د لاسرسي ځای

تازه خبر

خبرونه

خیبر پښتونخوا: خاصه دار یې له پولیسو سره ګډ کړل

تصویر له ارشیفه

د خیبر پښتونخوا حکومت د قبایلي ضلعو د خاصه دارو او لیویز ځواکونو په پولیسو کې د ورګډولوخبرتیا خپره کړې ده.

د دوشنبې په خبرتیا کې راغلي چې اوس به په پولیسو کې شامل کړل شویو لیویز او خاصه دارو ته د پولیس هومره تنخاګانې او مراعات ورکول کېږي. د اعلامیې تر مخه په اوله برخه کې به ۴۵۰۰ خاصه دار او لیویز غړي پولیسو ته واوړي.

دا راز وزیراعلا محمود خان هم په دوشنبه په خپل رسمي ټویټر پیغام کې وویل چې په مجموعي توګه د شاوخوا ۲۹۰۰۰ لېویز او خاصه دارو په پولیسو د ورګډلو حکم جاري کړی دی.

په خیبر پښتونخوا کې د قبایلي ضلعو له شاملولو پس حکومت د دې سیمو لېویز او خاصه دارو په پولیسو کې د ورګډولو ویلي ول خو تر اوسه دا کار نه وو شوی چې په نتیجه کې یې یادو ځواکونو وخت په وخت احتجاجونه هم وکړل.

د نننۍ ورځې ټول خبرونه وګورئ

سرچينې: په اسټريا کې وژل شوی تن د چيچن مشر منتقد وو

مامېخن عمروف

سر چينې وايي هغه روسی پناه غوښتونکې چې د جولای په څلورمه د اسټریا سر ښار ویانا سره نیزدي وژل شوی، پخوانې چيچنایي بيلتون پال او د چيچنیاي مشر رمضان قديرووف منتقد وو.

بهر ميشته چيچنيانو کې یوې سرچينې مشال راډيو ته ويلي چې وژل شوې ماميخن عمرووف د ویانا د انزور په نامه پيژندل کيدو. بلخوا اسټریايي چارواکو د هغه د شناخت په اړه صرف دومره ويلي چې یو ۴۳ کلن روسي پناه غوښتونکی له ویانا بهر د يو بازار د ګاډو د تم ځای سره ويشتل شوی دی.

د ابتدايي مالوماتو له مخه ماميخن په سر ويشتل شوی وو او د امبولانس د راتګ نه مخکې يې ساه ورکړې وه. له دې وژنې څو ساعته پس اسټریايي چارواکو د پيښې د ځايه ۲۰۰ کلوميټره لرې په لينځ ښار کې يو مشکوک کس نيولی او وايي چې روسي وګړی دی.

پوليس وايي د وژنې د سبب معلومولو لپاره يې پلټنې روانې دي.

په ویانا کې د روس سفارت يو ویاند، د روس سر کاري خبري اژانس تاس ته ويلي دي چې تر دا مهال دوی سره چا د دې پيښې په اړه رابطه نه ده کړې.

په نړۍ کې په کورونا وایرس د اختوو شمېر ۱۱.۲ ميليونو ته ورسېد

په ارمينيا کې ناوې او شاوو له کورونا وایرسه د بچ کېدو لپاره ماسکونه اغوستي

د روغتيا نړیوالې ادارې (ډبليو ايچ او) د جولای پر څلورمه د کورونا وايرس وبا په پیښو کې د بېسارې اضافې راپور ورکړی چې په ټوله نړۍ کې په ۲۴ ساعتونو کې ۲۱۲۳۲۶ کيسونه ريکارډ شوي دي.

په دې کې تر ټولو زياتې د مثبتو پېښو شمير په امريکا، برازیل او هند کې دي.

د کورونا وايرس له وجې د مړینې شمېر په ورځ کې شاوخوا 5،000 ده.

خو په برتانیا کې چارواکو د جولای پر څلورمه د رستورانتونو، سینما ګانو او د نورو ځايونو خلاصیدو ته هيله من دي. وزيراعظم بورس جانسن ويلي دي چې دا د خلکو ذمه واري جوړيږي چې قواعد عملي کړي.

د کورونا وایرس په اړه شمېرې ساتونکي ويب سايټ ليکلي چې د جولای تر څلورمې پوې په ټوله نړۍ کې له يولسو ميليونو څخه زيات خلک پر کورونا وايرس اخته شوي، شپږ ميلونه ترې روغ شوي او له پنځه لاکه شپږويشت زرو زيات مړه شوي دي.

کابل کې "درې مهمې نړيوالې غونډې" کېدونکې دي

د افغانستان بهرنيوو چارو وزارت وياند، ګران هېواد

د افغانستان بهرنیو چارو وزارت وایي چې کابل به دا اونۍ د افغان سولې لپاره د سیمه ییزې او نړیوالې اجماع د پیاوړتیا په هدف د درې مهمو ناستو کوربه وي.

