د افغانستان د سولې لپاره د امریکا د بهرنیو چارو وزارت ځانګړي استازي زلمي خلیلزاد پر طالبانو غږ کړی دی چې روژې او د کورونا وایرس وبا ته په کتو دې پر بشري بنیادونو اوربند وکړي.
زلمي خلیلزاد دا خبره د اپرېل پر ۲۶مه پر خپله ټوېټر پاڼه لیکلې ده.
نوموړي ویلي چې طالبان باید تشدد کم کړي او د کورونا وایرس تر ختمېدو د خپلو بریدونو لړۍ ودروي.
نوموړي دا بیان پر داسې مهال خپور کړی چې طالبانو د اپرېل پر ۲۴مه په بادغیس کې لږ تر لږه ۱۳ حکومت پلوه ځواکونه ووژل.
تر دې مخکې طالبانو د افغان حکومت له خوا د روژې په میاشت کې د اوربند خواست رد کړی وو.
خو طالبانو د خلیلزاد غوښتنې په غبرګون کې لا څه نه دي ویلي.
خلیلزاد د فبرورۍ پر ۲۹مه په قطر کې د طالبانو د سیاسي دفتر له مشر ملا عبدالغني برادر سره د سولې هوکړه لاسلیک کړه.
