د افغانستان په خوست ولایت کې د یوې کورنۍ اووه تنه وژل شوي او درې ژوبل دي.
د خوست سیمه ییز چارواکي وایي، چې پېښه د جون ۱۴مې پر ماخوستن د اسماعیلخېلو مندوزیو ولسوالۍ په دېګانو سیمه کې هغه مهال شوې چې وسله وال یوه کور ته ورواوښتل.
د خوست والي ویاند طالب منګل مشال راډیو ته وویل، چې په ۷ تنه وژل شویو کې یو سړی، دوه ښځې، ۳ ماشومان او یوه پنځه کلنه ماشومه شامله ده.
د خوست امنیه قوماندانۍ ویاند عادل حیدر د جون پر ۱۵مه مشال راډيو ته وویل چې دا پېښه د شخصي دښمنۍ له وجې شوې.
حیدر زیاته کړه چې په پېښه کې ککړ کسان هرومرو د قانون منګولو ته سپاري.