د وزارت ویاند ګران هېواد د جولای په څلورمه په يو بيان کې ویلي چې لومړۍ غونډه به د دوشنبې په ورځ د شلو سیمه ییزو او لویو هېوادونو ترمنځ وي، دویمه به د سې شنبې په ورځ وي چې د افغانستان، پاکستان او چین ترمنځ د سټراټیژیک ډیالاګ ترنامه لاندې جوړېږي.

ده زياته کړه چې درېیمه ناسته به د ویډیو کنفرانس له لارې وي او هغه ستر هېوادونه به پکې برخه واخلي چې په تېرو ۱۹ کلونو کې یې له افغانستان سره اقتصادي او امنیتي برخو کې همکاري کړي وي.

د افغانستان د بهرنیو چارو وزارت دیپلوماتیکې هڅې زیاتې کړې چې د طالبانو سره د بین الافغاني خبرو له پیل وړاندې د افغان سولې لپاره سیمه ییزه او نړیواله اجماع لا پیاوړې او ګړندۍ کړي.

د ترکي یو عدالت د بشري حقونو څلور غړیو ته د بند سزا اورولې

د بشري حقونو څلور فعالانو ته له ترهګرۍ سره د تړلو جرمونو په تور د بند سزا.

د ترکي په استنبول کې یو عدالت د بشري حقونو څلور فعالانو ته له ترهګرۍ سره د تړلو جرمونو په تور د بند سزا اورولې ده.

په دوی کې دوه په ترکیه کې د بخښنې نړیوال سازمان پخواني مشران (ډایریکټران) هم دي.

دغه فعالانو ته له دوه کاله تر اووه کاله د بند سزاګانې اورول شوي دي.

عدالت اووه نور فعالان له تورونو بري کړي هم دي.

د حقونو دفاع کوونکیو دا په ترکیه کې د بشري حقونو لپاره یوه ضربه بللې ده.

د بخښنې نړیوال سازمان استازي انډریوګارډنر د جولای پر درېیمه په خپله ټویټر پاڼه ولیکل چې په همکارانو يې بېځایه تورونه پورې کړل شوي دي او درې کاله د مقدمې چلولو وروسته يې هم په اړه ثبوتونه نه دې وړاندې کړی.

امریکا د یو "نوي کیڼ لاسي فاشزم" تر یرغل لاندې ده: ټرمپ

د امریکا ولسمشر ډونالډ ټرمپ

ولسمشر ډونلډ ټرمپ ویلي چې امریکا د یو "نوي کیڼ لاسي فاشزم" تر یرغل لاندې ده.

نوموړي جولای پر درېیمه په واشنګټن کې د امریکا د ازادۍ ورځې په تړاو یوې ولسي غونډې ته په وینا کې زیاته کړه چې دا کیڼ لاسې فاشزم د امریکايي تاریخ او قدرونو پرضد په "زورواکه رویه" کې ککړ دی.

ټرمپ په خپله وږده وینا کې د هغه قهرجنو مظاهره چیانو غندنه وکړه چې په بېلا بېلو ښارونو کې يې ځینې یادګارونه او مجسمې رانړولې وې.

دا غونډه پر داسې مهال جوړه شوې وه چې په امریکا کې د کورونا وایرس له کبله د مړ شویو شمېر تر ۱۲۵۰۰۰ واوښتو.

په دې غونډه کې د وایرس مخنیوي لپار د ولسي واټن اصول نه وه عملي شوی او ډېرو ګډونوالو يې ماسکونه هم نه وو اچولی.

په پاکستان کې د کورونا ناروغانو شمېر ۲۲۵،۲۸۳ ته ورسېد

په کراچۍ کې روغتیايي کارکوونکی د کورونا وایرس معاینې لپاره د یو تن وینه اخلي.

په پاکستان کې تر دې دمه ( د جولای څلورمې) په کورونا وايرس د اخته کسانو شمېر ۲۲۵،۲۸۳ ته رسېدلی دی.

بلخوا له دې وايرسه ۴،۶۱۹ کسان مړه شوي خو تر ۱۲۵،۰۰۰ زيات بېرته ورڅخه رغېدلي هم دي.

دا په داسې حال کې ده چې د پاکستان حکومت په يوشمېر سيمو کې نرم ټولبند عملي کړی دی.

کورونا وایرس د ۲۰۱۹م کال په ډېسېمبر مياشت کې د چين په ووهان ښار کې راڅرګند شو چې د روغتيا د نړيوال سازمان په وينا د نړۍ تقريباً ټولو هېوادونو ته خپور شوی دی.

