د لاسرسي ځای

تازه خبر

خبرونه

ايران کې د کورونا واکسين کمپېن پيل شو

د ايران د روغتيا وزير سعيد نمکي وايي،د هغه زوی به لومړی کس وي چې د روس سپوتنک واکسين به لګوي.

ايران د روسیې کورونا ضد په سپوتنیک وي واکسين د خپلو هېوادولو واکسینولو کمپېن پیل کړ.

د فېبرورۍ پر اتمه نېټه په تهران کې د امام خميني روغتون کې د يوې غونډې پر مهال چې په ټېليويژن په ژوندی بڼه خپره شوه، د ايران د روغتيا وزير سعيد نمکي وويل چې د هغه زوی به لومړی کس وي چې د روس سپوتنک واکسين به لګوي.

د روغتيا مرستيال وزير علي رضا ريسي ويلي چې له کووېډ-۱۹ سره مبارزه کوونکي د صحت کارکوونکي، مشران، معيوبان او پخواني پوځيان به هغه لومړني کسان وي چې واکسين به ورلګېږي.

د سپونتک وي لومړۍ جوپه د فېبرورۍ پر څلورمه نېټه تهران ته رسېدلې وه او چارواکي وايي چې تمه ده چې نور واکسين به د فېبرورۍ پر ۱۸مه او ۲۸مه ورورسېږي.

د روغتيا وزارت وياند کيانوش جهانپور فرانس پرېس اژانس ته ويلي چې دوه ملينه واکسينه يې اخيستې دي.

د نننۍ ورځې ټول خبرونه وګورئ

افغان ځواکونو په هېلمند کې د طالبانو ضد عملیاتو ته دوام ورکړی

افغان پوځ وايي په هېلمند کې یې د هوايي او ځمکنیو بریدونو له لارې وسله وال په شا تمبولي - انځور له ارشیفه

افغان ځواکونو د اګست پر دویمه هم په هېلمند کې د طالبانو پر ضد عملیاتو ته دوام ورکړی او د ولایت د مرکز کنټرول ترلاسه کولو هڅې کوي.

دا په داسې حال کې ده چې د تېرې اوونۍ په پای کې وسله والو د افغانستان پر یو شمېر ښارونو بریدوننه وکړل.

په عین حال کې د هېلمند په مرکز لښکرګاه کې جګړې زور اخیستی دی.

طالبانو په هغه ښار کې تر هغې څو ساعتونه وروسته عملیات پیل کړل چې افغان حکومت پکې د ځانګړو ځواکونو د سلګونه سرتېرو ځای پر ځای کول اعلان کړل.

افغان پوځ وايي، د ځمکنیو او هوايي بریدونو له لارې یې په لښکرګاه کې وسله وال په شا تمبولي دي او حملې یې ناکاموي.

طالبانو په عین وخت کې د کندهار او هرات پر مرکزونو هم حملو ته دوام ورکړی او په تېرو درو ورځو کې د درنو جګړو له وجې زرګونه ملکیان نورو سیمو ته کډه شوي دي.

په مې کې له افغانستانه د بهرنیو پوځیانو د وتلو بهیر له پیل راهیسې هلته جګړو زور اخیستی دی.

پېښور: د ګوزڼ ټیم بدرګه کوونکی پولیس کور ته پر لار ووژل شو

پېښور: یو پولیسوال د ګوزڼ ډلې یوه کارمندې بدرګه کوي چې ماشومانو د ګوزڼ څاڅکي ورکوي. ۲۰۲۱، ۳۰م جولای

د پېښور پوليس وايي په داودزیو سيمه کې وسله والو يو پوليس ویشتلی دی.

د داودزیو تاڼې چارواکو په وينا چې پولیس سرتېری اصف د اګست په لومړۍ نېټه هغه مهال د هدفي برید ښکار شو چې د ګوزڼ واکسین ډلې تر بدرګې وروسته کور ته روان وو.

پوليس وايي د وسله والو پرضد يې مقدمه درج کړې او پلټنې يې روانې دې.

د خيبر پښتونخوا په ۱۸ ضلعو کې د جولای له ۳۰مې راهيسې د ګوزڼ پينځه ورځنی کمپاين پيل شوی او تمه ده چې درې میلیونه او اووه لکه ماشومانو ته د ګوزڼ څاڅکي ورکړل شي. په پاکستان، په تېره، په ګڼ میشتو پښتني سیمو کې د ګوزڼ واکسین ډلې بیا بیا د هدفي بریدونو ښکار کېږي.

یاده دې وي چې د پېښور په کارخانو مارکیټ کې د جولای پر ۳۰مه د پولیسو پر یو ګاډي په لاسي بمي برید کې یو پولیس وژل شوی او یو لاروی ژوبل شوی دی.

د پولیسو خپور کړی بیان کې راغلي ول چې د ضلعي انتظامیې له چارواکو سره پولیس په کارخانو کې د کورونا د احتیاطي لارښوونو د عملي کولو د څارنې په چارو بوخت ول چې پر دغه مهال د سړک غاړې ته ولاړ د پولیسو پر ګاډي یوه نامعلومه تن لاسي بم وغورځاوه.

کورونا زیاته شوې، پر لارښوونو دې عمل وشي: فیصل سلطان

سلطان د اګست پر لومړۍ وویل په هېواد کې د کورونا وایرس پېښې په زیاتېدو دي

د پاکستان د صحت وزیر فیصل سلطان وايي، په تېرو څو ورځو کې په ځینو ښارونو کې د کورونا وایرس ناروغانو شمیر زیات شوی نو باید پر احتیاطي لارښونو عمل یقیني شي.

