د لاسرسي ځای

تازه خبر

عراق: د امریکايي ځواکونو پر دوو اډو د ایران راکټي بریدونه


ډونالډ ټرمپ ویلي: "مونږ هر ځای د نړۍ تر ټولو قوي او مجهزه پوځ لرو."

په عراق کې د امریکا په دوو پوځي اډو د ایران تر راکټي بریدونو وروسته د امریکا ولسمشر ډونالډ ټرمپ پر ټویټر کښلي چې "هر څه ښه دي".

هغه ویلي د ایران له خوا په عراق کې پر دوو پوځي اډو راکټونه لګېدلي او دا مهال د تلفاتو او زیانونو په اړه پلټنې روانې دي.

د امریکا ولسمشر ډونالډ ټرمپ زیاته کړې چې: "موږ هر ځای د نړۍ تر ټولو پیاوړی او په درسته سمبال پوځ لرو."

ټرمپ ویلي سهار به په دې اړه یو بیان ورکړي.

د امریکا ولسمشر ډونالډ ترمپ
د امریکا ولسمشر ډونالډ ترمپ

تر اوسه جوته نه ده چې امریکا به څه ګام اخلي خو وار له مخه په سپینه ماڼۍ کې د ټرمپ او د هغه د ملي امنیت د ټیم خبرې پيل شوي.

امریکا دفاع وزیر مارک ایسپر او د بهرنیو چارو وزیر مایک پمپيو سپینې ماڼۍ ته رسېدلي دي.

د امریکا دفاع وزارت پنټاګون مخکې تایید کړې وه چې ایران نن سهار وختي په عراق کې د عین الاسد او ایربیل پر دوو پوځي اډو چې پکې امریکايي او ایتلافي ځواکونه دېره دي راکټي بریدونه کړي دي.

د ایران سپاه پاسداران انقلاب اسلامي ځواکونو ویلي چې دوی د امریکا په لاس د خپل وژل شوي پوځي جنرال قاسم سلیماني په غچ کې دا بریدونه کړي او پر امریکا ږغ کوي، له سیمې خپل سرتېري وباسي چې و نه وژل شي.

قاسم سلیماني د ایران سپاه پاسدران د قدس ځواکونو عمومي قومندان و چې تېره جمعه د جنورۍ پر درېمه د بغداد په نړیوال هوایي ډګر کې د امریکا په یوه هوايي برید کې ووژل شو.

قاسم سلیماني
قاسم سلیماني

د ایران بهرنیو چارو وزیر جواد ظریف هم وروسته پر ټویټر لیکلي چې ایران دا بریدونه د ځان په دفاع کې کړي.

هغه کښلي چې ایران د ملګرو ملتونو د منشور د ۵۱ مادې پر اساس د ځان د دفاع لپاره په یوه متناسب اقدام کې هغه اډه هدف ګرځولې چې د ایران د خلکو او لوړپوړو چارواکو پر ضد یې بریدونه کړي و.

جواد ظریف بیا دا هم لیکلي چې تاوتریخوالی یا جنګ نه غواړي خو د هر ډول یرغل په وړاندې دفاع کوي.

د امریکا د استازیو جرګې مشرې ننسي پلوسي ویلي چې په عراق کې د امریکايي ځواکونو تر هدف ګرځېدو وروسته وضعیت څاري او باید لومړی د امریکايي سرتېرو خوندیتوب یقیني شي.

د امریکا د استازو جرګې مشره ننسي پلوسي
د امریکا د استازو جرګې مشره ننسي پلوسي

هغې پر خپل ټويټر باندې په یوه بیان کې دا ټینګار کړی چې د امریکا اداره باید بې ځایه پاروونې ختمې کړي او ایران دې هم خپلې سرغړونې پای ته ورسوي.

ننسي پلوسي زیاته کړې چې امریکا او نړۍ بله جګړه نه شي زغملی.

د فېسبوک تبصرې

ځانګړې پاڼې

له موږ سره اړیکي

XS
SM
MD
LG