تر دې دمه په نړۍ کې تر يو کروړ ۱۱ لکه ۹۸ زره زيات کسان په دې وايرس اخته شوي چې تر پنځه لکه ۲۹ زره زيات ورڅخه مړه شوي او تر ۶۳ لکه زيات بېرته رغېدلي هم دي.

جنوبي وزیرستان کې د یو ځايي مشر په ګډون څلور کسان وژل شوي

په جنوبي وزیرستان کې د ناپیژندل شویو وسله والو په برید کې د یو قبایلي مشر په ګډون څلور کسان وژل شوي دي.

دا پېښه په واڼه بیرمل سیمه کې د جولای پر درېیمه سهار رامنځ ته شوې ده.

د واڼه تاڼې یو چارواکي اصغر وزیر له پېښې وروسته مشال راډیو ته ویلي چې قبایلي مشر سرمست خان له خپلو ملګرو سره په ګاډي کې روان و چې وسله والو ورباندې ډزې وکړې.

په برید کې یو ځايي وګړی ټپي شوی هم دی.

تر اوسه چا د دې برید ذمه واري نه ده منلې.

په جنوبي وزیرستان کې د سیاسي ګوندونو د اتحادیې مشرانو پېښه غندلې ده او له حکومته يې د امنیت پرځای کولو غوښتنه کړې ده.

په پکتیا او پکتیکا کې شپږ ماین ښخوونکي وژل شوي

شپږ ماين خښوونکي په پکتيا او پکتيکا کې ووژل شول

افغان چارواکي وايي، د جولايي د درېیمې په شپه د پکتیا په احمد خېلو او د پکتیکا په خوشامند ولسوالۍ کې په ماین ښخوونکو پسې خپلو ماینونو چاودنې کړې چې شپږ پکې وژل شوي او یو تن ټپي شوی دی.

په پکتیا کې د تندر قول اردو د رسنیو دفتر مشر جګړن ایمل خان مومند د جولایي پر څلورمه مشال راډیو ته وویل چې په دې کسانو پسې د ماین ښخولو پر مهال خپل ماینونه چاودلي دي.

نوموړي‌ وویل چې څلور ماین ښخوونکي د پکتیا د احمد خېلو ولسوالۍ د غونځي په سیمه کې او دوه د پکتیکا د خوشامند ولسوالۍ د لويې کلا په سیمه کې وژل شوي دي.

ایمل خان مومند وايي چې دې کسانو د لویو لارو په اوږدو کې ماینونه ښخول او د ده په وینا، چې د دا ډول ماینونو په چاودنو کې ډېری وخت ولسي وګړو ته مرګ ژوبله اوړي.

تر اوسه هېڅ یوې وسله والې ډلې په دې اړه څه نه دي ویلي.

پنجاب: د ټرېن او بس ټکر ۱۵ سېک زیارتیان وژلي ګڼ ژوبل

سیکان د نړۍ له ګوټ ګوټه د پاکستاني پنحاب په کرتارپور کې د ګورو نانک دربار زیارت ته ځي

د پاکستان د پنجاب په شیخو پوره کې د کوسټر او ریل ګاډي د ټکر په نتیجه کې ۱۵ سېک زیارتیان وژل شوي او نور ۱۰ ژوبل دي.

پاکستان سرکاري راډیو وايي، په دې ګاډي کې د ننکانه صاحب ستنېدونکي سېک زیارتیان سواره وو چې د جولای پر درېیمه د ساچا سودا سیمه کې د یو ریل ګاډي سره وجنګېده.

د ریلوی وزارت په یو بیان کې ویلي چې د ریسکیو ۱۱۲۲ عمله د پېښې ځای ته رسېدلې او مړي او ژوبل شوي کسان روغتون ته انتقالوي.

وزیر اعظم عمران خان په پېښه د خپل خپګان څرګندونه کړی او د ریلوي وزیر شیخ رشید احمد ویلي، د پلټنو وروسته به د پېښې ذمه وارو کسانو ته سزا ورکوي.

د امریکا کانګرس پر چین د هانګ کانګ په تړاو بندیزونه منظور کړل

د امریکا د کانګرس یوه څنډه

د چین لخوا په هانګ کانګ کې د یوه نوي ملي امنیت قانون لاګو کولو وروسته د امریکا کانګریس د هانګ کانګ په اړه د نوی بندیزونو منظوري ورکړې.

په نړۍ کې د چین په دغه نوي قانون تنقید روان دی.

د امریکا سېنېټ د جولاۍ پر دویمه په یوه خوله د هانګ کانګ د خپلواکۍ ایکټ ملاتړ وښود.

تر دې یوه ورځ مخکې د امریکا استازو جرګې هم د قانوني مسودې حمایت کړې و.

دغه مسوده ولسمشر ډونلډ ټرمپ ته د دستخط لپاره ولېږل شوه.

د قانوني مسودې له مخه به هغو بانکونو ته سزا ورکول کېږي چې د نوي قانون عملي کوونکو چینايي چارواکو سره کاروبار کوي.

