د لاسرسي ځای

تازه خبر

خبرونه

باجوړ کې یو ځايي مشر ګلداد خان ووژل شو

چارواکي وايي، د سېپټمبر پر لومړۍ نېټه په باجوړ کې یو ځايي مشر ګلداد خان په یوه بمي چاودنه کې وژل شوی دی.

دا پېښه د ناوګۍ تحصیل په هاشم چارمنګ سیمه کې مخې ته راغلې ده او ویل کېږي چې پر نوموړي د ریموټ بم چاودنه شوې ده.

د باجوړ ضلعې انتظامیه وايي چې له پېښې وروسته امنیتي ځواکونو په یاده سیمه کې د پلټنې عملیات کړي خو د کوم کس د نیولو خبر یې له رسنیو سره نه دی شریک کړی.

تر اوسه کومې ډلې د باجوړ د دغه مشر د وژنې مسولیت قبول کړی نه دی.

په قبایلي سیمو کې په وروستیو څو کلونو کې دا ډول په لسګونو پېښې مخې ته راغلي دي چې پکې قبایلي مشران، سپین روبي او د امن لښکرونو غړي وژل شوي دي.

د نننۍ ورځې ټول خبرونه وګورئ

ولسمشر غني له عمران خانه د ولسمشرۍ ټاکنو کې همکاري غوښتې

افغان ولسمشر اشرف غني او د پاکستان صدراعظم عمران خان

ولسمشر اشرف غني د پاکستان له وزیر اعظم عمران خان سره په ټيليفوني خبرو کې د افغانستان د ولسمشرۍ په انتخاباتو کې د پاکستان د همکارۍ غوښتنه وکړه.

ارګ نن په یوه خبرياڼه کې وویل، په دې ټيليفوني تماس کې چې د عمران خان له خوا نیول شوی وو، د سولې او انتخاباتو پر اړوندو مسایلو خبرې وشوې.

په خبرپاڼه کې راغلي دي چې ولسمشر غني په تېرو انتخاباتو کې د پاکستان ونډې ته د اشارې په ترڅ کې له ښاغلي عمران خان څخه وغوښتل چې په راروانو انتخاباتو کې د تشدد د پېښو د کمولو په برخه کې مرسته او همکاري وکړي.

دا په داسې حال کې ده چې د ولسمشرۍ انتخاباتو ته د ګوتو په شمار ورځې پاتې دي، طالبانو خپلو حملو ته زور ورکړی دی.

خوست: د ګاډو ټکر درې تنه وژلي

د ګاډو ټکر د خوست په المرۍ سیمه کې شوی. ۲۰۱۹ز کال، ۱۹م سېپټېمبر

په خوست کې د ګاډو ټکر کې درې تنه مړه او د یوې ښځې په شمول پنځه تنه زخمیان شوي دي.

د افغانستان په جنوب ختیځ کې پروت د خوست ولایت امنیتي چارواکي وایي چې نن پنجشنبه د سنبلې د میاشتې په ۲۸ مه د خوست ولایت د نادرشاه کوټ ولسوالۍ اړوند د المرۍ سیمه کې د کابل - خوست پر عمومي سړک د سراچه او ټوډي موټر د ټکر له امله رامنځته شوې ده.

د خوست د امنیې قوماندانۍ رسنیز دفتر وایي، په پېښه کې درې تنه مړه او د یوې ښځې په شمول پنځه تنه ټپیان شوي دي چې وژل شوي کسان او ټپیان ملي پولیسو ملکي روغتون ته انتقال کړي دي.

یاده ترافیکي پېښه د موټروانونو د بی احتیاطۍ له امله رامنځ ته شویده.

افغانستان کې د یوناما ماموریت یو کال نور وغځېد

د یوناما مشر رچرډ بېنېټ

د ملګرو ملتونو د امنیت شورا لسو موقتي او پنځو دایمي غړيو په افغانستان کې د یوناما د ماموریت دوام د یو بل کال لپاره تمدید کړ.

په چارشنبه د امنیت شورا له خوا په دې اړه د پرېکړه لیک له تصویب وروسته اوس په افغانستان کې د ملګرو ملتونو مرستندویه ماموریت ( یوناما) د ۲۰۲۰م کال د سېپټېمبر تر ۱۷مې نېټې کار کولای شي.

چین چې تر دې مخکې یې په دې اړه د امنیت شورا له پرېکړه لیک سره مخالفت کړی و، د جرمني او اندونیزیا له سفیرانو سره د خبرو په پایله کې یې خپل مخالفت پرېښود او پرون یې دې پرېکړه لیک ته مثبت رایه ورکړه. تر دې مخکې چین غوښتل چې د دې هیواد د ((يوې لارې يوې کړۍ)) د یو ټریلون ډالرو ستره پروژه د یوناما د ماموریت د تمدید په پرېکړه لیک کې یاده شي. امریکا له دې وړاندیز سره موافقه نه وه چې له کبله یې په دې اړه د امنیت شورا رای ورکول له دوشنبې څخه سه شنبې ته وځنډېدل.

