کوټه ـ د بلوچستان د پرمختیايي ادارې " بي ډي اې" یو شمېر کارکونکي د خپلو نوکریو د پخولو په موخه پر احتجاج او د نه خوړلو په احتساب بوخت دي.
د دوی شمېره ۲۰ تنه ده چې د مې له ۲۲مې راهېسې یې د کوټې پرېس کلب مخې ته د نه خوړلو هړتال پیل کړی او غوښتنه کوي چې حکومت دې د دوی نوکرۍ پخې کړي.
د احتجاج کونکو په وینا، د دوی د ادارې له ۷۰۰ څخه زیات کارکوونکي عارضي ملازمت کوي چې د مستقل کېدو غوښتنه کوي.
د نور احمد په نوم یو احتجاج کوونکي مشال راډیو ته وویل:
"که په دې صوبه کې د اوسېدو حق نه لرم نو په یو ډز مې مړ کړه، حق خو مه رانه اخله، اولاد خو مې مه وژنه، زه خو خپل حق غواړمه."
د یار محمد ترین په نوم یو بل احتجاج کوونکي مشال راډیو ته وویل، د ده په ګډون داسې ګڼ کسان دي چې له تېرو ۱۵ کلنو راهېسې په عارضي قراردادونو ملازمت کوي او نوکرۍ یې ورته نه پخېږي. نوموړي هم دا غوښتنه وکړه چې حکومت دې د دوی نوکرۍ مستقلې کړي.
د یو شمېر سیاسي ګوندونو مشران هم د احتجاج کونکو خوا ته ورغلي او د هغوی حال یې اخېستی دی. د پښتونخوا ملي عوامي ګوند سېنېټر عثمان کاکړ هم هلته ورغلی وو، هغه مشال راډیو ته وویل:
"تېر حکومت له دوی سره منلې وه چې دغه عارضي ملازمین به خپل اسناد حکومت ته ښکاره کوي او د دې ثبوت به وړاندې کوي چې څو کاله یې ملازمت کړی دی، او بیا به مستقل کېږي، نو پکار ده چې د دغو کسانو مشکل په زر ورته حل کړل شي. "
عثمان کاکړ زیاتوي، که د دغو احتجاج کونکو غږ وانه ورېدل شو نو ټول سیاسي ګوندونه به یې ملاتړ ته ووځي.
د بلوچستان د پرمختیايي ادارې کارکوونکي دا هم وايي چې له تېرو څو میاشتو راهېسې یې تنخواګانې هم بندې دي.
خو د بلوچستان د وزیراعلی جام کمال لخوا اعلان شوی چې حکومت د دغو ملازمینو د نوکریو د دایمي کولو لپاره یوه کومیټي پر کار ګومارلې ده او امر یې کړی چې حکومت دې دغو کسانو ته د تېرو څلورو میاشتو معاشونه زر ورکړي.
