضد د ولسي غونډو اعلان کړی دی چې پیپلزګوند او عوامي نیشنل ګوند ورڅخه لاری بېلې کړي دي.

پي ډي اېم د ۲۰۲۰ز کال په سېپټېمبر کې جوړ شو او له هغه وخت راهیسې یې د پاکستان په لویو ښارونو کې مظاهرې او جلسې کړې دي.

XS
SM
MD
LG