پاکستان له افغانستان او ازبکستان سره د اورګاډو د شریکې لارې جوړولو پروژه لاسلیکوي.
د پاکستان د اورګاډو وفاقي وزیر اعظم سواتي د ډېسېمبر پر ۲۴مه ډان نیوز ته په مرکه کې ویلي، پر دې پروژې په ۲۰۱۸ز کال کې خبرې پیل شوې وې.
اعظم سواتی وايي، دا پروژه به د نړیوال بانک په سرپرستۍ د څلور نیمو اربو ډالرو په لګښت سر ته رسېږي.
نوموړي وویل، د روان کال له ختمېدو وړاندې به د ازبکستان یو پلاوی اسلام اباد ته سفر وکړي او د یادې پروژې په اړه به مهم اعلان هم ترسره شي.
پاکستاني چارواکي وايي، له پاکستانه تر ازبکستانه به د اورګاډي په دې لاره د سوداګرۍ ترڅنګ د مساپرو د تګ راتګ لپاره هم تېزرفتاره ګاډي کارول کېږي.
د افغانستان او پاکستان د سوداګرۍ د خونې مسولینو د پاکستان د دغه اقدام هرکلی کړی.
