پراګ ـ په هانګ کانګ کې جمهوریت پلوه مظاهره کوونکي د اګست پر ۱۱مه هم په لارو کوڅو کې د مظاهرو نیت لري. دا په داسې حال کې ده چې پولیسو په دغه ښار کې پر مظاهرو د بندېز اعلان هم کړی دی.
د چین تر واک لاندې د دغې سیمې په بېلابېلو ځایونو کې مظاهره چیان پر حکومت د فشار اچولو په موخه اعتراضونه کوي. هلته چین دړکه کړېده چې که مظاهرې ارامې نه شوې نو دوی به په هانګ کانک کې پوځي مداخله وکړي.
په ۱۹۹۷ کال کې چې د هانګ کانک د واک چارې له برېتانیا څخه چین ته سپارل کېدې نو داسې معاهده شوې وه چې تر راتلونکو پنځوسو کلونو پورې به د «یو هیواد ـ دوه نظامونو» تر فارمولې لاندې به هانګ کانګ خپل ټولنیز، قانوني او سیاسي نظام ولري.
خو د چین کمونیسټ ګوند په پراخ ډول له هغه تړونه په شا شوی او قانوني بدلونونه یې رامنځ ته کړي چې هرکلی یې نه دی شوی.
مظاهرې د هغې قانوني مسودې په غبرګون پیل شوې چې که د هانګ کانګ پارلېمان منظور کړې وای نو پر ځینو مشکوکو کسانو به په چین کې مقدمې کېدې.
دغه قانوني مسوده که څه هم وځنډول شوه خو مظاهره کوونکي اوس د مستقیمو ټول ټاکنو، د اوسني قانون سازۍ د منحلولو او په مبینه توګه د پولیسو لخوا پر خلکو د سخت تشدد د پلټنو غوښتنې کوي.
په داسې حال کې چې حکومت د هانګ کانګ د مظاهره کونکیو خلاف سخته رویه خپله کړېده، اوسنۍ مظاهرې بې سارې ګڼلې شوې دي چې د شنونکو په اند د بیجنګ لپاره سختې سیاسي ننګونې پیدا کولی شي.
د مظاهرو له وجې په هانګ کانک کې د هوټلونو، سیاحت او اقتصادي سیکټور چارې اغېزمنې شوې دي.
د هانګ کانګ بیجنګ پلوه مشر کیري لام خبرداری ورکړی چې ښار د اقتصادي بحران سره مخامخ دی.