نوموړي دا خبره د اګست پر لومړۍ نېټه په اسلام اباد کې د پلاننګ وزیر اسد عمر سره یو ځای خبري غونډې ته وکړه.

نوموړي‌وویل په هېواد کې په ملي کچه د کورونا وایرس لپاره د ټیسټونو د مثبتېدو شرح اته اعشاریه اته ته رسیدلې چې په صوبو او ښارونو کې تر دې هم زیاته ده .

په دې موقع وفاقي وزیر اسد عمر وویل چې په پاکستان کې یې تراوسه درې کروړه خلکو ته د کورونا وایرس ضد واکسین لګولي او د دې لپاره یې په هېواد کې ۲۰۰۰ مرکزونه جوړ کړي دي.

دا په داسې حال کې ده چې په پاکستان کې په تېرو ۲۴ ساعتونو کې د کورونا وایرس له وجې ۶۲ کسان مړه شوي دي.

د کویډ-۱۹ وایرس په اړه د معلوماتو ورکولو حکومتي ویبپاڼې د اګست پر لومړۍ نیټه لیکلي چې په تېرو ۲۴ ساعتونو کې د کورونا وایرس نور پنځه زره او ۲۶ کیسونه ثبت شوي او دغسې په دې موده کې له دې وایرسه ۱۴۹۵ کسان بېرته ښه شوي هم دي.

بلخوا له نن څخه په پاکستان کې دننه د هوايي سفر لپاره د کورونا واکسینو سرټيفيکيټ لازمي ګرځول شوی دی.

امریکا او پاکستان د افغان سولې لپاره د هڅو پر دوام سلا شوي: معید یوسف

د پاکستان راډيو د اګست پر لومړۍ پر خپله ویبپاڼه لیکلي چې معید یوسف دا خبره په واشنګټن کې له رسنیو سره په خبرو کې کړې ده.

د پاکستان د ملي امنیت سلاکار معید یوسف ویلي، اسلام اباد او واشنګټن د افغانستان د سولې بهیر لپاره د هڅو پر دوام سلا شوي دي.

د پاکستان راډيو د اګست پر لومړۍ پر خپله ویبپاڼه لیکلي چې معید یوسف دا خبره په واشنګټن کې له رسنیو سره په خبرو کې کړې ده.

بیان د معید یوسف له خولې زیاتوي چې په افغانستان کې د امنیت لپاره په ګډه کار کولو ته ضرورت دی.

نوموړي دا هم ویلي چې په افغانستان کې له بې ثباتۍ سره به مختلفې ترهګرې ډلې یو وار بیا سر راپورته کړي چې د ده په وینا، د نړی او پاکستان لپاره مسلې جوړولای شي.

دا په داسې حال کې ده چې په مې کې له افغانستانه د بهرنیو پوځیانو د وتلو بهیر له پیل راهیسې هلته جګړو زور اخیستی دی.

افغان حکومت او سیاسي مشرتابه پر روان حالت خبرې کړې دي

د ولسمشرۍ ماڼۍ د جولای پر ۳۱مه د لسګونه سیاسي او جهادي مشرانو مشورتي غونډه وربللې وه چې د روان وضعیت په اړه یې پکې خبرې وکړې.

افغان چارواکو په یوه غونډه کې د تلپاتې سولې په ټینګښت او د جګړې پر پای ته رسولو ټینګار کړی دی.

د ولسمشرۍ ماڼۍ د جولای پر ۳۱مه د لسګونه سیاسي او جهادي مشرانو مشورتي غونډه وربللې وه چې د روان وضعیت په اړه یې پکې خبرې وکړې.

د ارګ مرستیال ویاند لطیف محمود په دې اړه رسنیو ته وویل چې له سیاسي او جهادي مشرانو سره په غونډه کې د امنیتي او دفاعي ځواکونو په ملاتړ او د تېرو دوو لسیزو ارزښتونو او اساسي قانون د اصولو پر ساتلو او ځینو نورو موضوعاتو بحث وشو.

دا په داسې حال کې ده چې د هیواد په یو شمېر سیمو کې د افغان امنیتي ځواکونو او وسله والو طالبانو ترمنځ جګړه روانه ده.

تېره شپه هم د کندهار په هوايي ډګر توغندې لګېدلي دي.

دا په داسې حال کې ده چې د طالبانو عملیات له درو لویو ښارونو سره نیږدې روان دي او د افغانستان ځواکونه یې پرضد جنګېږي.

طالبانو د اګست پر لومړۍ نېټه پر هوايي ډګر د راکټونو د ویشتو ذمه واري منلې او ویلي یې دي چې د دې کار مقصد یې د هوايي بمباریو مخنیوی وو.

د هوايي ډګر چارواکو ویلي، توغندیو د هوايي ډګر ځغاستلیک یا رن وې ته زیان رسولی او پروازونه درېدلي خو زیاتوي چې د هوايي ډګر د فعالیتونو بحالولو کار روان دی.

ایران د اسرایل پر کښتۍ په برید کې لاس درلودل رد کړل

د اسرایيل د بهرنیو چارو وزیر یايیر لېپیډ په یو بیان کې ویلي چې نوموړي خپل بريتانوي سيال ته ویلي چې دې پېښې ته کلک غبرګون په کار دی. (انځور: ارشیف)

ایران د اسرایل هغه تورونه رد کړي چې ګواکې تېره اوونۍ د عمان ساحل ته نیږدې د تېلو پر کښتۍ د برید ترشا تهران لاس لري.

د ایران د بهرنیو چارو وزارت ویاند خطیب زاده د اګست پر لومړۍ نېټه تور پورې کړ چې اسرایل په سیمه کې ناامني، ترهګري او تاوتریخوالی پیدا کړی دی.