د دې ترڅنګ دا بل د چین د کمیونسټ ګوند هغه چارواکي هم په نښه کوي چې د ملي امنیت قانون عملي کوي او د پولیسو هغه یونټې هم هدف ګرځوي چې د هانګ کانګ پر مظاهره کوونکو یې بریدونه کړي.

برتانیې په ۱۹۹۷ز کال کې هانګ کانګ چین ته وسپارلو چې پکې د راتلونکو ۵۰ کلونو لپاره د ځینو ازادیو ضمانت ورکړل شوی و.

تنقید کوونکي دغه نوی قانون د دغو ازادیو ضد بولي.

روس دې په ټولپوښتنه کې د ګډوډیو پلټنې وکړي: اروپايي ټولنه

بروکسل کې د اروپايي ټولنې دفتر

اروپايي ټولنې پر روس غږ کړی چې پر اييني اصلاحاتو د ولسي رایو په پروسه کې د ګډوډۍ په اړه د راپورونو پلټنې وکړي.

په دغو غیر پابنده، ملي رایو سره ولسمشر ولادمیر پوتین لپاره دا امکان پیدا کېدای شي چې تر ۲۰۳۶ز کال پورې په واک کې پاتې شي.

د روس ولسمشر دفتر د جولای پر دوهمه په واضحه اکثریت سره د بریا هرکلی وکړ.

د رایو ۷۸ فیصده برخې په ایین کې تر ۲۰۰ زیاتو بدلونونو د پیکیج ملاتړ کړی چې کریملین، په ولسمشر ولادمیر پوتین د باور کامیاب ریفرینډم ګرځولې.

خو بیا په ځینو پولنګ مرکزونو کې د بدانتظامۍ په ګډون د فعالانو او خبریالانو ځورونې رپورټونو پس په ۲۷ هیوادونو مشتملې اروپايي اتحادیې د سمدستي پلټنو غږ کړې.

له چین سره ترینګلتیا کې هند له روسه ۳۳ روسۍ جنګي الوتکې اخلي

هند له روسه ۳۳ روسي جنګي جازونه اخلي او غواړي چې ۵۹ معیار لوړ کړي. (ارشیف)

هند له چین سره د شته کشالې په منځ کې له روس سره د ۲.۴ بیلیونو ډالرو په ارښت د ۳۳ جنګي الوتکې اخېستو او ۵۹ نورو اوچتولو (جدیدولو) سودا کړې ده.

د هند دفاع وزارت د جولای پر دوهمه اعلان وکړ چې له روسه ۲۱ اېم ای جي MIG – ۲۹ الوتکې اخلي او وار له مخه شته ۵۹ جنګي الوتکو معیار لوړوي.

حکومت د ۱۲ روسي سو -۳۰ الوتکو د اخیستو منظوري هم ورکړی چې د هند ایروناټکس لمیټډ تر لاینسس لاندې به جوړېږي.

د دفاع وزارت په بیان کې وویل چې د الوتکواخیستل او جدید میزایلي نظام جوړول په هند کې جوړ کړۍ تر نوښت لاندې کېږي.

په بیان کې یې مقصد د ځواکونو قوي کول او د پولو ساتنه ښودل شوې.

دغه اعلان د هند وزیر اعظم نرېندر مودي او د روس د ولسمشر ولادمیر پوتین ترمنځ د ټېلېفوني خبرو اترو وروسته وشو.

ډیلی او مسکو د سړې جګړې مهال مهال ملګري ول او د هند ډېری وسله د روسي ساخت ده.

هند خپله پوځي پیاوړتیا په داسې حال کې لاپسې زیاتوي چې له چین سره په همالیه کې د یوې لانجمنې پولې په نښته کې یې ۲۰ سرتېري ووژل شول.

جلال اباد کې چاودنې دوه تنه ټپیان کړي

د افغانستان د ننګرهار چارواکي وایي چې نن[ د جولای پر لومړۍ نېټه] له غرمې وروسته د جلال اباد ښار لومړۍ ناحيې اړوند پښتونستان واټ کې د سرخرود ولسوالۍ جنایي امر هجرت موټر پورې نښلول شوي ماین چاودنه کړې چې هجرت او د هغه زوی په کې ټپیان شوي دي.

د ننګرهار د والي ویاند عطاالله خوږیاڼی وایي چې ټپیان پر وخت روغتون ته لیږدول شوي او زیاتوي چې د جنایي امر هجرت روغتیایي حالت د اندېښنې وړ دی.

د پېښې مسوولیت لا چا نه دی منلی.

