اسلام اباد - په اسلام اباد کې د افغان سفارت په پېښور کې پر افغان مارکېټ تر چاپې وروسته هلته د خپلې کونسلګرۍ د تړلو اعلان کړی.
سفارت د اکتوبر پر ۱۱مه، په یوه بیان کې ویلي چې د خیبر پښتونخوا پولیسو د اکتوبر ۱۰مې شپې مهال، په دویم ځل پر افغان مارکېټ چاپه وهلې او د افغانستان بیرغ یې ورڅخه "ښکته" کړی چې "غندنه" یې کوي.
بیان وايي، دا اقدام د "ډېپلوماټیکو او ښه ګاونډیتوب د اصولو خلاف" دی.
د اکتوبر پر اتمه تر چاپې او د افغان مارکېټ تر خالي کولو وروسته سفارت د کونسلګرۍ تړلو ګواښ کړی وو.
د خیبر پښتونخوا حکومت د سفارت اقدام په اړه لا څه نه دي ویلي خو د پېښور هایکورټ د مارکېټ د ملکیت لانجې پر سر په خپله فیصله کې د پېښور انتظامیې ته امر کړی وو چې هغه خالي کړي او د شوکت کشمیري په نوم یې کس ته وسپاري.
افغان سفارت وايي، مارکېټ د افغان ملي بانک ملکیت دی خو عدالت د کشمیري په حق کې فیصله کړې وه.
