د لاسرسي ځای

تازه خبر

د کریمې بلوڅ د مرګ لا پلټنې دې وشي: نیویارک مظاهره


د امریکا په نیویارک کې د کینیډا سفارت مخې ته د بشري حقونو فعالانو مظاهرې د کریمې بلوڅ د مرګ لا پلټنې غوښتې: ۲۰۲۰، ۳۰ دشمبر

د بشري حقونو ځينو فعالانو د کريمې بلوڅ د مرګ لا پلټنو د غوښتنو لپاره، د ډېسېمبر ۳۱مه په نيويارک کې د کينيډا کونسلېټ مخې ته مظاهره کړې ده.

د احتجاج يوې تابيه کوونکې، ګلالۍ اسماعيل راټولو ښځو او سړو ته د وينا پر مهال له کينيډايي چارواکو څخه د کريمې بلوڅ د مړینې پراخه تحقیقات وغوښتل. ورته مظاهرې په کراچۍ، بلوڅستان او کينيډا کې هم شوې دي.

کريمې بلوڅ د پاکستان امنيتي ځواکونه د خلکو په تریتمولو (غيبولو) او شکنجه کولو تورنول او په دې لړ کې به يې تقریرونه او مظاهرې کولې. پوځ دا تور ردوي.

هغه په ۲۰۱۵ کال کې د سياسي پناه لپاره کينيډا ته لاړه خو د ډېسېمبر په ۲۰مه په ټورانټو کې لادرکه او يوه ورځ پس یې د سیند پر غاړه مړی وموندل شو. پولیسو مشال راډيو ته ويلي چې د هغې مرګ جرمي اړخ نه لري خو د هغې کورنۍ پر دې خبره مطمينه نه ده او پلټنې غواړي.

کراچۍ کې د کریمي بلوڅ د مړینې پلټنو لپاره راوتی لاریون: ۲۰۲۰، ۲۴ ډېسېمبر
کراچۍ کې د کریمي بلوڅ د مړینې پلټنو لپاره راوتی لاریون: ۲۰۲۰، ۲۴ ډېسېمبر

په ټورانټو کې د پاکستان کونسلېټ هم په يوه بيان کې له پوليسو غوښتنه کړې چې د هغې د مرګ د سبب معلومولو لپاره، شوې تحقیقات دې ورسره شريک کړي.

کریمه بلوڅ څوک وه؟

کریمه مهراب بلوڅ د بلوڅستان د کېچ ضلعې د تمپ کلي اوسېدونکې وه، هغه چې په ۲۰۰۶ کال کې د بلوڅستان زده کوونکو سازمان 'ازاد ډلې' غړې شوه، نو د دغه سازمان په یوشمېر هلو ځلو کې یې برخه لرله.

د بلوڅ زده کوونکو سازمان ازاد ډله یا بي اېس او – ازاد په پاکستان کې تر بندیز لاندې ده.

د هغې ماما نور احمد بلوڅ هم د بلوڅانو حقونو د غوښتنې په مبارزه کې مهم رول لوبولی.

نور احمد په ۲۰۱۸ز کال کې لادرکه شوی وو او وروسته یې مړی وموندل شو.

د نوموړې ملګري وایي په تمپ کې د کریمې کور سوځول شوی دی، خو په اړه یې نور مالومات نه لري.

د بشري حقونو فعالې ګلالۍ اسماعیل د کریمې بلوڅ تصویر اخیستی
د بشري حقونو فعالې ګلالۍ اسماعیل د کریمې بلوڅ تصویر اخیستی

د بولان میډیکل پوهنتون یوه زدهکونکې او د بشري حقونو فعاله ماهرنګ بلوڅ د ډېسېمبر پر ۲۲ مشال راډیو ته وویل کریمه د بلوڅ ولس د حق غوښتنې اواز وو: ''هغه د بلوڅو ښځو د هڅو او د خپلو حقونو د غوښتلو د مبارزې هغه لومړنی غږ وو چې دغه مبارزې ته یې یو نوی رنګ ورکړ، هغه په هغه وخت کې د بي اېس او (ازاد ) مشره شوه، چې کله د دغه تنظیم یو شمېر مشران او غړي لادرکه کړل شول او یا ووژل شول، هغې ته د مرګ دړکې ورکړل شوې، د غدارۍ مقدمې پر درج شوي دي، هغه چې کله کاناډا ته کډه شوه، نو هلته هم ورته د وېزې مسلې راغلې، موبایل فون یې څو وارې څارل شوی، کمپیوټر یې هېک شوی وو، په بلوڅستان کې د هغې کور سوځول شوی او د کورنی ځینې غړي یې په دې وجه وژل شوي چې هغه خپل دریځ بدل کړي.''

د کریمه بلوڅ په ۲۰۱۵ز کال کې د بي اېس او – ازاد مشره منتخبه شوه خو ژوند ته د ګواښونو له وجې کاناډا ته ولاړله او هلته یې پناه واخیسته.

نوموړې له هم هغه ځایه د سازمان مشري کوله.

په ۲۰۱۸ز کال کې د بي اېس او-ازاد د مشرې په توګه د هغې دنده پای ته ورسېده او په کاناډا کې یې خپل تعلیم ته دوام ورکړ او په اقتصاد کې یې ماسټري کوله.

د بلوڅانو د چارو پوه محمد علي تالپور د ډېسېمبر پر ۲۲مه مشال راډیو ته وویل هغه د بلوڅانو د حق غوښتنې اواز وو چې اوس خاموشه شو: ''چې کله په ۲۰۱۴ کال کې زاهد بلوڅ لا درکه کړل شو، نو وروسته هغه د بي اېس او مرستیاله او بیا مشره شوه، هغه په بلوڅستان کې هغه لومړنۍ ښځه وه چې نړۍ ته یې د بلوڅانو غږ ورساوه، زما لپاره د هغې د مړېنې خبر ډېر د خپګان خبر دی، ما ته به یې بابا ویل، له کریمې نه زیات په ښځو کې چا د بلوڅستان مسله نه ده پورته کړې، نورې هم نجونې شته، خو هغه د باران لومړۍ قطره وه.''

محمد علي تالپور وایي هغه په بلوڅستان کې د ښځو لپاره یو مثال جوړ شو، هغې وښودل چې څنګه به خپل حق غواړې او دا چې ښځې هم باید په دې عمل کې وروسته پاتې نه شي.

ځانګړې پاڼې

له موږ سره اړیکي

XS
SM
MD
LG