نوموړي زیاته کړه چې دوی په برید کې د ایران د ښکیلېدو د تورونو غندنه کوي.

خطیب زاده دا هم ویل چې د اسرایل دا تورونه بې بنیاده دي او مقصد یې له حقایقو پام اړول دي.

دا له هغه وروسته ده چې د امریکا د بحري ځواک د بارودي موادو پوهانو وویل، دوی باور لري چې د عمان ساحل ته نېږدې د تېلو پر کښتۍ د ډرون برید شوی چې د عملې دوه کسان پکې وژل شوي وو.

دا خبره د امریکا بحري ځواک د جولای پر ۳۱مه تر هغه یوه ورځ وروسته کړې چې اسراييلو د جولای ۲۹مې د برید تور پر ایران پورې کړ .

لندن مېشتي شرکت زوډیاک میریټایم چې د اسراییلي شتمن کاروباري ایال اوفر د زوډیاک ګروپ برخه ده، ویلي ول چې د جولای پر ۲۹مه یې د مرسر سټريټ په نامه د تېلوو پر ټانکر برید شوی وو خو د برید د نوعيت په اړه یې نور تفصیل نه وو ورکړی.

په برید کې وژل شوي کارکوونکي د رومانیا او برتانیا وګړي ول.

د اسرایيل د بهرنیو چارو وزیر یايیر لېپیډ په یو بیان کې ویلي چې نوموړي خپل بريتانوي سيال ته ویلي چې دې پېښې ته کلک غبرګون په کار دی.

لېپیډ ویلي، ایران یوازې د اسرایيل مسله نه ده بلکې نوموړي تور پورې کړی چې ایران د ترهګرۍ، ورانۍ او بې ثباتۍ یو داسې پیدا کوونکی دی چې ټولو ته زیان رسوي.

بیان زیاتوي چې نړۍ باید د ایران د ترهګرۍ پر وړاندې خاموشه پاتې نشي کوم چې د لېپیډ په وینا، د بېړیو ازاد تګ راتګ ته زیان رسوي.

ایران په ۲۰۲۰م کال کې د وژل شوي خپل لوړپوړي اټومي ساینسپوه د مرګ او پر اټومي ځایونو د یو شمېر بریدونو تور پر اسرايیل پورې کوي.

سوهېلي وزيرستان: وسله وال بريد کې يو عسکر وژل شوی او پینځه ژوبل

د سوهېلي وزيرستان د پولیسو مشر ويلي چې بریدګرو له ځان سره د پوځیانو وسله هم وړې ده.

په سوهېلي وزیرستان کې د وسله والو په برید کې یو امنیتي سرتیری وژل شوی او پينځه نور ژوبل شوي دي.

د سوهېلي وزیرستان د پولیسو مشر شوکت علي نن (جولای ۳۱مه) مشال راډيو ته وويل چې تېر ماښام وسله والو په تیارزه سیمه کې د پوځ پر یوه پوسته برید کړی دی چې شپږ پوځیانو ته یې مرګ ژوبله اړولې ده. ټپيان د درملنې لپاره د ډېره اسماعیل خان روغتون ته رسول شوي دي.

نوموړي زیاته کړه چې په سیمه کې یې د امنیت پر ځای کولو لپاره هلې ځلې ګړندۍ کړې دي او په شاوخوا سیمو کې یې عملیات پیل کړي دي.

د پولیسو مشر وویل چې بریدګرو له ځان سره د پوځیانو وسله هم وړې ده.

د تحریک طالبان پاکستان ویاند محمد خراساني مشال راډیو ته په رالیږلي یو بیان کې د دې بريد ذمه واري منلې ده.

اسراییل د عمان په سمندرګي کې د تیلو پر یوه ټانکر برید کې ایران تورن ګڼلی

زودیاک شرکت ویلي، پر دې ټانکر د لایبریا بیرغ رپېده او د جولای پر ۲۹مه بريد ورباندې وشو. (انځور: ارشيف)

اسرایيل پر ایران تور پورې کړی چې د عمان په سمندرګي کې یې د دوی تر انتظام لاندې د تېلو ټانکر په نښه کړی چې دوه کارکوونکي پکې وژل شوي دي.

ویل شوي چې په دې بريد کې د رومانیا او بريتانیا دوه وګړي وژل شوي خو د برید په اړه نور معلومات نه دې ورکړل شوي.

زودیاک شرکت چې مرکز یې په لندن کې دی، ویلي، پر دې ټانکر د لایبریا بیرغ رپېده او د جولای پر ۲۹مه بريد ورباندې وشو. د دې ټانکر چارې د اسراییل په لاس کې وې.

د اسرایيل د بهرنیو چارو وزیر یايیر لېپیډ په یو بیان کې ویلي چې نوموړي خپل بريتانوي سيال ته ویلي چې دې پېښې ته کلک غبرګون په کار دی.

لېپیډ ویلي، ایران یوازې د اسرایيل مسله نه ده بلکې نوموړي تور پورې کړی چې ایران د ترهګرۍ، ورانۍ او بې ثباتۍ یو داسې پیدا کوونکی دی چې ټولو ته زیان رسوي.

بیان زیاتوي چې نړۍ باید د ایران د ترهګرۍ پر وړاندې خاموشه پاتې نشي کوم چې د لېپیډ په وینا، د بېړیو ازاد تګ راتګ ته زیان رسوي.

د ایران لخوا تر اوسه په دې اړه څه نه دې ویل شوي. ایران په ۲۰۲۰م کال کې د وژل شوي خپل لوړپوړي اټومي ساینسپوه د مرګ او پر اټومي ځایونو د یو شمېر بریدونو تور پر اسرايیل پورې کوي.

