په چمن کې د حکومت او مظاهره کوونکو ترمنځ مذاکرات کامیاب شوي او د سیمې د اوسیدوونکو له تېرو څه باندې دوو میاشتو راهېسې روان پرلت ختم کړی دی.
د چمن او شاوخوا سیمو خلک چې واړه کاروباریان دي او او پخوا به یې هره ورځ د افغانستان او پاکستان ترمنځ د خرڅلاو توکي وړل راوړل، پر پوله د سختۍ او بندېز خلاف یې ۶۲ ورځې وړاندې مظاهرې پیل کړې وې او پرلت یې وهلی وو.
خو د جولاۍ پر ۳۱مه د بلوچستان د کورنیو چارو د وزیر ضیاالله لانګو په مشرۍ له ځايي مشرانو سره و لیدل او ډاډ یې ورکړ چې له اختره وروسته به د چمن سپین بولدک لاره خلاصه کړل شي.
د پرلتوالو غوښتنه ده چې د دغه لارې د پرانیستو تر څنګ دې په پوله جولای پر ۳۰مه د شوې پېښې د پلټنو لپاره عدالتي کمېشن هم جوړ کړل شي.
دا تر هغې وروسته ده چې د پاکستان او افغانستان چارواکو د چمن او سپین بولدک پر پوله د تاوتریخوالي او ډزو په پېښه کې د دواړو خواوو خلکو ته د مرګ ژوبلې خبر ورکړ.
د دواړو خواوو چارواکي وايي، په پېښه کې د چمن او سپین بولدک د وژلیو شمېر ۱۴ ته رسېدلی او ۷۰ کسان ژوبل دي.
په چمن کې چارواکي وايي، مرګ ژوبله هغه مهال شوې چې د اېف سي سرتېرو پر مظاهره کوونکو ډزې وکړې.
په سیمه کې هغه وخت حالات پیچلي شول کله چې د چارواکو په خبره د جولای پر ۳۰مه د مظاهرچیانو او امنیتي ځواکونو په نښتو کې دواړو خواوو ته مرګ ژوبله ورسېده.
چارواکي تور پورې کوي چې لاریونوالو د ناروغانو قرنطین مرکز ته اور واچاوه او وروسته یې نوروې حکومتي ودانۍ هم زیانمنې کړې. هغوی وايي په غبرګون کې د ملېشې سرتېرو ډزې وکړې.
د پاکستان د بهرنیو چارو وزیر شاه محمود قریشي د جولای پر ۳۱مه، په اسلام اباد کې خبري غونډې ته وویل، هیله من دی چې دا مسله په کرارۍ هواره شي.
نوموړي په یاده پېښه د افسوس ښکاره کولو په ترڅ کې ویلي وو چې په چمن او سپین بولدک کې باید د تاوتریخوالي او د پاکستان او افغانستان د سرحدي ځواکونو ترمنځ د ډزو پېښه نه وای شوې.
د فېسبوک تبصرې