نن سهار د کابل د اوومې ناحیې اړوند په دوغ اباد سیمه کې پر کرولا موټر پسې ماین چاودلی چې په پایله کې ۵ تنه وژل شوي او ۲ نور ټپیان دي.
د کابل د پولیسو ویاند فردوس فرامرز رسنیو ته استولي پیغام کې لیکلي، موټر د څرخي پله زندان د ډاکټرانو اړوند و.
تر اوسه کومې ډلې د دې پېښې مسوولیت نه دی منلی، خو د افغانستان حکومت په کابل کې د وروستیو چاودنو پړه پر وسلهوالو طالبانو اچوي.
بلخوا د کندهار چارواکي وايي چې په ارغنداو ولسوالۍ کې د ماین چاودنې څلور عام وګړي وژلي دي.
د کندهار د امنیه قومندانۍ ویاند جمال ناصر بارکزي مشال راډیو ته وویل چې چاودنه د ډېسېمبر پر ۲۱ ماسپښین شوې ده.
ده وویل چې په وژل شویو کې دوه ماشومان هم شامل دي او یو بل تن ټپي شوی هم دی.
چا تر اوسه د دې چاودنې ذمه واري نه ده منلې.
دا په داسې حال کې ده چې په وروستیو شاوخوا دوو میاشتو کې د کندهار ولایت امنیتي وضعیت تر پخوا خراب شوی دی او د کندهار ښار په نېږدې ۲۰ کیلومترۍ کې د ارغنداو په ولسوالي کې د افغان ځواکونو له وسله والو طالبانو سره پراخې نښتې شوې دي.