عراق: د جنازې پر مراسمو بريد کې اته کسان وژل شوي

د عراق یوه امنیتي مسوول څرګنده کړه چې د پولیسو په ګډون اته تنه هغه وخت ووژل شول چې وسله والو ډزې ورباندې وکړې. (انځور: ارشيف)

د عراق پوځ په یوه بیان کې چې پرون (د جولای۳۰مه) خپور شوی، ويلي چې د دې هېواد په شمال کې د جنازې د مراسمو پر مهال یو شمېر کسان وژل شوي، خو د دې تلفاتو دقیق شمېر او ځای ته یې اشاره نه ده کړې.

د عراق یوه امنیتي مسوول څرګنده کړه چې د پولیسو په ګډون اته تنه هغه وخت ووژل شول چې وسله والو ډزې ورباندې وکړې.

دغه چارواکي په دې شرط چې نوم به یې نه اخیستل کېږي، دا هم وویل چې دا برید اسلامي دولت وسله والې ډلې (داعش) کړی دی.

عراقي ځواکونو درې کاله مخکې له داعش څخه ټولې هغه سیمې ونیولې چې دې ډلې لاندې کړې وې، خو لا هم د دې ډلې وسله والو په عراق کې خپلو بریدونو ته دوام ورکړی.

ملګرو ملتونو، امريکا او ناټو په هرات کې د یوناما پر دفتر برید وغانده

یوناما وايي، د دولت ضد وسله والو مخالفینو د ملګرو ملتونو د دفتر دروازه په داسې حال کې په توغندي او مرمیو په نښه کړې ده چې د ملګرو ملتونو نښې او علامې په روښانه ډول پرې ښکاري.

ملګرو ملتونو، امریکا او ناټو په هرات کې د یوناما پر دفتر برید په سختو ټکو وغانده.

د افغانستان د هرات ښار په شاوخوا سیمو کې پرون (د جولای ۳۰مه) د وسله والو طالبانو او دولتي ځواکونو ترمنځ درنې نښتې وشوې.

په افغانستان کې د ملګرو ملتونو مرستندويه ماموريت (یوناما) په یوه بیان کې چې تېر ماښام خپور شوی، ویلي چې په دې برید کې د دوی د دفتر یو پولیس وژل شوی او یو شمېر نور پولیس افسران ټپیان شوي دي، خو د ملګرو ملتونو کارکوونکو ته زیان نه دی اوښتی.

یوناما وايي، د دولت ضد وسله والو مخالفینو د ملګرو ملتونو د دفتر دروازه په داسې حال کې په توغندي او مرمیو په نښه کړې ده چې د ملګرو ملتونو نښې او علامې په روښانه ډول پرې ښکاري.

د یوناما په بیان کې یادونه شوې چې د ملګرو ملتونو پر دفتر او ملکي کارکوونکو برید د نړیوال قانون پر اساس منع دی او کېدای شي چې جنګي جرم وبلل شي.

یوناما غوښتنه کړې چې د دې برید ترسره کوونکي باید وپېژندل شي او حساب کتاب ورسره وشي.

د وسله والو طالبانو ویاند ذبیح الله مجاهد پر خپل ټویټر لیکلي چې د یوناما دفتر د جګړې سیمې ته نيږدې دی چې ښایي د جګړې پر مهال یې ساتونکو ته زیان رسېدلی وي، خو د نوموړي په وينا سیمې ته د طالبانو له رسېدو سره دا دفتر خوندي شو.

د وسله والو طالبانو لخوا په دا وروستيو کې په بريدونو کې له زياتوالي وروسته يوشمېر دولتي ودانيو او عامه تاسيساتو ته هم زيانونه اوښتي دي.

لغمان: پر کابل- جلال اباد لویې لارې ټرافیکې پېښو ۲۰ تنه وژلي

د افغانستان په لغمان ولايت کې له دې وړاندې هم ټرافيکو پېښو مرګ ژوبله اړولې ده. (انځور: ارشيف)

پر کابل- جلال اباد لویه لاره د موټرو د ټکر په دوو جلا جلا پېښو کې ۲۰ تنه وژلي او ۱۸ نور ټپیان شوي دي.

د افغانستان د لغمان ولايت د والي ویاند اسدالله دولت زي نن (د جولای ۳۱مه) مشال راډیو ته وویل چې تېره شپه ناوخته د قرغیو ولسوالۍ اړوند نارنج باغ سیمه کې د یوه کاسټر او سراچه موټر د ټکر له امله اته تنو خپل ژوند له لاسه ورکړ او ۱۰ نور ټپیان شوي دي.

د دولت زي په خبره، په ټپیانو او مړو کې مېرمنې او کوچنیان هم شامل دي. نوموړی زیاتوي، دغه راز پر همدې لار نن سهار د لغمان د قرغیو ولسوالۍ اړوند عزیز خان کڅ سیمه کې د یوې ټوډي موټر او دوه سراچه ډوله موټرونو د ټکر له امله ۱۲ تنه مړه شوي او اته نور سخت ټپیان شوي دي.

افغان حکومت وايي، اسناد ښيي چې سلسله عليخېل تښتول شوې

په اسلام‌اباد کې د افغانستان د سفیر لور سلسله عليخېل. انځور- ارشیف

د افغانستان د بهرنیو چارو وزارت وايي، ټول ترلاسه شوي اسناد ښيي چې په اسلام اباد کې د افغانستان د سفیر لور د جولای پر ۱۶مه تښتول شوې او شکنجه شوې ده.