عربستان په فارس خلیج کې د کښتیو امنیت ساتلو له ایتلاف سره یوځای شو

ریاض وروسته له هغه له دغه ایتلاف سره یوځای کېږي چې د روانې اونۍ په پيل کې یې د نفتو پر تاسیساتو ویجاړوونکي بریدونه وشول.

سعودي عربستان نن چهارشنبه (وږي ۲۷مه) د امریکا په مشرۍ له هغه اېتلاف سره یوځای شو چې په فارس خلیج کې په نړیوالو اوبو کې د کښتیو تګ راتګ خوندي کولو لپاره جوړ شوی دی.

ریاض وروسته له هغه ددغه ایتلاف برخه ګرځي چې د روانې اونۍ په پيل کې یې د نفتو پر تاسیساتو ویجاړوونکي بریدونه وشول.

دغه ایتلاف د امریکا په مشرۍ جوړ شوی چې ترډېره یې هدف په سیمه کې په نړیوالو اوبو او په تېره بیا له هرمز تنګي څخه د تېرېدو پرمهال د سوداګریزو بېړیو او نفتي ټانکرونو د تګ راتګ خوندي کول دي.

کله چې امریکا له ایران سره له شوي اټومي تړون نه بهر شو او ددغه هېواد د نفتو پر صادراتو یې بندیزونه ولګول نو په فارس خلیج کې په ځینو نفت وړونکو کښتیو کې بمي چاودنې وشوې.

امریکايي چارواکو ددغو چاودونو ملامتیا تهران ته راجع کړ، خو ایراني چارواکو پکې هرډول ښکېلتیا رد کړه.

پردې سربېره د روانۍ اونۍ په پیل کې د سعودي عربستان پر نفتي تاسیساتو بریدونه شول. که څه د یمن حوثي یاغیانو یې مسئولیت منلی، خو د امریکايي چارواکو په ګومان ښايي د ایران له خاوې شوې وي. واشنګټن ددغو بریدونو د څرنګوالي ارزولو په حال کې دی.

په همدې حال کې نن د امریکا د بهرنیو چارو وزیر مایک پامپیو د سعودي پلازمېنې ریاض ته رسېدلی او له سعودي چارواکو سره د تېلو پر تاسیساتو د برید په اړه د امریکا پر غبرګون خبرې کوي.

ټاکل شوې چې ښاغلی پامپیو نن د سعودي له ولیعهد محمد بن سلمان سره وګوري.

نن په اسرایلو کې پارلماني ټاکنې کېږي

کورناستی (متقاعد) پوځي بیني ګانتز او د اسراییلو اوسنی وزیر اعظم بنیامین نتنیاهو ګوندونه سیالۍ ته ولاړ دي.

په سېشنبه په اسراییلو کې د پارلمان د ۲۲مې دورې لپاره انتخابات کېږي.

د مرکزي شین او سپین ګوند مشر کورناستی (ریټایرډ) پوځي بیني ګانتز د اسراییلو اوسني وزیر اعظم بنیامین نتنیاهو د لیکود ګوند پر وړاندې انتخاباتو ته ولاړ دی.

نتنیاهو غواړي چې د څلورم ځل لپاره په انتخاباتو کې بریالی شي، خو په دې ټاکنو کې ګانتز د ده سخت سیال دی.

داسې اټکلېږي چې د دې انتخاباتو نتیجه به ډېره سره نژدې وي او که په دې ټاکنو کې هر یو مخکې شو، هغه به غوڅ اکثریت خپل نه کړي او اړ به وي چې له وړو ډلو سره ایتلافي حکومت جوړ کړي.

د اټکلونو له مخې د دواړو مخکښو کاندیدانو هرګوند ښایي د اسرایلو د ۱۲۰ کسیز پارلمان شاوخوا ۳۲ څوکۍ خپلې کړي.

د اسراییلو له نژدې نهه میلیونه نفوس څخه شاوخوا شپږملیونه او ۳۰۰ زره وګړي د رای ورکولو جوګه دي.

مکین کې یو عسکر وژل شوی

په جنوبي وزیرستان کې یو پاکستانی عسکر په بمي برید کې وژل شوی دی.

