د لاسرسي ځای

تازه خبر

بولټن: ایران دې د امریکا احتیاط کمزوري نه ګڼي


بولټن وويل هېچا ایران ته د ګډوډیو پیدا کولو اجازه نه ده ورکړې

بیت المقدس - د امريکا د ملي امنيت سلاکار وايي، ايران دې د واشنګټن ((احتياط او مصلحت)) د کمزورۍ په معنا نه اخلي.

جان بولټن چې د جون پر ۲۳مه، په بيت المقدس کې د اسرایيل له وزیراعظم بنيامين نتنياهو سره یې خبرې کولې، وويل چې هېچا په منځني ختيځ کې ايران ته د خپلسرو فعالیتونو او ګډوډیو اجازتنامه نه ده ورکړې.

دا څرګندونې په داسې حال کې کېږي چې د امريکا ولسمشر ډونلد ټرمپ ويلي، تر هغې وروسته يې د ايران پر څو ساحو پوځي حملې لغوه کړې چې ورته وويل شول چې ښايي په دغو حملو کې ١٥٠ ايرانيان ووژل شي.

ولسمشر ټرمپ د امريکا د يوې بې پېلوټه الوتکې د ويشتلو په بدل کې د دغو حملو امر صادر کړى وو، خو وروسته يې بېرته فسخه کړ.

خو د امريکا د ملي امنيت سلاکار ټينګار وکړ چې ولسمشر ټرمپ يوازې دا مهال د دې حملې ترسره کول درولي دي.

دا خبردارى په داسې حال کې ورکول کېږي چې په امريکا کې ځينو رسنيو راپور ورکړ چې امريکا تېره پنجشنبه د ايران د پوځ پر کمپيوټري سېستمونو سايبري يا انټرنېټي حملې کړې دي.

دا حملې د ايران له خوا د امريکا د يوې بې پېلوټه الوتکې تر غورځولو وروسته شوې دي.

واشنګټن پوسټ ورځپاڼې او اسوشې اېټېډ پرېس اژانس د امریکايي چارواکو په حواله راپور ورکړى چې دا سايبري حملې د ولسمشر ډونالد ټرمپ په تاييد شوي دي.

د امریکا دفاعي چارواکو د دغو راپورونو له تصدیقه ډډه کړې ده.

ولسمشر ټرمپ د جزیياتو له ورکولو پرته ويلي چې امريکا د جون پر ۲۴مه پر ایران تازه بنديزونه لګوي.

ځانګړې پاڼې

له موږ سره اړیکي

XS
SM
MD
LG