د افغانستان د بهرنیو چارو وزارت دا خبره د جولای پر ۲۹مه له هغه وروسته په یوه اعلامیه کې وکړه چې د پاکستان وزیراعظم عمران خان وویل، د افغانستان د سفیر لور سلسله علیخېل له پاکستانه وتلې خو په ترلاسه شویو تصویرونو کې نه ثابتېږي چې هغه دې تښتول شوې یا ځورول شوې وي.

خو د افغانستان د بهرنیو چارو وزارت وايي، هېڅ دلیل هغه جرم توجیه کولای نه شي چې د طبي راپورونو او نورو اسنادو پر اساس ثابت شوی وي.

د افغانستان بهرنیو چارو وزارت همداراز وايي، د پاکستان حکومت له نړیوالو ژمنو او تړونونو سره سم د ډیپلوماتیکو استازیو، افغان ډیپلوماتانو او د هغوی د کورنیو غړیو د امنیت ساتنې ذمه واري لري.

دغه وزارت له پاکستانه غوښتي چې د پېښې د څېړنې په اړه خپلې هڅې چټکې کړي، د هغې عاملان سمدستي ونیسي او سزا ورکړي.

افغانستان د دې پېښې په اعتراض کې خپل سفیر او ډیپلوماتان له اسلام اباد څخه وربللي دي.

د پاکستان حکومت د کورونا وایرس مخنیوي لپاره بیا بندیزونه اعلان کړل

پېښور کې یو روغتیاپال یو کس ته د کووېډ-۱۹ واکسینو ستن لګوي. انځور - ارشیف

پاکستان د کورونا وایرس د څلورمې څپې د مخنیوي لپاره ځینې بندیزونه اعلان کړي او پر ولس یې غږ کړی چې د اګست تر ۳۱مې نېټې پورې واکسین ولګوي.

د جولای پر ۲۹مه په اسلام اباد کې د کورونا مخنیوي د قامي ادارې له غونډې وروسته یوه خبري کانفرنس ته په وینا کې د منصوبه بندۍ او پرمختیا وفاقي وزیر اسد عمر وویل چې حکومت هغه کسانو ته د واکسین لګولو لپاره د اګست ۳۱مه نېټه ټاکلې چې له وایرسه د زیات اغېزمنېدو له خطر سره مخامخ دي.

نوموړي زیاته کړه چې له ۱۸ کالونو د ډېر عمر زده کوونکي د قانون عملي کولو د ادارو ملازمین او په هوټلونو او شادي هالونو کې کارکوونکي به د اګست تر ۳۱مې نېټې وړاندې واکسین لګوي.

په عین حال کې به د سکولونو استادان د اګست تر لومړۍ نېټې پورې د واکسینو لګولو عمل پوره کوي.

د سيند حکومت هم د کورونا وبا د مخنيوي لپاره سر له سبا د جولای له ۳۱مې د اګست تر اتمې نېټې د کراچۍ په ګډون د صوبې په نورو ښارونو کې د ټولبند لګولو اعلان کړی دی.

د سیند وزير اعلا مراد علي شاه په مشرۍ په غونډه کې پرېکړه شوې، که سرکاري کارمندانو د اګست تر ۳۱مې ځان واکسین نه کړ نو تنخاګانې به یې نه ورکول کېږي. د ټولبند د نوې لارښوونو له مخې به ځینې صنعتونه پرانیستي وي او له راتلونکې اونۍ څخه به ټول سرکاري دفترونه وتړل شي.

په غونډه کې د سيند دروغتيا وزرات په خپل رپور کې ويلي چې په سيند کې کرونا وايرس د خپروېدو شرحه ۱۳ فيصده اوپه ځانګړي توګه په کراچۍ کې ۲۳ فيصدو ته رسېدلې ده.

بلخوا د کورونا په اړه سرکاري شمېرې ښيي چې په پاکستان کې په تېر یوه شواروز کې کورونا وایرس نور څلور زره څلور سوه اووه نوي (۴۴۹۷) کسان وهلي او نور ۷۶ یې وژلي دي. وایرس تر ټولو ډېر خلک په سیند او پنجاب صوبو کې ځپلي دي.

پېښور کې لاسي بم برید یو پولیس وژلی او بل تن ژوبل

په پېښور کې پولیسو د عملیاتو پر مهال. انځور - ارشیف

د پېښور په کارخانو مارکیټ کې د جولای پر ۳۰مه د پولیسو پر یو ګاډي په لاسي بمي برید کې یو پولیس وژل شوی او یو لاروی ژوبل شوی دی.

د پولیسو خپور کړی بیان وايي چې د ضلعي انتظامیې له چارواکو سره پولیس په کارخانو کې د کورونا د احتیاطي لارښوونو د عملي کولو د څارنې په چارو بوخت ول چې پر دغه مهال د سړک غاړې ته ولاړ د پولیسو پر ګاډي یوه نامعلومه تن لاسي بم وغورځاوه.

د بیان له مخې په برید کې د امین په نوم یو پولیس واله سخت ژوبل شو چې په سمدستي توګه حیات آباد میډیکل کمپلیکس ته ورسول شو.

د یاد روغتون د ویاند په خپاره کړي بیان کې راغلي چې پولیس اهلکار په مړ حالت کې روغتون ته وروړل شوی دی.

په دغه پېښه کې یو بل لاروی هم برسېرن زخمي شوی چې په حیات آباد میډیکل کمپلیکس کې له درملنې وروستو کور ته استول شوی دی.

