د پاکستان جمهوري تحریک د مشر مولانا فضل الرحمان تر څنګ به د مسلم لیګ نون مریم نواز شریف ، بلاول بټو زرداري او په تحریک کې د شاملو ګوندونو مشران او استازي په جلسه کې ګډون او ویناوې کوي.
په کراچۍ کې مېشت خبریال راشد خان مشال راډیو ته وویل چې د دې جلسې لپاره په باغ جناح کې انتظامات شوي او سټيج جوړ شوی دی.
ده وویل چې سیاسي مشران به پر یو ځانګړې لاره جلسه ګاه ته ننوځي او د هغې لارې امنیتي چارو رېنجرز ځواک سمبال کړې دي.
د اپوزېشن له ۱۱ ګوندونو جوړ پاکستان جمهوري تحریک د حکومت ضد لومړۍ جلسه د اکتوبر پر ۱۶مه د پنجاب په ګوجراواله کې کړې وه.
پاکستان جمهوري تحریک ویلي وو چې د ګوجراوالې په جلسه کې یې په لسګونه زره خلکو ګډون کړی وو خو حکومت هغه جلسه ناکامه بللې وه.
خبریال راشد خان وویل چې د کراچۍ د جلسې د امنيت لپاره د پوليسو په وینا، ۱۵ زره سرتېري ګمارل شوي دي.
ده وویل چې د جلسې په ميدان کې له کورونا ناروغۍ د ځان ساتلو پر لارښوونو هم عمل شوی او د ولس د ناستې لپاره له ۳۰ تر ۴۰ زرو چوکۍ اېښودل شوې دي.
د جلسې د پیل لپاره د پاکستان د وخت مطابق مازيګر پنځه بجې ټاکل شوې دي.
خبریال راشد خان وايي په کراچۍ کې اوسمهال ګرمي ده نو ښايي دا جلسه له ماښامه وروسته پیل شي.
د پنجاب په ګوجراواله کې شوې جلسې ته هم د پیل لپاره پنځه بجې ورکړل شوې وې خو جلسه تر ټاکلي وخت ډېره په ځنډ پیل شوې وه.
د پاکستان اپوزېشن ګوندونو د ۲۰۲۰م کال د سېپټمبر پر ۲۰مه په اسلام اباد کې د یو غونډې په ترڅ کې د پاکستان جمهوري تحریک په نامه د حکومت ضد غورځنګ جوړ کړی وو.
په پاکستان جمهوري تحریک کې شامل ګوندونه تور پورې کوي چې د عمران خان په مشرۍ د تحریک انصاف حکومت د درغلیو په نتیجه کې راغلی دی.
د دوي په وینا دا درغلۍ پوځ کړې وې او دوي د عمران خان حکومت نه مني او په ملک کې له سره شفاف انتخابات غواړي.
خو وزیراعظم عمران خان او پوځ دواړه د اپوزېشن تورونه ردوي او وايي چې پوځ په سیاست کې ښکېل نه دی.