په ډېره اسماعیل خان کې استخباراتي ادارې بېګا مشال ریډیو ته په استولي برېښنالیک کې ویلي، پېښه په دوشنبه په مکین کې هغه وخت وشوه چې د سرکغاړه ښخ بم پر لاروي عسکر وروچاودېد.

د برید ذمه واري تحریک طالبان پاکستان منلې ده.

په اګست میاشت هم په جنوبي وزیرستان کې یوې چاودنې د بمونو شنډولو دوه عسکر وژلي او درې نور یې ژوبل کړي ول.

د سعودي عرب تېلو پر اسانیتاو د برید تلافي ته چمتو یو: ټرمپ

د امریکا ولسشمر ډونلډ ټرمپ

د سعودي عرب د تېلو پر اسانتیاو تر برید وروسته، د امریکا ولسمشر ډونالد ټرمپ ویلي، هېواد یې چمتو دی داسې اقدامات وکړي چې دغه برید تلافي کړي.

د تېرې شنبې ورځې برید له امله د سعودي عرب د نفتو د تولید کچه نیم په نیمه راښکته شوې ده.

ولسمشر ټرمپ پرون پر خپلې ټویټرپاڼې ولیکل: "د سعودي عرب د تېلو پر اسانتیاو برید شوی، دلیل شته چې باور وکړو ګرم څوک دی، په تمه یو چې له سعودي عربه یې واورو چې په باور یې دا حمله به چا کړې وي او دا چې تر کومو شرایطو لاندې اقدام کولی شي."

د سعودي عرب د ارامکو د تېلو لوی شرکت ویلي چې تر برید وروسته د دغه هیواد د تېلو ورځنی پیداوار ۵ اعشاریه ۷ ملیونه بېرلو ته راښکته کړی دی. له دې سره په نړیواله کچه د تېلو بیه په بېسارې ډول لوړه شوې ده. سعودي د نړۍ ۱۰ سلنه تېل تولیدوي.

د تېرې شنبې ورځې برید د ارامکو تېلو تاسیساتو کې د پراخ اور لګېدنې سبب شو.

د دغه برید مسوولیت حوثي یاغیانو پر غاړه واخیست او ادعا یې وکړه چې د ۱۰ ډرون الوتکو په وسیله یې د سعودي عرب د تېلو اصلي اسانتیاوې په نښه کړي دي.

د امریکا بهرنیو چارو وزیر د شنبې په ورځ ویلي و چې تراوسه ایران پر سعودي عرب سل بریدونه کړي او داسې هېڅ نښه نشته چې دغه برید دې د یمن له خاورې شوی وي.

د ترکیې، ایران او روسیې ولسمشران انقره کې پر سوریې غږېږي

درې واړه ولسمشران به د سوریې په ادلب کې د بشار اسد رژیم د پرمختګ په اړه خبرې وکړي.

د ترکیې ولسمشر رجب طیب اردوغان نن په انقره کې د حسن روحاني او ولادیمیر پوتین خپلو ایراني او روسي سیالانو کوربه دی.

د فرانسې خبري اژانس د راپور له مخې تمه ده چې اردوغان، روحاني او پوتین په ادلب کې د سوریې حکومت د پرمختګ په اړه خبرې وکړي.

ادلب د سوریې په شمال لوېدیځ کې د حکومت ضد اورپکو وروستۍ اډه بلل کېږي.

روسیې او ترکیې تېر کال په ادلب کې د امن سیمې پر جوړلو هوکړه کړې وه تر څو ادلب د سوریې حکومت له عملیاتو خوندي پاتې شي.

له ۲۰۱۷ میلادي کال راهیسې دا د سوریې د جګړې په اړه د یادو درېوو هېوادونو د مشرانو پنځمه ناسته ده.

د اې اف پي د راپور له مخې د ترکیې د ولسمشرۍ ماڼۍ ویاند ابراهیم کالین تېره میاشت ویلي وو چې درې واړه مشران به د سوریې د اساسي قانون د کمیسیون جوړولو او دا چې دا سیاسي پروسه څنګه پر مخ ولاړه شي، بحث وکړي.

روسیه او ایران د سوریې د ولسمشر بشار اسد ملاتړي دي او ترکیه له ځانګړو وسله والو ډلو ملاتړ کوي.

هانګ کانګ:د پولیسو د بندیز باوجود خلکو لاریون وکړ

د سېپټمبر پر ۱۵مه، په هانګ کانګ کې، زرګونو احتجاج کونکیو د پولیسو حصار مات کړ او د ښار په مرکز کې یې لاریون وکړ.

پولیسو د پیاده لاریون په اړه د مدني ټولنې درخواست رد کړی وو خو د هغې باوجود احتجاج کونکو لاریون وکړ.