پاکستان کې کورونا وایرس په تېر یوه شواروز کې ۷۶ کسان وژلي

په پينډۍ کې خلک د هغه خپلوان مړی لیږدوي چې له کورونا وایرسه مړ شوی دی

پاکستان کې نیشنل کمانډ اېنډ اپرېشن سېنټر د جولای ۲۹مه پر خپله ټويټر پاڼه ليکي چې په تېرو ۲۴ ساعتونو کې د کورونا وايرس څه دپاسه ۵۹ زره ټېسټونه شوي چې پکې په څلور زره ۴۹۷ کسانو کې د کورونا وايرس موندل شوی دی.

د پاکستان صحت څانګه وايي چې په تېرو ۲۴ ساعتونه کې تر ۱۶۱۲ کسان له دې ناروغۍ جوړ شوي هم دي.

دا په داسې حال کې ده چې په پاکستان کې یو ځل بیا د کورونا وایرس پېښې زیاتې شوي دي.

افغانستان کې د جګړې زیاتولي ولسي مرګ ژوبله زیاته کړې: سيګار

راپور زياتوي، د ملکيانو مرګ ژوبله زياتېدل روان دي.

د افغانستان د بیارغونې لپاره د امریکا ځانګړې پلټونکې ادارې (سيګار) ويلي، په هغه هېواد کې د طالبانو پراخ عملیات د حکومت لپاره لوی بحران پيدا کوي.

دا په داسې حال کې ده چې امريکا له مهالوېش سره سم د اګست تر پایه له افغانستانه خپل ټول بهرني پوځيان باسي.

سيګار د جولای پر ۲۹مه د امريکا ګانګرس ته په خپل درې مياشتني راپور کې يادونه کړې چې د واشنګټن او طالبانو ترمينځ موافقه د ۲۰۲۰ز کال په فبرورۍ کې په قطر کې شوې او پرځای د دې چې له افغان حکومت سره د سولې خبرې وکړي وسله والو پر داسې مهال بريدونو ته زور ورکړ چې افغان ځواکونه تيار نه ول او د ملکيانو وژنې زياتې شوې.

راپور وايي، تر موافقې مخکې طالبانو په درو مياشتو کې پر افغان ځواکونو ټول ۶،۷۰۰ بريدونه کړي ول خو د تېر کال له سېپټمبره تر نومبر پورې د بريدونو شمېر ۱۳،۲۴۲ ته ورسېد.

سيګار په افغانستان کې د امريکا او ناټو د ګډ ځواک د معلوماتو په اساس ويلي چې د جګړو زیاتوالی د ملکي وګړو د مرګ ژوبلې زياتېدو لامل شوی دی.

راپور وايي، تېر کال په لومړیو دریو میاشتو کې په تاوتريخوالي کې ۵۱۰ کسان وژل شوي او ۷۰۹ ژوبل شوي ول. خو د پروسږکال له جولای څخه تر سېپټمبره په تاوتريخوالي کې ۱۰۵۸ کسان وژل شوي او ۱،۹۵۹ ژوبل شوي دي.

راپور زياتوي، د ملکيانو مرګ ژوبله زياتېدل روان دي.

حمد الله محب د اروپايي ټولنې له استازي سره پر افغانستان غږېدلی

د افغانستان لپاره د اروپایي ټولنې ځانګړي استازي تامس نیکولسن د افغانستان د ملي امنیت له سلاکار حمد الله محب سره وکتل.

د افغانستان لپاره د اروپایي ټولنې ځانګړي استازي تامس نیکولسن د افغانستان د ملي امنیت له سلاکار حمد الله محب سره د افغان سولې پر هڅو، د جګړې د ډګر پر وضعیت، په جنګ کې د قوانینو د عملي کولو او ګډو لاسته راوړنو پر خوندیتوب خبرې وکړې.

د ملي امنیت شورا په یوه بیان کې ویلي دي چې دا خبرې د جولای پر ۲۸مه په کابل کې وشوې.

نیکولسن بیا د دې لیدنې کتنې په اړه په ټویټر لیکلي چې د افغانستان د امنیتي وضعیت په اړه، چې په تېرو څو میاشتو کې بدلون پکې راغلی دی او د سولې د خبرو ګړندیتوب په اړه یې له محب سره ګټورې خبرې کړې دي.

امریکا او هند د افغانانو لاس ته راوړنې خوندي ساتلو لپاره د ګډو هڅو هوډ ښودلی

انتوني بلېنکن او اېس جی شنکر د جولای پر ۲۸مه په نوي ډیلي کې د لیدو پر مهال.

د امريکا او هند دوو لوړ پوړو ډپلوماټانو په نوي ډیلي کې د جولای پر ۲۸مه د دواړو هېوادونو ترمینځ د امنيتي همکارۍ پر پراخولو هوډ ښودلی دی.

واشنګټن د افغانستان په ثبات کې د هند مرسته (زياته مهمه) بللې ده.

د امريکا بهرنيو چارو وزير انتوني بلېنکن او د هغه هندي سيال سبرامانين جېشنکر خپل ملاقات د هند ارام سمندرګي کې د چين زياتېدونکی زور ښوونې په وړاندې او دا راز له افغانستانه د نړيوالو ځواکونو د وتلو بهير په لړ کې د دواړو هېوادونو د اتحاد ښوونې د يوې هڅې په توګه ياد کړی.

خبرې غونډې ته بلېنکن وويل چې دواړه د نړۍ مخکښه جمهوري هېوادونه دي چې تنوع يې د ملي طاقت سرچينه ده.

نوموړي وويل چې په داسې حال کې چې امريکايي او نړيوال ځواکونه د اګست تر پای پورې له افغانستانه وځي نو د دې هېواد په اړه د هند رول مهم دی.

