د لاسرسي ځای

تازه خبر

د هزاره ګانو د پرلت تر ختمېدو وروسته عمران خان کوټې ته تللی


پرلت والو پخوا ویل، تر څو وزیراعظم ورغلی نه وي، خپل مړي نه ښخوي.

د پاکستان وزیراعظم عمران خان له هغه وروسته کوټې ته تللی چې هلته د هزاره ګانو پرلت ختم شوی او هغوی د وژل شویو خپلوانو مړي خاورو ته سپارلي دي.

د هزاره ګانو مشرتابه د کوټې پر غربي بای پاس سړک خپل پرلت له هغه وروسته پای ته رسولی چې د دوی په وینا له حکومتي وزیرانو سره یې خبرې اترې بریالۍ شوې دي.

دوی د جنورۍ پر نهمه خپل مړي‌ له هغه وروسته خاورو ته وسپارل چې تېره شپه یې تر ناوخته د وفاقي او صوبايي وزیرانو له یو پلاوي سره خبرې بریالۍ شوې.

تېره شپه ناوخته د بلوچستان وزیراعلا جام کمال، وفاقي وزیران علي زیدي، ذولفي بخاري او د قومي اسمبلۍ مرستیال سپیکر قاسم سوري د احتجاج کوونکیو خوا ته ورغلي وو او د هغوی له مشرانو سره یې خبرې وکړې.

وفاقي وزیر علي زیدي د پرلت له برخه والو سره د خبرو د کامیابي اعلان وکړ او ویې ویل چې حکومت د پرلت د برخه والو زیاتره غوښتنې منلې دي او تړون یې هم لاس لیک کړی دی.

ده وویل، "کومې غوښتنې چې د شهیدانو کمیټۍ د حکومت مخې ته یښې وې، په هغه کې ځیني مشکل وې - خو د ولس لپاره هڅ هم مشکل نه وي."

د بلوچستان اعلا وزیر جام کمال خان وویل د ولس تحفظ کول د حکومت ذمه داري ده او د دې مقصد لپاره صوبايي او مرکزي حکومت ډیر ګامونه پورته کړي دي.

د جام کمال په وینا، د دې ګامونو اغېز به ډیر ژر څرګند شي.

جام کمال خان زیاته کړه، "زه ولس ته تسلي ورکوم چې حکومت به په کوټه او د صوبې په نورو برخو کې امنیت راولي - خلګو ته به انصاف او روز ګار ورکوي چې خلک د عادي ښاري په توګه په ازاده په دې ښار کې وګرځېدلای شي."

راپورونه وايي، د احتجاج کوونکیو ډېری غوښتنې منل شوي او حکومتي ډلې د هغې خبرې وضاحت هم کړی چې پکې وزیراعظم د جنورۍ په اوومه ویلي وو، د هزاره ګانو ټولې غوښتنې یې منلې دي خو لومړی دې هغوی خپل مړي خاورو ته وسپاري، او کوټې ته د ورتګ په غوښتنه دې د بدنامۍ ګواښ نه ورکوي.

د وزیراعظم عمران خان پر دې وینا په ټولنیزو رسنیو کې سخت تنقید و شو. نومړي ویلي وو چې احتجاج کوونکي دې خپل مړي خاورو ته وسپاري نو به دی سم دستي کوټې ته ورشي.

دا له هغه وروسته ده چې وسله والو د جنورۍ پر درېیمه د بلوچستان په مچ سیمه کې ۱۱ هزاره کانکېندونکي په ډزو وژلي وو او د پېښې ذمه واري داعش وسله والې ډلې منلې وه.

د وژل شوو خپلوانو د احتجاج په توګه د مړو له ښخولو انکار وکړ او تر شپږو ورځو یې مړي د پرلت په منځ کې یښي وو.

د پرلتوالو وېنا وه چې تر څو وزيراعظم عمران خان نه وي ورغلی او د خوندیتوب ډاډ یې نه وي ورکړی، تر هغه وخته به خپل مړي خاورو ته نه سپاري.

د کوټې له هزاره ګانو سره د یووالي په غرض په کراچۍ، پېښور، ډېره اسماعیل خان، اسلام اباد او ځینو نورو ښارونو کې هم احتجاجونه شوي دی.

XS
SM
MD
LG