احتجاج کونکي د نړیوال ملاتړ زیاتولو لپاره د برتانیې کونسلګرۍ بهر هم درېدلې وو، د هغه هېواد بېرغونه يې اوچت کړي وو او د ملکې د ژوند لپاره يې دوعاګانې غوښتلې.

په هانګ کانګ کې دا احتجاجونه په جون کې له هغه وروسته پیل شول چې حکومت د دې سیمې د خلکو مقدمي چین ته د سپارلو په اړه بېل وړاندی کړ.

حکومت وروسته دا قانون ختم کړ خو احتجاج کونکیو خپلې غوښتنې زیاتې کړې او اوس د انتخاباتو او د پولیسو د احتساب غوښتنې کوي.

سعودي: پر تنصیباتو بریدونو د تېلو پیداوار ټیټ کړی

د سعودي په عبقیه کې د تېلو تنصیبات د حوثي یاغیانو لخوا د ډرون پر واسطه په نخښه شوي

د سېپټمبر پر ۱۴مه، د سعودي عرب د تېلو پر دوو تنصیباتو له لسو ډرون بریدونو وروسته د ریاض د تېلو پیداوار نږدې نیمايي ته ټیټ شوی دی.

امریکا د دې بریدونو تور پر ایران پورې کوي.

د امريکا د بهرنيو چارو وزير مایک پامپیو ویلي چې ایران د نړیوالې انرژۍ د لېږد پر نظام بې ساری بريد کړی دی.

په یمن کې ايران پلوه حوثي یاغيانو د سېپټمبر په ۱۴مه د سعودي عرب په ختيځ کې د تېلو پر تنصيباتو د بريدونو ذمه واري منلي وه.

بلخوا د ایران د بهرنیو چارو وزارت ویاند عباس موسوي په دې برید کې د تهران لاس لرل رد کړي دي او ویلي یې دي چې داسې بې بنیاده تورونه هیڅ مانا نه لري.

د وال سټريټ ژورنال ورځپاڼې او د رويټرز خبري اژانس په وینا، د سعودي عرب په ختیځ کې د تېلو په دوو تنصیباتو له بریدونو وروسته د ورځې په حساب سره د تېلو پیداوار پینځه اشاریه اووه ملینه بیرلو ته کم شوی دی چې ورسره د تېلو نړیوال پیداوار پنځه في صده ټیټ شوی دی.

سعودي عرب وايي ، د تېلو پر یو مرکز یې ډرون برید شوی

د سعودي عرب ولیعهد او د کورنیو چارو وزیر

سعودي عرب وايي بې پایلټه الوتکو يي په یوه مهمه سیمه کې د تیلو را اېستلو یو میدان په نښه کړی دی.

د سعودي عرب د کورنیو چارو وزارت د سپټمبر پر ۱۴مه دا بریدونه په بقیاق سیمه کې د تیلو د پاکولو پر یو مرکز شوي دي.

د دوي په وینا ، دا مرکز نړۍ ته د تیلو د رسد لپاره ډیره وړتیا لري. د برید نه وروستو په دغه ځاي کې د اور لمبې پورته شوې دي.

په برید کې د مرګ ژوبلې په اړه مالومات نه دي ترلاسه شوي.

تر اوسه چا د بریدونو ذمه واري نه ده منلې ، خو له دې وړاندی حوثیانو په سعودي عرب ډرون بریدونه ترسره کړي.

د سعودي عرب په مشرۍ یو پوځي ایتلاف له کال دوه زره پنځلسم راهیسې د ایران پلوه حوثي یاغیانو پر ضد جنګیږي.

په سوات کې د ۱۲م ټولګي زده کوونکې نجلۍ وژل شوې

سوات

د خیبر پښتونخوا د سوات په کانجو کې یو ځاي کس خپله نوې واده شوې ښځه په ډزو وژلې او تښتېدلی دی.

د کانجو تاڼې ايس ايچ او غني الرحمان د سپټتمبر پر ۱۴مه مشال راډیو ته وویل چې تیره ورځ یې د ثنا ګل په نوم د وژل شوې ښځې مړی ترلاسه کړی دی.

د ده په وینا ، د قتل ملزم او د وژل شوې ښځې خاوند انس نومیږي چې د فرانس شهریت هم لري.

پولیس وايي ملزم د روانې میاشتې پر ۱۵ مه نیټه د ځان لپاره ټیکټ کړی وو او تښتېدلی دی.

ثنا ګل درې میاشتې وړاندې واده شوې وه او د دولسم ټولګي زده کوونکې وه.

د هغې پلار حضرت حسین مشال راډیو ته ویلي چې لور يي غوښتل ذده کړو ته دوام ورکړي او ډاکټره جوړه شي.

