د امريکا ولسمشر ډونلډ ټرمپ ويلي چې راتلونکې اونۍ به په ملګرو ملتونو کې پر ایران د لګول شويو بنديزونو پخواني حالت ته د ستنېدو هڅه کوي.
دا اقدام ښايي د ایران اټومي تړون له مینځه یوسي او ملګري ملتونه له سفارتي کړکېچ سره مخامخ کړي.
ولسمشر ټرمپ دا څرګندونې د اګست پر ۱۵مه له هغه يوه ورځ وروسته خبريالانو ته کړې دي چې د ملګرو ملتونو امنيت شورا د امريکا لخوا پر ايران د وسلو لګول شوي بنديز د غځولو پرېکړه ليک رد کړ.
کله چې له هغه و پوښتل شو چې ایا له ايران سره د تاوتريخوالي کمولو په اړه د روس له اړخه په رابلل شوې سرمشريزه کې به ګډون کوي؟
ولسمشر ټرمپ په ځواب کې وويل چې ښايي ويې نکړا شي.
واشنګټن د ملګرو ملتونو له لوري پر ايران د لګول شويو بندېزونو پخواني حالت ته د ستنولو د هڅې ګواښ د امنيت شورا د ۲۲۳۱ پرېکړه ليک له مخې کړی دی.
پرېکړه ليک په ۲۰۱۵ز کال کې د ايران او د نړۍ طاقتورو هېوادونو ترمنځ د شوي جوهري تړون په اړه دی.
روس، چين او په جوهري تړون لاسليک کوونکي اروپايي هېوادونه د امريکا له اړخه د بندېزونو پخواني حالت ته د ستنولو د طريقه کار حق تر پوښتنې لاندې راوستی دی ځکه دوی دريځ لري چې ولسمشر ټرمپ په ۲۰۱۸م کال کې له تړونه وتی وو.
امريکا ادعا کوي چې اوس هم د تړون برخه ده ځکه چې د ۲۰۱۵ز کال د قرارداد منظورونکيو هېوادونو په فهرست کې وه نو ځکه کولای شي بندېزونه بحال کړي.
