کوهاټ کې سيول ډيفنس (ملکي دفاع) دره ادم خېلو ته هم غځول شوې ده او تر ۱۰۰ زياتو رضاکارانو ورسره خپل نومونه ثبت کړي دي.
دغه رضاکار د کورونا وايرس وبا په ورځو کې خلکو ته نه يوازې خوراکي توکي رسوي بلکې په بېلا بېلو چېک پوسټونو يې خپل رضا کار درولي او د کوويډ ۱۹ ناروغانو څارنې کې هم له حکومت سره مرسته کوي.
د کوهاټ ضلعې سيول ډيفنس چیف وارډن سليم قرېشي د مې پر ۲۱مه مشال راډیو ته ويلي چې د دوی تنظيم اوس په دره ادم خېلو سيمې کې هم کار پیل کړی او ګڼو رضاکارانو ورسره خپل نومونه ثبت کړي.
ده وويل چې تنظيم د کار دايره پخوانۍ قبايلي سيمې ته غځولو تر شا د ولس خدمت کولو جذبه پټه ده.
په دره ادم خېل کې د سيول ډيفنس رضاکار او پوسټ وارډن حفيظ اپريدي په دې مهال وويل چې دوی د وړاندې په سيمې کې د ولسي خدمت سلسله جاري ساتلي وه خو کورونا وايرس وبا په ورځو کې د ملګرو په مشورې يې په سيول ډيفنس کې شموليت خپل کړ.
نوموړي زياته کړه چې د سېول ډيفنس سيوري لاندې يې نه يوازې په ټولبند کې بې وزله خلکو ته خوراکي توکي د هغوی کورونو ته رسولي بلکې په چېک پوسټونو يې خپل رضا کار اوردرولي څوک چې له روغتيا محکمې سره څنګ په څنګ د کوويډ ۱۹ ناروغانو څارنه کوي.
سېول ډيفنس د رضا کارانو يو تنظيم دی چې د حکومت په سرپرستۍ کې کار کوي د دې تنظيم رضا کار روزل شوي وي چې څنګه د جنګ يا په آفتونو کې عام ولس له بد اغېزه وژغوري.
د فېسبوک تبصرې