چارواکي وايي په ظاهره انس نه غوښتل چې ښځه يي نورې ذده کړی وکړي ، خو دوي په دغه اړه نورې پلټنې کوي.

په سوات کې د ښځو د حقونو دفاع کوونکی سازمان“دي اویکنینګ” د راپور تر مخه په سوات کې تیره یوه میاشت کې د تشدد په بیلا بیلو پیښو کې ۶ ښځې وژل شوي دي.

خیبر کې د پولیو ضد ښځینه کارکوونکو ته تنخا نه دي ورکړل شوې

د پولیو ضد کارکونکې

په خيبر قبايلي ضلعه کې د پوليو پرضد د کمپاين ښځينه کار کونکي وايي د تيرو پنځو میاشتو تنخوا نه ده ورکړل شوې.

په یاده ضلعه کې تر درې سوه زیاتې ښځينه کار کونکې د پوليو پرضد د څاڅکو ورکولو کمپاين سره کار کوي.

د پوليو پرضد د کمپاين يوې ښځينه کار کونکې يوسرا بي بي د سپټمبر پر ۱۳مه مشال راډیو ته وويل چې دوي ته د حکومت لخوا نه وو وييل شوي چې پيسې نشته.

بلخوا د خيبر قبايلي ضلعې د صحت د محکمې مشر ډاکټر شفيق وايي چې دغو کارکونکو ته به مخکې له ترقیاتي فنډ نه معاش ورکړل کيدو خو اوس د صوبې سرهانظمام نه پس دوي سره هغه مد کې پيسې نشته ، نو ځکه تنخواګانې نه شي ورکولای.

امریکا اوکراین ته ۲۵۰ میلیونه ډالر پوځي مرستې ورکوي

د اوکراین ولسمشر

د اوکراين ولسمشر ويلاديمير زيلينسکي د امریکايي ولسمشر ډونلډ ټرمپ پر دې مننه کړې چې د دې هيواد لپارهيې د پوځي مرستو په مد کې د۲۵۰ميليونه ډالرو ورکولو منظوري ورکړې ده.

دا مرستې د جاج اخيستو لپاره سپینې ماڼۍ ايسارې کړې وې.

د دېپوځي مرستو زیاته برخهبه د اوکراینيو ځواکونو پر روزنه او هغوي ته پر سامانونو ورکولو لګيږي.

اوکرایني ځواکونه دا مهال د هغو روس پلوه بيلتون پالو پرضد په هغه جګړه کېجنګيږي چې د پنځو کالو نه روانه ده او تر دا مهال پکې تر ۱۳ زره زیات کسان وژل شوي دي.

سپينې ماڼۍ تېره ورځ د دې پوځې مرستو پرضد خپل مخالفت پريښودو.

نتنیاهو و پوتین ته وویل، د ایران ګواښونه و نه زغمي

د روسیې ولسمشر ولادیمیر پوتین او د اسرائیل صدراعظم بنیامین نتانیاهو

د اسرایلو وزیر اعظم بنیامین نتنیاهو د روسیې ولسمشر ولادیمیر پوتین ته وویل، اسرایل به د ایران ګواښونه و نه زغمي.

نتنیاهو په پنجشنبه ناوخته د تور سمندرګي پر غاړه د روسیې سوچي ساحلي ښار ته ورسېد او د روسیې له ولسمشر سره یې ولیدل.

ده وویل، ایران د سوریې له خاورې څخه د یرغل د سیمې په توګه کار اخلي.

روسیه په سوریه کې د ایران ترڅنګ د بشاراسد د رژیم ننګه کوي.

د روسیې ولسمشر له نتنیاهو سره په کتنه کې د خپل هېواد او اسرایلو ترمنځ پوځي او امنیتي همکاري وستایله.

د روسیې ولسمشر ولادیمیر پوتین د اسرایلو له وزیر اعظم سره د خپلو خبرو په پیل کې وویل چې کرملین له دې سره لېوالتیا لري چې راتلونکې اوونۍ د اسرایلو پارلماني انتخابات څوک ګټي.

ده یادونه وکړه چې اسرایلو ته د پخواني شوروي اتحاد د جمهوریتونو تر یو نیم ميلیون زیاتو وګړو مهاجرت کړی او اوس هلته اوسي.

پوتین زیاته کړه چې دا کسان یې تل خپل خلک بللي او د دې په وړاندې بې تفاوته نه دی چې د اسرایل پارلمان ته څوک بریالي کېږي.

نتنیاهو د روسیې ولسمشر ته وویل، د روسیې له پوځ سره همغږي ورته مهمه ده، ځکه چې روسي پوځیان په سوریه کې مېشت دي.

