ترکیه وايي ۳۳ سرتېري یې په شام کې د روس ملاتړ لرونکي حکومتي ځواکونو په هوايي برید کې وژل شوي دي. په دې سره د ترکیي او د شام اېتلافي هیواد روس تر منځ تعلقات لا ترینګلې شوي دي.
له شام سره پوله لرونکې د ترکیي هتای صوبې ګورنر رحمي دوغان نن (د فبرورۍ پر ۲۸مه) وویل چې د شام په ادلیب صوبه کې تر بریدونو وروسته په هسپتال کې د ۳۲ زخمي شویو پوځیانو درملنه روانه ده.
د ترکیې د ولسمشر رجب طیب اردغان ویاند فخرالدین التون وویل چې د بریدونو په غبرګون کې شامي حکومتي هدفونه د دوی تر بریدونو لاندې راغلي او د مځکې او هوا له لارې به ورباندې حملې جاري وي.
د شام حکومت لا په ادلیب کې د حملو په اړه څه نه دي ویلي. د روس ملاتړ لرونکي شامي حکومتي ځواکونه دغه صوبه له یاغیانو نه د اخیستو کوشش کوي.
د روانې میاشتې له پیل راهیسې په ادلیب کې څلور پنځوس ۵۴ پوځیان وژل شوي دي چې پکې دا وروستی شمېر هم شامل دې.
د روس د دفاع وزارت ویلي چې د شامي ځواکونو تر برید لاندې راغلي د ترکي ځواکونه له ((ترهه ګرو)) څخه وو.
د فېسبوک تبصرې