د لاسرسي ځای

تازه خبر

ټرمپ: بغداد کې پر امريکايي سفارت د برید تنظيموونکی ايران دی


بغداد کې د امريکايي سفارت ودانۍ

د امریکا ولسمشر ډونالډ ټرمپ په یو ټویټ کې ایران تورن کړ چې په بغداد کې د امریکا پر سفارت برید یې پلان او تنظیم کړی دی.

نوموړي د عراق خلکو ته ویلي: "په عراق کې څو میليونه هغو خلکو ته چې ازادي غواړي او نه غواړي چې د ایران تر واک او کنټرول لاندې وي، دا ستاسو وخت دی."

د امريکا ولسمشر ډونلډ ټرمپ
د امريکا ولسمشر ډونلډ ټرمپ

ټرمپ ویلي، د عراق له حکومته تمه لري چې د ځواک په کارولو سره په بغداد کې د امریکا د سفارت ساتنه وکړي.

د امریکا د بهرنیو چارو وزیر مایک پمپیو هم پر خپل ټویټر لیکلي چې امریکا به د ایران هغه لاسپوڅي برید ته ځواب ووايي چې پکې یو امریکايي وګړی ووژل شو.

د نوموړي په وینا دا مهال د ایران ملاتړ لرونکې ډلې، په بغداد کې د امریکا سفارت تهدیدوي.

مایک پمپیو همدارنګه ویلي، د عراق له وزيراعظم او ولسمشر سره یې په هغه هېواد کې د امریکايي وګړو د سرومال د ساتنې په اړه خبرې کړې دي.

د ډېسېمبر پر ۳۱مه ګڼ خلک چې د راپورونو په وینا شمېر یې زرګونو ته رسېده، د بغداد زرغونې سیمې ته ننوتل او ځانونه یې دغلته د امریکا د سفارت ودانۍ او بالاخره د ودانۍ دننه ورسول.

مظاهره چيان ظاهراً د امریکا پر هغه هوايي بریدونو غوسه دي چې په کې د کتایب حزب الله په نوم د ایران پلوه وسلوالې ډلې یو شمېر غړي ووژل شول.

رویټرز خبري اژانس د عراقي چارواکو له خولې وايي، د امریکا د سفیر او سفارت د کارکونکو د خوندیتوب لپاره سفارت خالي کړل شوی و او امریکايي مامورینو کې چاته زیان نه دی رسیدلی.

د اسوشیټیټډ پریس خبري اژانس راپور ورکړی چې د سفارت عمومي دروازه ماته شوې، او کله چې اعتراض کوونکې ودانۍ ته ننوتل د ډزو غږونه اورېدل شوي.

همدارنګه په یوه خپره شوې ویډیو کې ښکاري چې معترضانو د ودانۍ په بهر دیوال اور پورې کړی دی.

ویل کېږي چې پولیسو په بغداد کې د امریکا له سفارت څخه د مظاهره چيانو د په شا کولو لپاره له اوښکې بهونکي ګاز کار اخیستی.

راپورونه وايي، مظاهره چيان وروسته له ودانۍ ووتل، خو ژمنه یې وکړه چې د ودانۍ مخکې به پاتې شي.

د نیویارک ټایمز ورځپاڼې راپور ورکړی چې د امریکا سفارت ودانۍ ته چې په سختو امنیتي تدابیرو کې ساتل کېږي د اعتراض کونکو په رسېدو کې ښايي د عراق امنیتي ځواکونو ملاتړ او همکارۍ رول لرلی وي.

دا په ۲۰۱۲م کال کې د لیبیا په بن غازي کې د امریکا پر سفارت له برید وروسته د دې هېواد پر یوې سفارتي ودانۍ تر ټولو له تاوتریخوالي ډک برید ګڼل کېږي.

په هغه برید کې په لیبیا کې د امریکا د سفیر په ګډون څلور امریکايان وژل شوي وو.

د امریکا د بهرنیو چارو وزیر مایک پمپیو ویلي، چې د هېواد پوځ یې په عراق او سوریه کې د کتایب حزب الله پر ډله چې ایران یې ملاتړ کوي بریدونه کړي.

د امریکا د بهرنیو چارو وزیر مایک پمپیو
د امریکا د بهرنیو چارو وزیر مایک پمپیو

نوموړي وویل: "دا یو دفاعي اقدام و، په عراق کې د امریکايي ځواکونو او امریکايي وګړو د خوندیتوب لپاره شوی دی، همدارنګه د ایران مخنیوی هم هدف و، دا د ایران ملاتړ لرونکو ملیشه ډلي دي چې د عراق د خلکو د حاکمیت اصلي حق له پامه غورځوي."

د ایران رژیم پر امریکايي ځواکونو هر ډول برید کې لاس لرل رد کړي او دا یې د امریکا له خوا یو بې ثبونه ادعا بللې ده.

د امریکا د دفاع وزیر مارک ایسپر ویلي، د ایران د ملاتړ لرونکو وسله والو درې اهداف په عراق او دوه اهداف په سوریه کې د امریکا د پوځي تر هوايي بریدونو لاندې راغلي دي.

د امریکا د دفاع وزیر مارک ایسپر
د امریکا د دفاع وزیر مارک ایسپر

عراقي چارواکو ویلي چې په دې بریدونو کې ۲۵ وسله وال وژل شوي او او پنځوس نور ټپیان دي.

د راپورونو له مخې په هغو بریدونو کې چې د کتایب حزب الله ډلې د عراق د کرکوک ښار کې کړي، یو غیر نظامي امریکايي قراردادي وژل شوی او د دې هېواد څلور نور سرتېري له یو عراقي سرتېري سره ټپیان شوي دي.

د عراق په پلازمینه بغداد کې د ایران پلوه مظاهره چیانو له خوا د امریکا پر سفارت وروسته امریکا په منځني ختیځ کې د ۷۵۰ نورو ځواکونه ځای په ځای کولو اعلان کړی دی.

د امریکا د دفاع وزیر مارک ایسپر پرون ( ډیسیمبر ۳۱) په یو بیان کې وویل چې د اضافي ځواکونو ګومارل یو مناسب او حفاظتي اقدام دی ، چې امریکايي وګړیو او تنصیباتو ته د مخ پر زیاتیدونکي خطر په غبرګون کې اخستل شوی.

ویل کېږي چې دا مهال امریکا په عراق کې پنځه زره او په شام کې يو زر پوځیان لري.

ځانګړې پاڼې

له موږ سره اړیکي

XS
SM
MD
LG