ده دا هم وویل چې په تېره یوه میاشت کې د سوریې له خاورې پر اسرایلو د ایران د حملو هڅې ډېرې شوې دي.

امریکا د ټاکنو لپاره له افغانستان سره ۲۹ ميلیونه ډالر مرسته وکړه

امریکا د افغانستان د ولسمشرۍ د انتخاباتو د ترسره کېدو لپاره ۲۹ ميلیونه ډالر مرسته وکړه.

دا مرسته په کابل کې د امریکا سفیر جان بس پرون پنجشنبه د خپلې ټویټرپاڼې له لارې اعلان کړه.

په ملګرو ملتونو کې د امریکا سفیر هم تأیید کړه چې هېواد یې د افغانستان د میزان د شپږمې نېټې د ولسمشرۍ د انتخاباتو د ملاتړ لپاره ۲۹ ميلیون ډالره مرسته کوي.

تر دې وړاندې بریتانیا او ځینو نورو هېوادونو هم د افغانستان د انتخاباتو د ملاتړ لپاره مالي مرستې اعلان کړې دي.

روسی ولسمشر له اسرایلي وزیر اعظم سره ګوري

د روسیې او اسرایلو مشران

ټاکل شوې ده چې د روسیې ولسمشر د سوچي په ساحلي ښار کې د اسرائیلو له وزیر اعظم بنیامین نتانیاهو سره وګوري.

دا لیدنه د اسرایلو د ټولټاکنو په درشل کې ترسره کېږي.

د اسرایلو وزیر اعظم دفتر په یوه خبرپاڼه کې ویلي، په دې لیدنه کې به د اسرایلو او روسیې ترمنځ په پوځي همکارۍ ټینګار وشي او همدارنګه به د سوریې پر روان وضعیت بحث وشي.

کرملین بیا په یوه خبرپاڼه کې ویلي چې دواړه مشران به دې لیدنه کې د دوه اړخیزو اړیکو پر ښه کېدو بحث وکړي.

تر دې مخکې د اسرایلو وزیر اعظم بینیامین نتانیاهو د اګست په میاشت کې اوکراین ته سفر کړی وو.

دا په تېرو دوو لسیزو کې اوکراین ته د اسرایلو د یو وزیر اعظم لومړنی سفر و.

نتنیاهو په دې سفر کې د اوکراین او روسیې ترمنځ د اړیکو د ښه کېدو لپاره پر ګډو هڅو ټینګار کړی و.

پیپلز ګوند د حکومت خلاف دهرنا کې برخه نه اخلي: بلاول

د پیپلز ګوند شریک مشر بلاول بوټو زرداري (تصویر له ارشیفه)

پاکستان پیپلز ګوند ویلي، د جمیعت علماء اسلام د مشر مولانا فضل االرحمان له خوا د حکومت پرضد په لانګ مارچ کې برخه نه اخلي.

د سېپتېمبر پر یوولسمه د سیند په جامشورو کې له خبریالانو سره په خبرو کې د ګوند شریک مشر بلاول بوټو زرداري وویل، ګوند يې د دهرنې پر سیاست باور نه لري.

نوموړي زیاته کړه. ''مولانا فضل الرحمان چې کومې معاملې رااوچتوي او کوم سیاست کوي ، موږ يې ملګري یو او د هغه د دې ګام اخلاقي او سیاسي مرسته به کوو خو په ستراتیژیکي توګه ورسره یوه خوله نه یو.''

بلاول بوټو زرداري وویل، دی پخپله ډېر زر د حکومت پرضد د ولسي رابطې لړۍ پیلوي او د دې لپاره به د پاکستان هرې برخې ته ځي.

دیادولو ده، چې مولانا فضل الرحمان د اکتوبر په میاشت کې د تحریک انصاف په مشرۍ د وزیراعظم عمران خان د حکومت پرضد د احتجاجي تحریک پیلولو او اسلام اباد ته د لانګ مارچ اعلان کړی دی.

د امریکا ولسمشر د ملي امنیت سلاکار جان بولټن له دندې لرې کړ

ولسمشر ډونلډ ټرمپ او جان بولټن

د امریکا ولسمشر ډونلډ ټرمپ په ناڅاپي توګه د سپینې ماڼۍ د ملي امنیت سلاکار جان بولټن له دندې لرې کړ.

ولسمشر ټرمپ د سه شنبې په ورځ پر ټویټر ولیکل چې ” ما تیره شپه جان بولټن ته خبر ورکړ چې په سپینه ماڼۍ کې د ده خدمت ته نوره اړتیا نشته.