سپینه ماڼۍ: که پر روسیې تورونه کره شول سخت ځواب به ورکړي

ارشیف، سپینه ماڼۍ

د سپینې ماڼۍ ویاند رابرټ اوبراین وایي، که چېرته دا راپورونه تأیید شي چې روسیې طالبانو ته د دې لپاره انعامونه ورکړي چې په افغانستان کې امریکایي ځواکونه او د هغوی متحدان ووژني، متحده ایالات به سخت ځواب ورکړي.

ښاغلي اوبراین دا خبره پرون په واشنګتن کې خبریالانو ته وکړه، خو په دې اړه‌یې نور تفصیل ورنه‌کړ.

تر دې مخکې پرون په واشنګټن کې د متحده ایالاتو د بهرنیو چارو وزیر مایک پومپیو د همدې موضوع په اړه د یوه خبریال د پوښتنې په ځواب کې وویل: "کله چې موږ داسې کره معلومات ترلاسه کړو چې روسان د امریکایانو ژوند په خطر کې اچوي، نو موږ به په جدي توګه ځواب ورکړو. لکه تاسو چې وویل، موږ به خبرداری ورکوو؟ موږ به خبرې ورسره کوو؟ زه فکر کوم چې ځواب به خامخا وي او ورکوو به‌یې."

نیویارک ټایمز ورځپاڼې تېره جمعه راپور ورکړ چې د روسې پوځي استخباراتو د امریکایانو د وژلو لپاره طالبانو ته انعامونه ورکړي او دا راپور د فبرورۍ په میاشت کې له ولسمشر ټرمپ سره شریک شوی دی، تر دې راوروسته ښاغلی ټرمپ تر فشار لاندې راغلی دی.

د سپینې ماڼۍ ویاند، اوبراین وویل چې د امریکا د مرکزي استخباراتو یوې غړې ولسمشر ټرمپ ته په دې اړه شفاهي خبره کړې وه او په لیکلې بڼه‌یې څه نه‌و وړاندې کړي.

د امریکا په متحده ایالاتو کې د روسیې سفارت دا راپورونه رد کړي او طالبانو هم ویلي دي چې دوی له روسیې انعامونه نه‌دي ترلاسه کړي.

سږ کال په کونړ کې د هندواڼو پالېزونو بر ډېر زیات شوی

ارشیف

د افغانستان د کونړ چارواکي وایي، د دغه ولایت هندواڼې په ګاونډیو ولایتونو کې سږ کال ښه بازار لري چې له دې امله به بزګران په لسګونه میلیونه افغانۍ ګټه وکړي.

د کونړ کرنې رئیس نجیب ‌الله عادل د جولای پر لوموړۍ نېڼه مشال راډیو ته وویل:

"سږ کال په کونړ کې پر نېږدې زر جریبه ځمکه هندواڼې کرل شوې دي چې حاصلات ‌یې له ۱۰ تر ۱۲ زره ټنو ته رسېږي او مجموع عواید یې ۴۰ میلیونه افغانۍ اټکل کېږي."

د چارواکو په وینا کونړ ته د کرنې نوي ماشین الات وارد شوي او په وروستیو کلونو کې بڼوالۍ ته پاملرنه زیاته شوې ده چې د نارنج، مالټې او لیمو ترڅنګ په میلیونونو افغانۍ د چهارمغزو او شفالتو پر باغونو پانګونه شوې ده.

میرلي: د ځمکې پر سر تر نښتې وروسته اوربند شوی

د شمالي وزیرستان په میرلي کې د دوو قبیلو ترمنځ تر دوه ورځنیو نښتو وروسته اوربند شوی دی.

د ځايي ولس او چارواکو په وینا، د جون پر ۳۰مه د ځمکې لانجې پر سر د اېپي او مديخېلو ترمنځ نښته پیل شوه چې پکې دوه کسان ووژل او یو شمېر ژوبل شول.

هلته د شمالي وزیرستان اوسېدونکو له مشال راډیو سره په خبرو کې له انتظامیې څخه غوښتنه کړې چې په سیمه کې د امنیت بحالۍ اقدامات وکړي.

دوی د جولای پر لومړۍ نېټه وویل، په ۲۰۱۴ز کال کې د وسله والو پرضد تر پوځي عملیاتو وروسته چارواکو له خلکو څخه وسلې ټولې کړې چې ورسره امنیتي حالات نسبتاً ښه شول خو اوس بیا قبیلو وسلې ترلاسه کړې دي او جنګېږي.

د شمالي وزیرستان د پولیسو مشر شفیع الله ګنډه پور د جولای پر لومړۍ نېټه مشال راډیو ته وویل، هېچا ته د قانون سرغړونې اجازه نه ورکوي او ژر به له خلکو څخه د وسلو ټولول پیل کړي.

د هانګ کانګ پولیسو او مظاهرچیانو ترمنځ شخړه

پولیسو او مظاهرچیانو ترمنځ نښتې.

