د لاسرسي ځای

تازه خبر

په جنوبي وزیرستان کې یو سرتېری وژل شوی او نهه ژوبل شوي


دا په داسې حال کې ده چې په دې وروستیو کې په جنوبي وزیرستان کې امنیتي حالت خراب شوی دی.

په جنوبي وزیرستان کې په درو جلا، جلا امنیتي پېښو کې یو سرتېری وژل شوی او نهه ژوبل دي.

د سیمې د پولیسو مشر شوکت علي مشال راډیو ته وویل چې د جولای پر ۱۸مه سهار شاوخوا اووه بجې د لدا تحصیل په بورکۍ کې د پوځ او وسله والو ترمنځ په نښته کې یو سرتېری ووژل شو او څلور ژوبل شول.

د ده په خبره، بل پلو هم نن د ضلعې په بروند سیمه کې د سړک پر غاړه په بمي چاودنه کې دوه سرتېري ژوبل شول چې پکې د یوه روغتیايي حالت خراب دی.

شوکت علي وویل، تر دې مخکې تېر ماخوستن امنیتي سرتېرو په شوال کې د وسله والو پر یوه پټنځي چاپه ووهله چې د ده په وینا، ورباندې وسله والو ډزې وکړې او نښته پیل شوه.

دی زیاتوي چې په نښته کې درې سرتېري برسېرن ټپیان شوي دي. د تحریک طالبان پاکستان ویاند محمد خراساني د درېواړو حملو ذمه واري منلې ده.

دا په داسې حال کې ده چې په دې وروستیو کې په جنوبي وزیرستان کې امنیتي حالت خراب شوی دی.

د جولای پر اتمه په واڼه او تیارزه سیمو کې په دوو جلا، جلا هدفي بریدونو کې یو سوداګر او یو ټېکه دار ووژل شول.

تر دې مخکې وسله والو د جون پر ۲۹مه په تیارزه کې پر پوسته برید وکړ چې پکې درې اېف سي سرتېري ووژل شو او درې ژوبل شول.

تحریک طالبان پاکستان پر پوستې د حملې ذمه واري منلې وه.

په جنوبي وزیرستان او شمالي وزیرستان کې د پاکستان د حکومتي‌ او پوځي مشرتابه له خوا په پوځي‌ عملیاتو کې د کامیابیو پر ادعا سر بېره هدفي وژنې او د بدامنۍ پېښې دوام لري.

په دې پېښو کې زیاتره وخت ځايي‌ قبایلي ، سیاسي مشران، فعالان او امنیتي عسکر هم په نښه کېږي.

پښتون ژغورنې غورځنګ د دې پېښو پرضد په وار وار احتجاجونه کړي او د سیمې پارلماني‌ استازیو په پارلمان کې پر حکومت غږ کړی چې هلته د بدامنیو مخه ونیسي.

حکومت وايي، د پخوا پرتله یې په دواړو سرحدي قبایلي ضلعو کې حالات ښه کړي دي او د لا امنیت لپاره پوره پوره هڅه کوي.

XS
SM
MD
LG