ولسمشر ټرمپ زیاته کړې چې زه د نوموړي له ډیرو وړاندیزونو سره سخت مخالف وم او همداسې چې په اداره کې ګڼ نور هم ورسره ( مخالف ) وو. “

نوموړي لیکلي چې له جان بولټن څخه یې استعفی غوښتې وه او هغه د لسم سپټمبر په سهار ده ته سپارلې وه.

ولسمشر ټرمپ د جان بولټن د خدمت مننه کړې او ویلي یې دي چې راتلونکې اونۍ به د ملي امنیت د سلاکار څوکۍ ته نوی کس ونوموي.

په عین حال کې سپینې ماڼۍ د دې پخلی کړی دی چې ولسمشر ټرمپ د جان بولټن مرستیال د هغه ځای ناستی ټاکلی دی.

کابل کې امريکا سفارت ته نژدې راکټ لګېدلی

کابل کې د امريکا سفارت ته نژدې د راکټ چاودنه

نن پر امریکا د ۲۰۰۱م کال د سېپټېمبر د ۱۱مې د بريد د ۱۸مې کلیزې په لومړیو ساعتونو کې په کابل کې د امریکا سفارت ته نژدې یو راکټ ولګېد.

د اسوشیېټید پرېس اژانس د راپور له مخې د راکټ له لګېدو یو ساعت وروسته د ځاني زیانونو راپور نه دی ورکړل شوی.

د امریکا په سفارت کې د ننه کارکونکو د لاوډ سپیکر له لارې دا پیغام واورېد چې د سفارت په انګړ کې د یوه راکټ د لګېدو له امله چاودنه شوې ده، خو د افغانستان د کورنیو چارو وزارت ویاند نصرت رحیمي مشال راډيو ته وویل چې راکټ د امریکا سفارت ته نژدې د افغانستان د دفاع وزارت د پیژنتون ریاست د ودانۍ پر دېوال لګېدلی او مرګ ژوبله یې نه ده رامنځ ته کړې.

په کابل کې د امریکا سفارت ته نژدې دغه راکټ داسې مهال لګېږي چې نن پرامریکا د هغه ترهګر برید کلیزه ده چې امريکا یې اړکړل، په افغانستان کې جګړه پیل کړي او هم هغه د امريکا د ولسمشر ډونالډ ټرمپ له هغه اعلان یوه ورځ وروسته کېږي چې له طالبانو سره یې د سولې خبرې ختمې وبللې.

په عین حال کې د امریکا د مرکزي قومندانۍ مشر جنرال کېنيت ميکېنزي چې د سېپټېمبر پر نهمه افغانستان ته تللی و، خبریالانو ته څرګنده کړه چې امريکا به د طالبانو پرضد عملیات پراخ کړي.

په اوس وخت کې شاوخوا ۱۴ زره امریکایي سرتیري په افغانستان کې دېره دي.

د پاکستان او هند ترینګلتیا کمه شوې ده: ولسمشر ټرمپ

د امریکا ولسمشر ډونلډ ټرمپ

د امريکا ولسمشر ويلي د پاکستان او هند تر منځ ترينګلتيا کمه شوې ده. ډونلډ ټرمپ پرون په سپينه ماڼۍ کې له خبريالانو سره د خبرو پر مهال وويل چې د کشمير پر سر د پاکستان او هند تر منځ ترينګلتيا موجود ده خو د نوموړي په خبره د تيرو دوو اوونيو په پرتله په دې لږ کموالی راغلی دی.

ټرمپ پر دې مهال وويل چې که هند او پاکستان وغواړي نو دی ورسره مرستې کولو ته چمتو دی. نوموړي زياته کړه چې دی له دواړو هېوادونو سره ښې اړيکې لري او داوړه هېوادونه د ده په وړانديز خبر دي.

ټرمپ پر دې مهال د ((مداخلت يا منځګړيتوب)) ټکی ونه کاراوه او يوازې يې د ((مرستې)) وړانديز وکړ خو نوموړي تر دې وړاندې د هند او پاکستان تر منځ د کړکېچ کمولو لپاره د منځګړتوب وړانديز کړی و. هند دا وړانديز مخکې رد کړی و او ويلي يې وه چې دا د هند او پاکستان تر منځ دوه اړخيزه موضوع ده.

هند د اګست پر پنځمه د جمو او کشمیر ځانګړی اییني حيثیت ختم کړ. پاکستان وايي هندوستان په داسې کولو د نړیوال قانون سرغړونه کړې خو هند دا خبره ردوي او وايي چې دا يې کورنۍ معامله ده.

