د پاکستان د سیند صوبې په جنوب کې د مسافرو اورګاډی له پټلۍ اوښتی چې پکې لږ تر لږه یو تن وژل شوی او ۴۰ زخمیان شوي دي.
د ریلوی محکمې یو چارواکي کامران لاشاري رسنیو ته ویلي، دا رېل ګاډی د مارچ پر اوومه سهار مهال له کراچۍ څخه لاهور ته روان وو.
د ده په وینا، د دې اورګاډي ځینې ډبې د روهړي او سانګي سټیشنونو ترمنځ په یوه سیمه کې کندې ته پرېوتې دي.
اسوشیېټیډ پریس ته د امدادي ادارې یو چارواکي محمد ارشد ویلي، په پیښه کې وژل شوې ښځه او ۴۰ زخمیان نیږدې روغتونونو ته وړل شوي دي.
د رېلوی وزیر اعظم سواتي ځايي ټیلي ویژن ته ویلي چې د دې پېښې پلټنې کوي او د مړې شوې ښځې کورنۍ او زخمیانو سره به مالي مرسته کوي.
