افغان حکومت وايي، د طالب بندیانو پر خوشې کولو تمه لري تاوتریخوالی کم او دایمي اوربند وشي.
د افغانستان د ولسمشر د ویاند مرستیال دواخان مینه پال د اپرېل پر ۱۷مه مشال راډیو ته وویل، حکومت د سولې په برخه کې مهم ګامونه پورته کړي چې د طالبانو بندیانو خوشې کول هم پکې شامل دي. د اپرېل له اتمې راهیسي افغان حکومت تر ۳۵۰ زیات طالبان خوشې کړي دي.
مينه پال هیله ښکاره کړه چې له دې سره به سولې ته لاره هواره شي.
اخوا طالبانو ویلي چې د اپرېل له ۱۲مې نېټې راهیسې يې په کندهار او لغمان ولایتونو کې د افغان حکومت ۶۰ کسان خوشې کړي دي.
د فبرورۍ میاشتې پر ۲۹مه، د امریکا او طالبانو ترمنځ په لاسلیک شوې هوکړه کې له افغان حکومته غوښتل شوي چې تر بین الافغاني خبرو مخکې د اعتماد رامنځته کولو په هدف دې پنځه زره طالب بندیان خوشې کړي.
طالبانو هم ژمنه کړې چې شاوخوا ۱۰۰۰حکومتي کارکوونکي به پرېږدي.
د فېسبوک تبصرې