ننګرهار کې یو وتلی ډاکټر نوروز شینواری په یوه چاودنه کې ووژل شو

د ننګرهار چارواکي وايي چې د دوشنبې پرمازیګر د جلال اباد ښار انګور باغ سیمه کې د ننګرهار ډاکټرانو اتحادیې مشر ډاکټر نوروز شینواري په یوه چاودنه کې وژل شوی او دوه نور ولسي افغان وګړي ژوبل دي. ځايي چارواکي وايي چاودنه د هغه پر ګاډي له نښلولي ماین شوې ده.

د ننګرهار د والي ویاند عطاالله خوږیاڼی وایي د پېښې پلټنې یې پېل کړي دي.

ډاکټر نوروز شینواری په ننګرهار کې د هډوکو سپیشلست و او په دې برخه کې یې له پاکستانه سپېشلاییزېشن کړی و.

نوموړي ته له څه مودې راهیسې د نامالومو ځایونو څخه د پېسو نه ورکولو په صورت کې د مرګ ګواښونه ورکول شوي ول.

د پېښې زمه واري چا نه ده منلې.

د پاکستان په ډېری ښارونو کې د محرم لسمه لمانځل کېږي

په کوټه ښار کې د محرمې لسمې جلوس: ۲۰۱۸ کال، ۲۱م سېپټېمبر

نن د خیبر پښتونخوا پشمول د ملک په څلور واړه صوبو، ګلګت بلتستان او پاکستان تر انتظام لاندې کشمير په لويو او وړو ښارونو کې د محرم لسمې ماتمي جلوسونه راويستل کېږي او د امنیت ساتلو لپاره د ملک په زياترو لویو ښارونو کې موبايل ټېليفونونه بند دي او د موټر سايکل پر غبرګو سورلو هم بنديز لګول شوی دی.

په پېښور، بنو، پاړه چنار، کوهاټ او د خیبر پښتونخوا په یوشمېر سیمو کې د محرم په مناسبت امنیت سخت کړل شوی دی.

د کواټ پولیسو ویاند فضل نعیم وایي په ښار کې یې د درېوو امام باړو د امنیت لپاره کوټلي ګامونه پورته کړي دي.

بلخوا د اسلام اباد پوليسو په وینا د محرم ماتمي جلوسونو د امنيت لپاره د پوليسو سره سره رېنجرز، اېف سي، سپېشل برانچ، ټرېفک پوليس او بم ډسپوزل سکواډ ۲۲۰۰ اهلکاران هم خپله ډيوټي ترسره کوي.

د خېبرپښتونخوا په ۱۲ ضلعو کې د ډېنګي ناروغي خوره شوې

ماشی ډینګي ناروغي خوروي

چارواکي وايي چې د ډېنګي ماشي چېچلو له کبله په پېښور، اېبټ اباد، بنو، کرک، کوهاټ، مانسهره، بټګرام ، صوابۍ، هريپور، مردان او سوات کې په لسګونو کسان ناروغه شوي دی. زياتره ناروغان په پېښور کې دي.

د سوات سیدو شريف هسپتال مرستيال مشر ډاکټر محمدخان د سېپټمبر پر نهمه نېټه مشال راډیو ته وويل چې په تېرو درې ورځو کې ۵۵ ناروغان وروړل شوي دي چې پکې ۱۲ لاهم په هسپتال کې تر درملنې لاندې دي.

په خېبر پښتونخوا کې له تېرو څو کلونو راهیسې هرکال د پشکال په موسم کې د ډېنګي ناروغي خورېږي

روسي ولسمشر له خپل فرانسوي سیال سره خبرې کړې

روسی ولسمشر ولاديمير پوتین له خپل فرانسوي سیال امانوېل مکرون سره روغبړ کوي. ۲۰۱۹، ۱۹م اګست

د کرېملن ويبپاڼه وايي، روسي ولسمشر ولاديمير پوتین د سېپټمبر پر اتمه نېټه د ايران جوهري تړون او په ختيځ يوکراين کې د وسله والې شخړې په اړه له فرانسوي ولسمشر امانوېل مکرون سره خبرې کړې دي.

دا ټيليفوني خبرې په مسکو کې د روس او فرانس بهرنيو او دفاعي چارو وزيرانو ترمنځ تر کېدونکې غونډې يوه ورځ له مخه شوې دي.

تانس نيوز اژانس وايي، دوی به د ايران په ګډون د خليج فارس، د اوکراين وضعيت او د منځني افريقايي رېپبلک پرمختګونو بحث کوي.

تر غونډې له مخه د فرانس دفاع وزيرې فلورنس پارلې تاس اژانس ته ويلي، پر ځينو موضوعاتو به سپینې خبرې سره کوي.

روسی ولسمشر ولاديمير پوتین له خپل فرانسوي سیال امانوېل مکرون

نور پورته کړئ

ځانګړې پاڼې

له موږ سره اړیکي

XS
SM
MD
LG