هغه زياته کړه چې دوی به په ګډه کار کوي چې له افغانستانه د ايتلافي ځواکونو تر وتلو وروسته د افغانانو لاس ته راوړنې پرځای وساتي او د سیمه ييز ثبات ملاتړ وکړي.

سیند پولیسو هغه تن ونيولی چې په زوره يې په هندو هلک د الله اکبر نعرې وهلې وې

د سیند پولیسو پر یوه هندو هلک تشدد کوونکې یو تن نیولی او د هغه خلاف یې د مذهب د سپکاوي مقدمه درج کړې ده.

د سیند حکومت ویاند مرتضی وهاب د جولاۍ پر ۲۷مه (پرون)، په کراچۍ کې یوې خبري غونډې ته وویل چې حکومت دې واقعې په اړه د معلوماتو تر لاسه کولو وروسته ګامونه اخیستي.

د سیند پولیس وايي چې په پېښه کې تورن کس عبدالسلام د ضلع تهر پارکر په ميټي سيمه کې د مکېش په نوم یو هندو هلک ووهلو او پر هغه یې په زوره د الله اکبر او د مسلمانانو په حمایت کې نعرې ووهلې. د دغه ټول عمل ویډیو یې جوړه کړه او په سوشل میډیا یې هم خپره کړه. پولیس وايي د واقعاتو تحقیقات روان دي.

د ۲۰۱۷م کال د مردم شمارۍ شمېرې ښيي چې په پاکستان کې تر ۳۵ لاکه زیات هندوان ژوند کوي چې زیاتره یې په سیند کې اباد دي.

په خوست کې افغان ځواکونو یوشمېر وسلې، مهمات او ماینونه نیولي

په خوست کې نیول شوي پوځي وسلې.

د خوست د ملي امنیت ځواکونو د جولای پر ۲۷مه شپه د ګربزو ولسوالۍ د منګلو په کلي کې له یوه کوره یوه اندازه وسلې، مهمات، ماینونه او نور پوځي تجهیزات نیولي دي.

د ملي امنیت ځواکونو نیول شوې وسلې، مهمات، ماینونه او نور پوځي تجهیزات د یاد ریاست په انګړ کې رسنیو ته وښودل.

نن جولای پر ۲۸مه خوست والي مومند کټوازي مشال راډیو ته وویل، چې د یادو وسلو په تور یو کس هم نیول شوی، چې دا مهال ورڅخه پوښتنې ګرویږنې روانې دي.

د ده په وینا په نیول شویو وسلو او مهماتو کې ۴۰ ډوله بېلابېل پوځي تجهیزات شامل دي.

خوست والي وویل، د دوی کشفي او استخباراتي مالومات ښيي، چې وسله وال مخالفین هڅه کوي، په خوست کې د قومونو او خلکو تر منځ اختلافات پیدا کړي او په واسطه يې دا ولایت نا امنه کړي.

خوست والي له خلکو وغوښتل، چې د هر ډول ورانکارو عملونو په شنډولو او د پېښېدونکو مالي او ځاني زیانونو په مخنیوي کې دې له افغان امنیتي او دفاعي ځواکونو سره مرسته وکړي.

د خوست امنیتي ځواکونو یوه میاشت مخکې په ښار کې له ۴ ټنه چاودیدونکو توکو ډک موټر هم نیولی او شنډ کړی وو.

اوس هېڅوک طالبان سولې ته نه شي اړ اېستلی: عمران خان

د پاکستان وزیر اعظم عمران خان

د پاکستان وزیراعظم عمران خان وايي، اوس خورا ګرانه ده چې طالبان سیاسي روغې جوړې ته مجبوره کړل شي.

عمران خان له پي بي اېس نیوز ټلوېزیون سره په مرکه کې امریکا د افغانستان د حالاتو د خرابولو مسووله وبلله، ویې ویل، کله چې شااوخوا یو نیم لک امریکايي پوځیان په افغانستان کې مېشت وو، د سیاسي روغې جوړې امکان وو، خو کله چې یې ۱۰ زره سرتېري وااېستل او د نورو د اېستلو مهالوېش یې اعلان کړ، طالبانو فکر وکړ چې جګړه یې ګټلې ده.

عمران خان وویل، اوس هېڅوک طالبان سولې ته اړ اېستلی نه شي.

د افغانستان حکومت پاکستان د طالبانو په ملاتړ تورنوي او وايي چې په وروستیو کې له پاکستانه زرګونه طالبان او نور سخت دریځي د جګړې لپاره افغانستان ته وراوښتي دي.

خو عمران خان له پي بي ایس سره په مرکه کې دا تور بې اساسه وباله.

په سیند کې کاروباري مرکزونه بیا پرانیستل کېږي

دا په داسې حال کې ده چې په پاکستان کې یو ځل بیا د کورونا وایرس پېښې زیاتې شوي دي. انځور - ارشیف

د سیند حکومت په صوبه کې کاروباري مرکزونه د سهار له شپږو د ماځیګر تر شپږو بجو د پرانیست ساتلو اعلان کړی.

دغه فیصله د جولای پر ۲۷مه په کراچۍ کې د وزیراعلا سید مراد علي شاه په مشرۍ په یوه غونډه کې شوې.

صوبایي حکومت وایي، په دغه صوبه کې د کورونا کېسونه په زیاتېدو دي نو ځکه یې فیصله کړې چې د صوبې ټول کاروباري مرکزونه به د ماځیګر پر شپږ بجو تړل کېږي او پر خلکو یې غږ کړی چې د غیرضروري تګ راتګ نه دې هم ډډه وکړي.

دا په داسې حال کې ده چې په پاکستان کې یو ځل بیا د کورونا وایرس پېښې زیاتې شوي دي.

