د پاکستان قومي اسمبلۍ هم پر کم عمري ودونو د بندیز بل منظور کړی دی.
په بل کې ویل شوي چې که چا تر ۱۸کالو په کم عمر کې د نجونو ودونه وکړل نو سزا به ورکول کېږي.
د مذهبي ګوندونو اتحاد متحده مجلس عمل غړو په ګډون ځینو حکومتي استازو هم د دې بل د منظورۍ مخالفت کړی دی.
دا بل د اپرېل پر۳۰مه د پاکستان تحریک انصاف اقلیتي غړي ډاکټر رمېش کمار قومي اسمبلۍ ته وړاندې کړ کوم چې د ۵۰ په مقابله کې په ۷۲ رایو منظور کړل شو.
دا بل تر دې وړاندې له سېنټ څخه هم منظور کړل شوی وو.
اوس د لا نور ښه کولو لپاره په قومي اسمبلۍ کې د بشري حقونو قایمه کمېټۍ ته لېږل شوی او له هغه وروسته به یې ولسمشر لاسلیک کړي چې د قانون برخه شي.
