د لاسرسي ځای

تازه خبر

د قبايلي ضلعو يو شمېر مشرانو د بېلې صوبې غوښتنه کړې


د خېبر پښونخوا د قبايلي سيمو يو شمېر استازي په اسلام اباد کې د احتجاج پر مهال

اسلام اباد - د خېبرپښتونخوا د ضم کړل شويو قبايلي ضلعو يوشمېر مشران وايي سيمه کې يې تر انضمام وروسته هم هېڅ ډول پرمختيايي کارونه ونشول نوله حکومته غوښتنه کوي چې پخوانۍ فاټا ته دې د بېلې صوبې درجه ورکړل شي.

د مارچ پر ۱۲مه تر ماپښين وروسته د قبايل تحفظ مومنټ تر سيوري لاندې له قبايلي ضلعو څخه راغليو يو شمېر ملکانو، پخواني پارليماني استازو او ځوانانو د اسلام اباد پرېس کلب مخې ته احتجاجي مظاهره وکړه او وينا يې وه چې په خېبرپښتونخوا کې پر ورګډېدو سربېره يې سيمې د تېر په څېر شاته پاتې دي نو حکومت دې په اوو واړو ضلعو او شپږو سرحدي سيمو (فرنټيېر ريجنز) باندې مشتمله سيمه د قبايلستان په نوم بېله صوبه جوړه کړي.

د قبايل تحفظ مومنټ مشر سېد نذير تر احتجاج وروسته مشال راډيو ته وويل دوی له لومړۍ ورځې څخه د انضمام مخالفت کاوه او اوس خلکو ته هم اندازه وشوه چې سيمې يې د انضمام په صورت کې نه بلکه د بيلې صوبې په صورت کې پرمختګ کولی شي.

د نوموړي وينا وه حکومت دوه مخيزه پاليسي پيل کړې ده او د جنوبي پنجاب صوبې جوړولو لپاره يې هڅې پيل کړې خو قبايلي ولس له يوې اوږدې مودې راهيسې د بېلې صوبې غوښتنه کوي او حکومت هېڅ پاملرنه نه ورته کوي.

د اېف ار (فرنټيېر ريجنز) پيښور ملک مصطفا وايي تر انضمام وړاندې له دوی سره مرکزي حکومت ډېرې ژمنې کړې وې چې نه يواځې به د ۱۰ کلونو لپاره قبايلي ضلعو ته ټېکس معاف وي بلکې هر کال به حکومت د يادو ضلعو د پرمختګ لپاره ۱۰۰ اربه روپۍ ورکوي خو تر اوسه حکومت خپله يوه ژمنه هم سر ته ونه رسوله.

د پاکستان د پارلمان لخوا د قانون تر منظورېدو وروسته د هغه وخت ولسمشر ممنون حسېن د ۲۰۱۸م کال په مې مياشت کې هغه اييني بدلون لاسليک کړ چې ورسره سم قبايلي سيمي د خېبرپښتونخوا برخه شوې.

د روان ۲۰۲۰م کال په جنورۍ مياشت کې د قبايلي ضلعو ځېنو پارلماني استازو مشال راډيو ته ويلي ول حکومت چې د تېرکال په بوديجه کې د قبايلي ضلعو لپاره د ۸۳ اربه روپۍ پرمختيايي بوديجه ځانګړې کړې وه، تر اوسه يې د هغه ۱۰ سلنه هم ده کارولې.

بلخوا د پاکستان تحريک انصاف واکمن ګوند له خېبر ضلعې څخه منتخب پارليماني استازی اقبال اپريدی وايي کوم کسان چې د بېلې صوبې نعره وهي نو دا په اصل کې د اېف سي ار هغه زوړ نظام راوستل غواړي. د دوه په وينا دغو کسانو په تېرو وختونو کې د اصلاحاتو په پروسه کې خنډونه اچول او د اېف سي ار قانون پر ځای ساتلو لپاره يې د بېلې صوبې خبره کوله او اوس هم پر هغه زړه اجنډا روان دي.

په قبايلي ضلعو کې د پرمختيايي کارونو په هکله د اقبال اپريدي وينا وه حکومت يې په قبايلي ضلعو کې يوشمېر لوی او وړې پروژې پيل کړي او هڅه کوي چې دا ژر تر ژره سرته تر ورسوي.

XS
SM
MD
LG