په دغه هېواد کې په تېرو ۲۴ ساعتونو کې د کورونا وایرس ۴۱۱۹ کېسونه رپوټ شوي دي او د سرکاري شمېرو له مخې په تېرو ۲۴ ساعتونو کې د دغه وایرس له وجې ۴۶ کسان مړه شوي دي.

امریکا په ځینو ځایونو کې تمبوزک وهل لازمي ګرځولي

امریکايي چارواکي وايي، ځینې نوي مالومات ښيي چې ځینې واکسین شوي کسان هم دغه وایرس نورو ته منتقل کولای شي.

د امریکا د ناروغیو د کنټرول او مخنیوي مرکزونو د کورونا وایرس د زیات خپرېدونکې بڼې ډېلټا د خپرېدو له ویرې په بشپړه توګه واکسین شویو خلکو ته هم سپارښتنه کړې چې په ځینو عمومي ځایونو کې چې په ودانیو کې دننه دې تمبوزک واچوي.

دغه ادارې د جولای پر ۲۷مه ټولو زده کوونکو، استادانو او د ماشومانو (وړکتون) څخه تر د ۱۲م ګرېډ سکولونو واکسین شویو کار کوونکو ته هم د ماسکونو اچولو ویلي.

دا اعلان د هغې برعکس دی چې کله د تېرې مې په میاشت کې په میلیونونو هغو امریکایانو چې واکسین شوي وو له روغتونونو او عامه ټرانسپورټ څخه پرته په نورو ځایونو کې یې ماسکونه لیرې کړل.

د امریکا د ناروغیو د کنټرول او مخنیوي ادارې مشرې روشیل والېنسکي ویلي، دا نوی وړاندیز د ډېلټا بڼې په اړه د اندېښنې وړ ساینسي مالوماتو وروسته شوې دي. نوموړې ویلي واکسین د ډېلټا بڼې خلاف هم زیات کار کوي خو ځینې نوي مالومات ښيي چې ځینې واکسین شوي کسان هم دغه وایرس نورو ته لېږدولای شي.

د پاکستان او سعودي د بهرنیو چارو وزیران پر کشمیر او افغانستان غږېدلي

د پاکستان بهرنیو چارو وزير شا محمود قریشي له خپل سعودي سیال سره د خبرو پر مهال.

د پاکستان بهرنیو چارو وزير شا محمود قریشي وايي، له خپل سعودي سيال شهزاده فیصل بن فرحان السعود سره يې د کشمير او افغانستان په مسلو خبرې کړي دي.

د سعودي عرب بهرنېو چارو وزير چې د جولای پر ۲۷مه د پاکستان په يو ورځني سفر دی له نوموړي سره په اسلام اباد کې تر ملاقات وروسته شاه محمود قریشي خبري غونډې ته وويل چې سعودي عرب د کشمير په مسله کې ډېر واضحه دريځ خپل کړی دی:

"دوی په دغې کې د پاکستان په ملاتړ کولو سره ښکاره دريځ او مستقل مزاجې ښودلې. موږ په افغانستان کې د راپورته کېدونکو حالاتو په اړه هم خبرې کړې چې دارنګ دې لړ کې څه چېلنجونه دي او څه موقعې دي."

شا محمود قرېشي د دې دواړو موضوعاتو نور تفصيل ورنکړ خو دا په داسې حال کې ده چې په دې وروستيو کلونو کې د کشمیر پر سر د اسلامي هیوادونو د تنظيم او ای سي غونډې د نه رابلل کېدو پر سر د پاکستان له سعودي عرب سره اړيکې زيانمنې شوي نو بلخوا بيا د پاکستان په ګاونډي هېواد افغانستان کې هم د طالبانو بريدونه زيات شوي دي.

په عراق کې جنګي ماموریت ختموو: بایډن

د امریکا ولسمشر د جولای پر۲۶مه په سپینه ماڼۍ کې د عراق له وزیراعظم مصطفی الکاظمي سره د ملاقات پر مهال.

د امریکا ولسمشر جو بایډن وايي، د روان کال تر پای به امریکايي ځواکونه په عراق کې جنګي ماموریت ختم کړي خو عراقي ځواکونو ته د سلا مشورو او روزنې ورکولو رول به جاري ساتي.

نوموړي دا خبرې د جولای پر۲۶مه په سپینه ماڼۍ کې د عراق له وزیراعظم مصطفی الکاظمي سره تر ملاقات وروسته وکړې.

هلته د امریکا د بهرنیو چارو وزارت لخوا جاري کړل شوې د امریکا او عراق په ګډه اعلامیه کې ویل شوي چې د دواړو هېوادونو امنیتي اړیکې به په روزنې، لارښوونو او د خفیه معلوماتو په شریکولو مرکوزې وي.

واشنګټن سږکال د اپریل میاشت کې هم ویلي وو چې په عراق کې د مېشتو ۲۵۰۰ امریکايي ځواکونو کردار به عراقي ځواکونو ته په روزنې او سلا مشورو بدل شي خو دا نه وو ویل شوي چې بدلون به کله کېږي.

د سپينې ماڼۍ ویاند جېن ساکي په دې اړه له څه ویلو ډډه وکړه چې په عراق کې مېشت ۲۵۰۰ امریکايي ځواکونو کې به څومره د روان کال تر پای په دغه هېواد کې پاتې شي.

له تېرو اوو کلونو راهیسې د امریکا په مشرۍ اتحادي ځواکونه په عراق کې د داعش پرضد جګړه کوي، یادې وسله والې ډلې دغه هېواد له ګواښ سره مخ کړی دی.

نور وښیئ

ځانګړې پاڼې

له موږ سره اړیکي

XS
SM
MD
LG