د ايران د ځواکمن جنرال، قاسم سليماني مړى په سېشنبه ناوخته تر څو ساعته ځنډ وروسته خاورو ته وسپارل شو.
د ايران چارواکو د قدس ځواک د وژل شوي قوماندان قاسم سليماني د جنازې مراسم له هغه وروسته وځنډول چې د ګڼه ګوڼې له کبله په ټېل ماټېل کې ګڼو کسانو ته مرګ ژوبله واوښته.
د سليماني په پلرني ټاټوبي کرمان کې د دغه ټېل ماټېل د علت په اړه څه نه دي ويل شوي.
٦٢ کلن سليماني له ايرانه بهر د تهران د پټو او پوځي عملياتو په اجرا کې مرسته کوله.
د جمعې په ورځ د عراق په پلازمېنه بغداد کې د هغه وژل کېدو د امريکا د متحدو ايالتونو او ايران ترمنځ اړيکې لا کړکېچنې کړې.
د ايران د بهرنيو چارو وزير جواد ظريف ويلي چې قاسم سليماني عراق ته په ډيپلوماتيک ماموريت تللى و.
خو په ځواب کې د جنورۍ پر ۷مه په واشنګټن کې د امريکا بهرنيو چارو وزير مايک پامپيو وويل: "ايا داسې سابقه شته چې وښيي دغه ښاغلى، مهربان او د ښه نظم خاوند ډيپلومات قاسم سليماني بغداد ته د سولې د کوم ماموريت پرمخ بیولو لپاره په سفر تللى و؟ دې خبرې نن سهار خبريالان وخندول، په زړه پورې ده، خو موږ پوهېږو دا خبره رښتيا نه ده، نه يوازې په سابقه پوهېږو بلکې د امريکا د حملې پر مهال هم پوهېدو چې دا خبره سمه نه ده."
د قاسم سليماني تر وژل کېدو وروسته تهران او واشنګټن د يو بل په وړاندې د ځوابي اقدام خبردارى ورکړى دى.
د ايران بهرنيو چارو وزير جواد ظريف په سېشنبه په تهران کې له CNN ټېلېويژن شبکې سره په مرکه کې بيا دغسې خبردارى ورکړ.
هغه وویل: "موږ به متناسب ځواب ووايو، نه غيرمتناسب، ځکه موږ قانون ته ژمن يو، موږ داسې خلک يو چې قانون ته غاړه ږدو، د امريکا د ولسمشر ډونالډ ټرمپ غوندې ياغي نه يو."
بلخوا د ايران سپاه پاسداران انقلاب وتلي قوماندان حسين سلامي په سېشنبه خبردارى ورکړ، چې ايران به د سليماني د وژنې له کبله هغه نامشخص ځايونه په اور وسوځوي، چې امريکا يې ملاتړ کوي.
د جنوبي او مرکزي اسيا په چارو کې د امريکا بهرنيو چارو وزارت مرستيالې اليس ويلز د جنورۍ پر ۷مه د تاجکستان په پلازمېنه دوشنبه کې يوه کنفرانس ته وويل، قاسم سليماني په ګڼو وژنو کې لاس درلود.
هغې زیاته کړه: "جنرال سليماني پر امريکايانو د بريدونو لپاره په فعالانه ډول پلانونه جوړول، جنرال سليماني او د هغه قدس ځواک د سلګونو امريکايي او ایتلافي پوځيانو د وژنې او زرګونو نورو د ټپي کولو مسوول دي خو يقينن پر سليماني د دې حملې هدف د ايران د بريدونو د نورو پلانونو شنډول وو."
په امريکا کې ډيموکراټان چې د قاسم سليماني د وژنې لپاره د ولسمشر ډونالډ ټرمپ پر پرېکړه انتقاد کوي وايي، دا اقدام به امريکا له ايران سره يوې بالقوه ويجاړوونکې جګړې ته وڅیکوي.
په همدې حال کې کاناډا او په اروپا کې د امريکا ځينو نورو متحدانو له عراق څخه په موقت ډول د خپلو سرتېرو اېستل پيل کړي دي.
ناټو هم ويلي چې په عراق کې یې خپل روزنيز ماموريت په موقت ډول ځنډولى دى.
د فېسبوک تبصرې