پېښور - د پېښور ماشوخيلو اوسېدونکيو تر هغې وروسته احتجاج کړی چې د پوليو څاڅکو ورکولو له کبله د شاوخوا ۶۰ ماشومانو د ناروغه کېدوه دعوه یې وکړه.
ځايی خلکو له مشال راډیو سره د خبرو پر مهال ادعا کړې چې د اپريل پر ۲۲ نېټه سهار مهال د پوليو کارکوونکو په ځايي سکول کې ماشومانو ته ګوزڼ ضد څاڅکې ورکړل چې بيا وروسته يو شمېر ماشومان بې هوشه شول.
خو حکومت له خوا د دې تصديق نه دی شوی چې ماشومان رښتيا هم د پوليو څاڅکې له وجې بې هوشه شوي او که څنګه؟
البته د خېبرپښتونخوا وزيراعلی د پېښې نوټس اخیستی او د څېړنو امر یې کړی.
محمود خان د پېښور روغتون چارواکو ته هم ويلي چې ماشومانو ته دې طبي اسانتياوې ورکړي.
د ماشوخيلو په لسګونه اوسېدونکو د احتجاج پر مهال د سيمې د صحت بنيادي مرکز دروازه ماته کړه او ودانۍ ته يې اور ورته کړ.
د پاکستان جيو نيوز وېبپاڼې د حیات اباد ميډيکل کمپلېکس وياند په حواله ويلي چې د ماشومانو روغتيايي حالت ښه دی.
جيو نيوز زياتوي چې د واکسين ورکولو حکومتي ادارې اي پي ای وياند کامران اپريدي ورته ويلي چې د پوليو وايرس ضد واکسين بد اغېز نه کوي او نه هم واکسين تر وخت تېر ول.
د ډاکترانو په وینا، د پولیو واکسیني څاڅکي باید په یخي یا واوره کې وساتل شي او هر کله چې یخی ویلي شي، نو بیا باید و نه کارول شي.