د هانګ کانګ پولیسو په زرګونو هغو پرامنه مارچ کونکیو اوبه پاشلي او د مرچکو سپرې یې پرې کړې چې د جولای پر لومړۍ نېټه دغلته د برتانوي راج د ختمېدو ۲۳مې کلیزې لمانځلو لپاره راغونډ شوي وو.

پولیسو دا کاروایي د نوي قانون ترمخه کړې چې د جولای د لوموړۍ نېټې عملي شوی او ترمخه یې یو تن ته د عمر بند سزا هم کېدلای شي.

امریکا دا په چین کې د ازادۍ لپاره د خپګان ورځ بللې ده.

د هانګ کانګ پولیسو پر فېسبوک ویلي دوی په مختلفو تورونو د ۷۰ زیات کسان نیولي دي.

دغه کسان په داسې وخت نیول شوی دي چې دوی پر دغه سیمه په ۱۹۹۷م کال کې د برتانیایي راج د ختمېدو وروسته چین ته د ورسپارلو کلیزه لمانځله.

پر مارچ کونکیو تور دی چې په غېر قانوني توګه دغلته راجمه شوي وو.

دا لومړی ځل دې چې په جمهوري توګه د خلکو پر داسې را یو ځای کېدو بندیز لګول شوی دی.

د هانګ پولیسو د نوي قانون ترمخه د دغه پروګرام د پېل څو ساعته وروسته لومړی هغه تن ونیوو چې د هانګ کانګ د ازادۍ بېرغ یې نیولی وو.

د هانګ پولیسو په خپله ټویټر پاڼه د دغه تن عکس خپور کړی دی چې په لاس کې یو داسې بېرغ نیولې چې پرې د هانګ کانګ ازادۍ په حق کې نعرې لیکل شوي دي.

خو پر ټولنیزو رسنیو ځینو خلکو د دغه نیول شوي تن له عکس سره پر نوي قانون تنقید کړی او وایي چې پر بېرغ لیکل شوې خبره پولیسو بدله کړې ده.

خلیلزاد له پاکستانیو چارواکو سره پر افغان سوله غږېدلي

د افغانستان سولې لپاره د امریکا ځانګړی استازی زلمی خلیلزاد

د افغانستان سولې لپاره د امریکا ځانګړی استازی زلمی خلیلزاد نن[د جولای پر لومړۍ نېټه] اسلام اباد ته رسېدلی دی.

نوموړی به له پاکستاني چارواکو سره د افغانستان سولې او سیمې پر امنیت غږېدلي.

خلیلزاد نن په خپله ټوېټر پاڼه لیکلي چې پاکستان ته د سفر وړاندې يې د ازبکستان په مرکز تاشکند کې د دغه هېواد بهرنیو چارو وزیرانو ځینو نورو چارواکو سره د سولې بهیر پر وروستیو پرمختګونواو د منځني‌ اسیايي هېوادونو پر امنیت مهمې خبرې کړي دي.

د امریکا بهرنیو چارو وزارت د جون پر ۲۸مه په یو خپور شوي بیان کې ویلي چې خلیلزاد د جون پر ۲۸مه د دوحې، تاشکند او اسلام اباد سفر پېل کړی دی.

د بیان له مخې خلیلزاد به په ټولو خواو زور راوړي چې د بېن الافغاني خبرو وړاندې دې ټولې خواوې خپلې ژمنې سر ته ورسوي، چې پکې په خصوصي توګه د تشدد کموالی او د بندیانو خوشې کېدل شامل دي.

د دغه بیان ترمخه زلمی خلیلزاد او له هغه سره په وفد کې شامل نور تنان به په دې دوران د کورونا وایرس له وجې افغان چارواکو سره د ویډیو کانفرانس له لارې خبرې کوي.

د نړۍ ۱۵ هېوادونو وګړي اروپايي اتحادیې ته سفر اجازه لري

د اروپايي اتحاديي بیرغ

له د جولاۍ لومړۍ څخه د نړۍ ۱۵هېوادونو وګړي اروپايي اتحادیې ته د سفر اجازه لري.

اروپايي اتحادیې د جون پر ۳۱مه وویل چې کاناډا، مراکش، نویزیلېنډ، روانډا، سربیا، جنوبي کوریا، جورجیا، اسټرالیا، الجیریا، تایلنډ، تیونس او اروګوای په خوندي زون کې شامل هېوادونه دي او وګړو ته‌ یې د ورتګ اجازه ورکوي.

خو امریکا ‌یې له دې اعلانه مستثنی کړی دی ځکه هلته د کورونا وایرس د مثبتو پېښو شمېر د زیاتېدو په حال کې دی.

د اتحادیې ۲۷ استازو پرون وویل چې په امریکا، روس، برازیل، هند او ترکیه کې د کورونا وایرس مثبتې پېښې زیاتې دي او وګړي یې اروپايي ټولنې ته د سفر اجازه نه ‌لري.

