د لاسرسي ځای

تازه خبر

ښايي کورونا وایرس هيڅکله ورک نشي: راین


د کوروناوایرس ټيسټ

د روغتیا نړیوالې ادارې (ډبلیو اېچ او) یوه لوړپوړي چارواکي خبرداری ورکړی دی چې ښايي نوی کورونا وایرس هېڅکله ورک نشي او د اېډز ناروغۍ وایرس اېچ ای وي په څېر پراخ موجودیت ولري.

د ادارې د بیړنیو چارو مشر مایکل راین دا ارزونه پر داسې مهال کړې چې هېوادونه د ځپلو اقتصادونو د بیاپرانیستو او د ناروغۍ د دویمې څپې د مخنیوي ترمنځ د انډول ساتلو هڅې کوي.

نوموړي د مې پر ۱۳مه یوه انلاین پرلیکه خبري غونډې ته په وینا کې وویل، دا مهمه ده چې جوته شي چې دا وایرس ښايي هېڅکله ورک نشي.

ده وویل، که واکسین جوړ هم شي، د وایرس کنټرول به د ډېرې لویې هڅې اړتیا ولري.

د روغتیا نړیوالې ادارې دې چارواکي د شري بېلګه ورکړه او ویې ویل چې واکسین یې شته، خو ناروغي نه ده ختمه شوې. همداراز، ده وویل، د اېچ ای وي علاجونه موندل شوي خو وایرس یې اوس هم خپرېږي.

راین دا خبرداری پر داسې وخت ورکړ چې په نړۍ کې د کووېډ – ۱۹ ناروغانو شمېر تر ۴۳ لاکه لوړ شوی چې ورڅخه یې ۳۰۰،۰۰۰ کسان مړه شوي دي. اروپايي ټولنې پرون د وایرس خپرېدو پر ګواښ سربېره په پړاوونو کې د غړو هېوادونو ترمنځ د تړلیو پولو پر بیاپرانیستو ټینګار وکړ.

خو په اروپا کې د پېښو، په روغتونونو کې د ناروغانو د بسترېدو او د مړینو کمېدو باوجود داسې اندېښنې دي چې ناروغۍ د نړۍ په ځینو نورو ځایونو کې منګولې ښخې کړې دي.

په روسیې او برازیل کې په تېزۍ پېښې په زیاتېدو دي او په چین کې د ناروغۍ د دویمې څپې خپرېدو اندېښنه پیدا شوې. په امریکا کې د عامه روغتیاپوهانو پر خبرداریو سربېره تر نیمايي زیاتو والیانو خپل ایالتونه بیا پرانیستي دي.

د فېسبوک تبصرې

ځانګړې پاڼې

له موږ سره اړیکي

XS
SM
MD
LG