د افغانستان سولې لپاره د امریکا د بهرنيو چارو وزارت ځانګړی استازی زلمی خلیلزاد د جون له څلورمې څخه د کابل او دوحې په ګډون د سیمې د هېوادونو په سفر دی.
د جون پر پينځمه د امریکا بهرنیو چارو وزرات په يوه خبرپاڼه کې ويل شوي چې خلیلزاد به له بېلابېلو چارواکو سره د سولې په اړه خبرې ولري. دا په داسې حال کې ده چې د افغانستان د حکومت مذاکراتي پلاوی له طالبانو سره د درېدلو خبرو د پېليدو په هيله بيا دوحې ته تللی دی.
د امریکا بهرنیو چارو وزارت ويلي، زلمی خلیلزاد به په دوحه کې دواړه لوري وهڅوي چې يو داسې سياسي جوړجاړي ته ورسېږي چې د افغانستان د تېرو دوو لسیزو لاسته راوړنې پکې خوندي وي.