اروپايي اتحادیې ویلي چې له چینه به د وګړو ورتګ ته هغه وخت اجازه ورکړي چې د چین حکومت له اروپا د مسافرو پر ورتګ بندیز لیرې کړي.

اروپايي اتحادیې د سفر اجازې راپور هره میاشت دوه واره نوی کېږي.

هغه هېوادونه چې اروپايي اتحادیې په مصون زون کې شامل کړي او د وګړو لپاره‌ یې د سفر ازادي اعلان کړې، باید د اروپايي اتحادیې خلکو ته د ورتګ اجازه ورکړي.

پاکستان کې د کورونا وړجنو شمېر ۲۱۳،۴۸۶ ته ورسېد

په کراچۍ کې روغتیايي کارکوونکی د کورونا وایرس معاینې لپاره د یو تن وینه اخلي.

په پاکستان کې په کورونا وايرس د اخته کسانو شمېر ۲۱۳،۴۸۶ ته رسېدلی دی.

بلخوا له دې وايرسه ټولټال ۴،۳۹۵ کسان مړه شوي خو تر يو لک زيات بېرته ورڅخه رغېدلي هم دي.

دا په داسې حال کې ده چې د پاکستان حکومت په يو شمېر سيمو کې نرم ټولبند عملي کړی دی.

کورونا وایرس د ۲۰۱۹م کال په ډېسېمبر مياشت کې د چين په ووهان ښار کې راڅرګند شو چې د روغتيا د نړيوال سازمان په وينا د نړۍ تقريباً ټولو هېوادونو ته خپور شوی دی.

تر دې دمه په نړۍ کې تر يو کروړ پنځه لکه ۹۱ زره زيات کسان په دې وايرس اخته شوي چې تر پنځه لکه ۱۴ زره زيات ورڅخه مړه شوي او شاوخوا ۵۸ لکه بېرته رغېدلي هم دي.

په ایران کې د اور لګېدو له کبله ۱۹ کسان وژل شوي

په ایران کې د پېښې ځای

د ايران سرښار تهران په یوه روغتیايي مرکز کې اورلګېدنې ۱۹ کسان وژلي او ۱۴ نور یې ټپیان کړي دي.

د ایران بیړنیو پېښو ادارې ویلي چې اورلګېدنه د جون پر ۳۰مه شپه شاوخوا نهه بجې د تهران په سینا اطهر روغتیايي مرکز کې رامنځ ته شوه.

چارواکو ویلي چې اور لګېدنې لامل د اکسیجن د درو ډبو چاودل و.

د راپورونو پر اساس په وژل شويو کې ۱۵ ښځې او څلور نارینه دي.

د پېښې ډېر زیان عملیات خونه کې ډاکترانو او ناروغانو ته رسېدلی. اور د اور وژونکو له خوا په دوو ساعتونو کې مړ شو او په همدې موده کې شاوخوا ۲۰ کسان د دغه روغتیايي مرکز له ودانۍ وژغورل شول.

ملګرو ملتونه دې پر ایران د وسلو بندیز وغځوي: پامپیو

د امریکا بهرنیو چارو وزیر مایک پامپیو

د امريکا د بهرنيو چارو وزير مايک پامپیو د ملګرو ملتونو پر امنيت شورا ټينګار کړی چې پر ايران د وسلو بندیز وغځوي.

نوموړي د جون پر ۳۰مه خبرداری ورکړ چې په اکتوبر کې د بندیز موده ختمېدل به په منځني ختيځ کې د بې ثباتۍ لامل شي.

پامپیو امنيت شورا ته ويلي چې دا اقدام دې يوازې د ده يا امريکا لپاره نه کوي بلکې له اسراييله نيولې بيا تر خليج او منځني ختيځ پورې دې د سيمې هغو هېوادونو ته غوږ ونيسي چې د ايران حملو ته مخامخ دي او هغوی وايي چې د وسلو بندیزدې وغځول شي.

امريکا په داسې حال کې د ملګرو ملتونو له امنيت شورا څخه په رسمي توګه دا غوښتنه کړې چې په ۲۰۱۵م کال کې د ايران او نړيوالو قوتونو تر منځ د شوي اټومي تړون له مخې د اکتوبر په پيل کې پر ايران د وسلو بندیزکې نرمي راځي.

امريکا د ۲۰۱۸م کال په مې کې له دې تړونونه ووتل او پر ايران يې بيا بندېزونه ولګول.

په دې غبرګون کې ايران په مرحله واره توګه د خپلو اټومي ژمنتياوو سرغړونه پيل کړه.

د ايران د بهرنيو چارو وزير جواد ظريف ويلي چې د وسلو د بندیزليرې کېدل د اټومي تړون يوه نه بېلېدونکې برخه ده.

بلخوا ويټو حق لرونکيو هېوادونو روس او چين هم د امريکا د دې اقدام مخالفت کړی دی.

اروپايي ټولنې د پي ای اې الوتنو اجازتنامه وځنډوله

د پاکستان هوایي شرکت پي ای اې الوتکې (ارشیف)

د اروپايي اتحاديې د هوايي چلن خوندیتوب ادارې اروپايي هېوادونو ته د پاکستان دولتي هوايي شرکت پي ای اې د الوتنو اجازتنامه تر شپږو میاشتو ځنډولې ده.

دغې ادارې د جون پر ۳۰مه په خپل بيان کې ويلي چې په دا وروستيو کې د پاکستان په پارلېمان کې پلټنو وښودله چې په دې هېواد کې د پايلټانو زياتې برخې ته ورکړل شوي اجازتنامې ناچله دي نو له همدې امله د پاکستان د دولتي هوايي شرکت او شخصي الوتکو ورتګ ځنډوي.

دا اعلان له هغه وروسته شوی چې تېره اونۍ د پاکستان حکومت د دغه هېواد ۲۶۲ پايلټان چې درېيمه برخه يې د پي ای اې وه، پر کور کښېنول ځکه د هوايي چلن وزير د هغوی اجازتنامې مشکوکه وبللې.

اروپايي هېوادونو ته به د پاکستانيو الوتکو د نه ورتګ امر د جولای له څلورمې نېټې پلی کېږي.

د اروپايي اتحاديې له دې اقدام وروسته بريتانيا هم د پاکستانيو الوتکو ورتګ ځنډولی دی.

بلخوا د پاکستان دولتي هوايي شرکت په خپل بيان کې ويلي دوی هيله لري چې د پاکستاني حکومت او پي ای اې د انتظاميې لخوا به د رغنده ګامونو په پورته کولو سره د الوتکو ځنډ ژر پورته کړل شي.

امریکا د روسیې له‌خوا طالبانو ته د انعام ادعاوې څېړي

د امریکا بیرغ

د امریکا دفاع وزارت په افغانستان کې پر امریکايي پوځيانو د حملو لپاره د روسیې له‌خوا طالبانو ته د نقدي جایزو د ورکولو د ادعاوو په اړه د څېړنو خبر ورکوي.

د پنټاګون ویاند جاناتان هوفمان په یوه بیان کې چې پرون خپور شو ویلي چې دفاع وزارت تر اوسه داسې شواهد چې دا ادعاوې تأیید کړي، نه‌دي موندلي.

د امریکا د ملي استخباراتي ادارې مشر جان راچ کلیف پرون دوشنبه د کانګرس جمهوري‌پالو غړو ته د دې ادعاوو په اړه معلومات ورکړل او ټاکل شوې چې نن به د ډیموکرات ګوند وکیلان هم خبر کړي.

د کانګرس یو شمېر جمهوري‌پالو غړو وویل چې که روسیې په رښتیا پر امریکايي سرتېرو د حملو لپاره طالبانو ته پیسې ورکړې وي، نو د امریکا حکومت باید سمدستي او عاجل اقدام وکړي.

د استازو جرګې جمهوري‌پال غړي مک تورنبېري او لیز چیني پرون په یوه ګډ بیان کې وویل، دا ثابته خبره ده چې روسیه په افغانستان کې زموږ ښېګڼه نه‌غواړي. دوی ویلي، دا مهمه ده چې پر امریکايي سرتېرو د روسیې یا بل هېواد د حملو په اړه معلومات په جدیت سره تعقیب شي.

د جرګې یوه بل استازي مایکل مککاول او اډم کینزینګر په یوه جلا بیان کې ویلي چې د ټرمپ له ادارې څخه‌یې په کلکه غوښتي دي چې د دې ادعا د رښتینولۍ په صورت کې د پوتین رژیم مسؤل وګڼي.

پکتیا کې د دوو قبیلو ترمنځ جګړه کې ۷ کسان وژل شوي

د افغانستان په عمومي نقشه کې پکتیا ولایت

د پکتیا په ډنډپټان ولسوالۍ کې یو ځل بیا د منګلو او خروټو قبیلو ترمنځ د ځمکې او غره په سر جګړه شوې چې له دواړو خواوو ۷ کسان پکې وژل شوي دي.

چارواکي وايي په سربدالي سیمه کې د دې جګړې د پای ته رسولو لپاره‌ یې مداخله کړې ده.

د پکتیا سرپرست والي عبدالولي سهي د یادو قبیلو ترمنځ د نښتو پخلی کړی دی.

د منګلو او خروټو قبیلو ترمنځ پخوا تر دې هم جګړې شوي او په تېرو دوو کالونو کې په دې جګړو کې دواړو خواوو ته درانه تلفات اوښتي دي.

نور پورته کړئ

ځانګړې پاڼې

له موږ سره اړیکي

XS
SM
MD
LG